فوتو: facebook.com/darhan.hidirali
سەناتوردىڭ سوزىنشە, قازاقستان فۋبولىنىڭ بۇگىنگى دەڭگەيى سىن كوتەرمەيدى. كەيىنگى ماۋسىمدا ەل چەمپيوندارى تەك پەنالتي سەرياسى ارقىلى انىقتالعانى وسىعان دالەل. دارحان قىدىرالى الەمدەگى ەڭ تانىمال سپورتتىڭ ەلدەگى دامۋى اقساپ تۇرعانىن ساپاسىز سالىنعان ستاديوندارمەن بايلانىستىردى.
«ەلىمىزدە وسى 30 جىلدا 2 ستاديون عانا سالىنعان ەكەن. الايدا سونىڭ ەكەۋى دە, نەبارى ءبىر ويىننان كەيىن جاراماي, جابىلعان «تۇركىستان ارەنا» دا, «استانا ارەنا» دا قايتا كۇردەلى جوندەۋدەن ءوتتى. قالعان ستاديوندار ەسكى, كوبى ۋەفا تالاپتارىنىڭ تومەنگى دەڭگەيىنە دە ساي كەلمەيدى. ال كەيبىر وڭىرلەر جىل ارالاپ توزىعى جەتكەن ستاديوندارىن قايتا كۇردەلى جوندەۋدەن وتكىزەدى. ونىڭ ورنىنا وسى قىرۋار قارجىعا ءاربىر وبلىس ورتالىعىندا تالاپقا ساي ستاديوندار نەگە سالىنبايدى؟ مۇندا جەمقورلىق جوق پا؟», دەدى دارحان قىدىرالى.
ول ءبىر كەزدەرى فۋتبول ويناۋ شەبەرلىگى ءبىزدىڭ ەلمەن دەڭگەيلەس بولعان گرۋزيا, وزبەكستان بالالار فۋتبولىن قولداۋ, ماماندار دايارلاۋ, ينفوقۇرىلىمدى دامىتۋ, بىرىڭعاي جۇيە قابىلداۋ, فۋتبول الاڭدارى مەن ستاديوندار سالۋ ارقىلى ناتيجەگە جەتكەنىن ەرەكشە اتاپ ءوتتى.
سەناتور پرەمەر-ليگاداعى جۇيەسىزدىكپەن قاتار, ۇلتتار ليگاسى سىندى الەمدىك دوپ دودالارىنداعى انتي-رەكوردتارعا جول بەرىپ وتىرعان وزگە ەلدەن كەلگەن باپكەرلەردىڭ ايلىعىنا سۇراۋ سالدى. الاڭدا جاپپاي لەگيونەرلەردىڭ دوپ تەبۋىن دە تۇيرەپ ءوتتى.
«ەلىمىزدەگى فۋتبولدى دامىتۋعا جاۋاپتى فەدەراتسيانىڭ جىلدىق بيۋدجەتى 10 ملرد تەڭگەنى (20 ملن ەۋرو) قۇرايدى. بۇل قاراجاتتىڭ قايدا, قالاي جۇمسالىپ جاتقانى تۋرالى اشىق مالىمەت جوق. كومانداسى قارسىلاستار قاقپاسىنا ءبىر گول سالا الماي انتي-رەكورد جاساپ وتىرعانىنا قاراماستان ءوزى ەۋروپانىڭ ازۋلى قۇرامالارىنىڭ باپكەرلەرىنەن كوبىرەك جالاقى الاتىن ۇلتتىق قۇرامانىڭ باس باپكەرىنىڭ ايلىعى قۇپيا. فەدەراتسيا بۇل اقپاراتتى كىمنەن جاسىرادى؟», دەدى سەناتور.
دارحان قىدىرالى ۇكىمەت باسشىسىنا جولداعان ساۋالىن قورىتىندىلاي كەلە, فۋتبولداعى جۇيەسىزدىكتى زاڭ شەبەرىندە رەتتەۋدى ۇسىندى. مۇنداي تاجىريبە الەم ەلدەرىندە بار ەكەنىن ەسكەرتتى.
