رەجيسسەر اقمارال باتالوۆا تۇسىرگەن جانە «SEZAR films» پروديۋسەرلىك ورتالىعى ۇسىنعان «جاقسىلىق جالعاسى» دەرەكتى ءفيلمى ءۇندىستاندا وتكەن «NFF – Nawada Film Festival» حالىقارالىق كينوفەستيۆالىندە جەڭىمپاز اتاندى.
فيلم جەر سىلكىنىسىنەن زارداپ شەككەن سيريا حالقىنا قازاق ەلىنىڭ گۋمانيتارلىق كومەك كورسەتۋى تۋرالى باياندايدى.
دەرەكتى تۋىندى «ۇزدىك دەرەكتى فيلم» جانە «ۇزدىك الەۋمەتتىك فيلم» اتالىمدارىندا جەڭىسكە جەتىپ, 84 ەلدەن قاتىسقان 1800-دەن استام ءفيلمنىڭ اراسىنان وزىپ شىقتى. سونىمەن قاتار بۇل فيلم فەستيۆالدىڭ باس جۇلدەسىنە دە لايىق دەپ تانىلدى.
بىلتىر ء«ال-فارابي الەمدىك مۇراسى» جانە «اسار ۋمە» قايىرىمدىلىق قورلارىنىڭ باستاماسىمەن قازاقستان حالقى سيرياعا 100 توننا گۋمانيتارلىق كومەك جەتكىزدى. قايىرىمدىلىق اكتسياسى بارىسىندا لاتاكيا جاعالاۋىندا, داماسك قالاسىنداعى ءال-فارابي مادەني ورتالىعىندا, سونداي-اق حمەيميمدەگى رەسەيلىك اسكەري بازادا كيىز ۇيلەر ورناتىلدى. سول قازاقى اق وتاۋلاردا زارداپ شەككەن ادامدارعا قايىرىمدىلىق ءىس-شارالارى جاسالدى.
اتالعان فيلم قازاقستان حالقىنىڭ جاناشىرلىق پەن ىنتىماقتاستىق جانە قايىرىمدىلىق قاسيەتتەرىنىڭ جاقسى ۇلگىسىن بۇكىل الەمگە پاش ەتتى.
