سينوپتيكتەردىڭ مالىمەتىنە قاراعاندا, ايدىڭ العاشقى ونكۇندىگىندە اۋانىڭ تەمپەراتۋراسى 8 گرادۋسقا دەيىن سالقىندايدى. «قازگيدرومەتتىڭ» سولتۇستىك قازاقستان فيليالىنىڭ باسشىسى گۇلزات عازيزوۆانىڭ ايتۋىنشا, ايدىڭ ەكىنشى ونكۇندىگىندە كۇندىز 2-3 گرادۋس جىلىمىق بولعانىمەن, تۇندە اۋانىڭ تەمپەراتۋراسى 9-14 گرادۋسقا دەيىن تومەندەيدى. ءۇشىنشى ونكۇندىكتە ءتىپتى مينۋس 20-24 گرادۋستارعا دەيىن سۋىتادى.
كەشەگى قاتتى بوراندا قار مولىنان ءتۇستى. قالانىڭ كوپ جەرىندە تۇرعىندار قوزعالىسى دا قيىنداپ قالدى. تاڭەرتەڭنەن ىشقىنا سوققان بوران تەك ءتۇس قايتا تولاستادى. قۇتىرعان جەل قاردى كەيبىر جولدار مەن اۋلالارعا قالىڭ قىلىپ ءۇيىپ تاستادى. جىلىمىق جەرگە ءتۇسىپ ەرىگەن قار لەزدە قاتىپ, كوكتايعاق بولعان تۇستار دا كوپ.
تۇسكە دەيىن قار تازالاۋعا شۇعىل كىرىسىپ, تۇرعىنداردىڭ ءجۇرىپ-تۇراتىن جولدارىن ارشىپ جاتقان تەحنيكالار دا كورىنبەدى. جۋىردا عانا «قازاۆتوجول» مەكەمەسىنىڭ باسشىلىعى جول تازالاۋعا تەحنيكالارىمىز ساقاداي ساي, بارلىعى 328 تەحنيكا قار تازالاۋعا دايىن تۇر دەپ مالىمدەگەن ەدى. دەگەنمەن قالانىڭ ءبىرشاما اۋداندارىندا, اسىرەسە «سولتۇستىك», №19 شاعىن اۋدانداردا قوزعالىستا جۇرگەن تەحنيكا كوزگە تۇسپەدى. تەك كوممۋنالدىق قىزمەتتىڭ ادامدارى عانا قولدارىنداعى قۇرالدارىمەن جولداردى اشىپ ءجۇر.
قالانىڭ كەيبىر مەكتەپتەرىندە ەكىنشى اۋىسىمنىڭ ساباقتارى قىسقارتىلدى. ۇيگە كەش شىققان وقۋشىلار بوران قايتا تۇرسا ۇيلەرىنە جەتۋى قيىن. ۇيلەرى وقۋ ورنىنان الىس ورنالاسقان بالالار ساباقتاردان بوساتىلدى.
پەتروپاۆل
