وبلىس اكىمى عاۋەز نۇرمۇحامبەتوۆ ءانسامبلدىڭ جەتەكشىسى ولگا روستوۆششيكوۆا مەن بيشىلەردى لايىقتى جەڭىسىمەن قۇتتىقتادى. «انسامبل مۇشەلەرى تالانتتا شەك جوق ەكەنىن, ساحنادا جارقىراۋعا اركىمنىڭ دە قابىلەتى بار ەكەنىن دالەلدەدى. سىزدەردىڭ جۇمىستارىڭىز, تاباندىلىقتارىڭىز جانە شىنايىلىقتارىڭىز ءبارىمىزدى شابىتتاندىرادى, ال كەزەكتى جەڭىستەرىڭىز – ونەردى ورگە اپاراتىن جاندار ءۇشىن مۇمكىن ەمەس ەشنارسە جوق ەكەنىن كورسەتتى. جارايسىزدار, ءبىز ارقايسىڭىزبەن ماقتانامىز! الدا تەك جاڭا بيىكتەر, بۇدان دا كوپ جەتىستىكتەر بولسىن!» دەپ جازدى ءوڭىر باسشىسى عاۋەز نۇرمۇحامبەتوۆ الەۋمەتتىك جەلىدە.
بۇل ەرەكشە ونەر ۇجىمى تۋرالى ءبىز «ەگەمەنگە» ءۇش رەت جازعان بولاتىنبىز. ولار بىرنەشە الىس شەتەلدەگى دودالارعا قاتىسىپ, ۇنەمى جەڭىمپاز بولىپ ورالىپ ءجۇر. وسى بيىلعى مامىر ايىندا عانا انسامبل فرانتسيادا وتكەن حالىقارالىق فەستيۆالعا قاتىسىپ, ءبىرىنشى ورىن الىپ كەلدى. ءتۇرلى حالىقارالىق بي فەستيۆالدارىنان انسامبل وسىمەن 18-گران-پري جانە ءتۇرلى نوميناتسيا بويىنشا 41-رەت ءبىرىنشى ورىن الىپ كەلىپ وتىر.
ەسكە سالا كەتەتىن بولساق, ۇجىمنىڭ ەرەكشەلىگى سوندا – ونىڭ مۇشەلەرى ەستي المايتىن جاندار. سوندىقتان سويلەي دە المايدى, ناقتى ايتقاندا مىلقاۋ جاندار. ولاردىڭ ءبارى پەتروپاۆلداعى ەستۋ قابىلەتى كەم بالالارعا ارنالعان ينتەرناتتا وقىعان. ال جەتەكشىلەرى ولگا روستوۆششيكوۆا ەرمەك سەركەباەۆ اتىنداعى دارىندى بالالارعا ارنالعان ونەر كوللەدجىندە حورەوگرافيادان ساباق بەرگەن. ول بىردە كەمباعال جاندار ينتەرناتى بالالارىنىڭ ونەرگە قۇشتارلىعىن بايقاپ, جۇمىسقا ءوز ەركىمەن كىرىسكەن. سودان بەرى (18 جىل) وسى ينتەرناتتىڭ بالالارىنا بي ۇيرەتۋمەن اينالىسىپ كەلەدى. مەكتەپتى بىتىرگەن ەرەسەكتەر توبى قازىر س.مۇقانوۆ اتىنداعى قازاق سازدى دراما تەاترىنىڭ قاسىندا قوسالقى ترۋپپا بولىپ جۇمىس ىستەيدى. ال جاسوسپىرىمدەر مەن بالالار توبى ءالى ينتەرنات قابىرعاسىندا.
بي ۇيرەتۋ وتە كۇردەلى جۇمىس. ول – ءسوزسىز ونەر, تەك مۋزىكا ىرعاعىمەن دەنە قيمىلدارى ارقىلى وزدەرىنىڭ وبرازدارىن اشادى. ال «Sensitive» بيشىلەرى مۋزىكانى ەستىمەيدى, ونى تەك جەتەكشىلەرىنىڭ قيمىلدى كورسەتۋى ارقىلى ۇعىپ, ونىڭ كوڭىل كۇيىن, جان كۇيزەلىسى مەن قۋانىشىن تانىپ, لەزدە قابىلدايدى. انسامبل بولعان سوڭ ءبىر ءبيشى ەمەس, ولاردىڭ قيمىلدارى دا ءارتۇرلى.
ءبىز ولگا روستوۆششيكوۆانىڭ قالاي جۇمىس ىستەيتىنىن كوردىك. ول شاكىرتتەرى ساحنادا بيلەپ جاتقاندا ءوزى كورەرمەن زالىنىڭ ورتاسىندا تۇرىپ, مۋزىكانتتارعا قاي نوتانى الۋدى كورسەتىپ تۇراتىن ديريجەرشە بارلىق قيمىلدى مۋزىكاعا سايكەس كورسەتىپ, ءوزى دە جانتالاسىپ بيلەپ تۇرادى ەكەن. ءبىر بي اياقتالعانشا قانشاما قوزعالىس جاسايدى. ءبيشى – كوپ, بۇل – جالعىز, سوندىقتان ءار ءبيشىنىڭ قيمىلىن كورسەتۋى كەرەك قوي. كۇردەلى جۇمىس ەكەنى كورىنىپ تۇر. بىراق و.روستوۆششيكوۆانىڭ ايتۋىنشا, شاكىرتتەرى شەتىنەن تالانتتى, مۇنىڭ قيمىلىن ەمەۋرىنىنەن تانىپ, لەزدە ورىندايدى ەكەن. «ولاردىڭ قۇلاقتارى ەستىمەگەنىمەن, باسقا تۇيسىكتەرى جاقسى دامىعان. سوندىقتان مەنى لەزدە ۇعادى», دەيدى ول.
وسىدان ەكى جىل بۇرىن ولگا روستوۆششيكوۆاعا «قۇرمەت» وردەنى بەرىلدى. ونىڭ العان اسۋلارىنا بەرىلەتىن قۇرمەتتەر ءالى دە الدا. ءوز ماماندىعىن ءسۇيىپ, ونىڭ قىر-سىرىن قاجىماي-تالماي قۇلاعى ەستىمەيتىن جاندارعا ۇيرەتىپ, ەل ونەرىنە ولجا سالىپ جۇرگەن ادامنىڭ ەڭبەگى لايىقتى.
پەتروپاۆل
