فوتو: اشىق دەرەككوز
اكىمدىكتىڭ مالىمەتىنشە, وبلىستاعى جولداردىڭ جالپى ۇزىندىعى – 4 440 شاقىرىم, ونىڭ ىشىندە وبلىستىق ماڭىزى بارى – 1 265 شاقىرىم جانە اۋداندىق ماڭىزى بارى – 3 175 شاقىرىم. بۇل جولداردى قىستا كۇتىپ ۇستاۋعا 43 مەردىگەر ۇيىم جاۋاپتى دەپ تانىلدى.
سونىمەن قاتار 401 بىرلىك تەحنيكا, بەس مىڭ توننا ينەرتتى ماتەريال, 965 توننا ديزەل وتىنى ازىرلەنگەن. ايبەك قايىردىڭ ايتۋىنشا, جىلۋ پۋنكتتەرىن دايىنداۋ جانە ولاردى قاجەتتى ازىق-ت ۇلىك قورىمەن قامتاماسىز ەتۋ, سونداي-اق جول بويىنداعى سۋ وتكىزۋ قۇبىرلارىن تازالاۋ جۇمىستارى اياقتالىپ قالعان.
«قازاۆتوجول» ۇك» اق وبلىستىق فيليالىنىڭ ديرەكتورى ايبول داناعۇلدىڭ مالىمەتىنشە, كومپانيا رەسپۋبليكالىق ماڭىزى بار 1869 شاقىرىم جولعا قىزمەت كورسەتەدى. ونىڭ 117 شاقىرىمى قازىر جوندەلىپ جاتىر. جۇمىستى اياقتاۋ پروتسەسىن جەدەلدەتۋ ءۇشىن قوسىمشا تەحنيكا تارتىلعان.
«جولداردا 101 قارلى ۋچاسكە بار. ونىڭ 28 ۋچاسكەسىندە 86 شاقىرىم تەمىربەتون قورشاۋلار ورناتىلدى. قالعان ۋچاسكەلەرگە ۋاقىتشا اعاش قالقاندارى قويىلادى. سونداي-اق قار قۇرساۋىندا قالعان جۇرگىزۋشىلەر مەن جولاۋشىلار ءۇشىن 15 جىلىتۋ پۋنكتى دايىندالدى. 28 ارنايى تەحنيكا جۇمىلدىرىلدى. جەتىسپەيتىن تەحنيكا جالعا الىنادى. قازىر ينەرتتى ماتەريالدار دايىندالىپ جاتىر. جالپى 9400 توننا قۇم مەن 2020 توننا تۇز دايىنداۋ جوسپارلانعان», دەدى ايبول داناعۇل.
سونداي-اق قىستا كولىك كەپتەلىسىن بولدىرماۋ ءۇشىن «سامارا-شىمكەنت» رەسپۋبليكالىق ماڭىزى بار اۆتوجولىنىڭ «اقتوبە-حرومتاۋ-قارابۇتاق» باعىتىنداعى ۋچاسكەلەردە اينالما جولدار جاسالعان. سونىمەن قاتار قارلى بوران بولعان جاعدايدا كولىك ءۇشىن قوسالقى تۇراقتار دايىندالادى. ولاردىڭ ءبىرى - حرومتاۋ اۋدانى اقجار اۋىلىنىڭ تۇسىندا اشىلعان.
قالا اكىمىنىڭ ورىنباسارى جۇلدىزبەك بيسەمبين ءوز كەزەگىندە وبلىس ورتالىعىنداعى جولداردى كۇتىپ ۇستاۋ ماسەلەسى تۋرالى باياندادى. قالا 24 ۋچاسكەگە بولىنگەن, ولاردىڭ ارقايسىسىن قىستا كۇتىپ ۇستاۋعا جاۋاپتى مەردىگەر ۇيىم بەكىتىلگەن. قىستا كوشەلەردى تازالاۋعا 350 بىرلىك تەحنيكا شىعادى. قالانى قاردان تازارتۋ ءۇشىن كۇندىزگى اۋىسىمدا 30 بريگادا (40 تيەگىش, 150 جۇك كولىگى) جانە تۇندە 20 بريگادا (20 تيەگىش, 60 جۇك كولىگى) جۇمىلدىرىلادى. مەردىگەرلەر قازىردىڭ وزىندە 1250 توننا تۇز, 1830 توننا قۇم-تۇز قوسپاسى جانە 2000 توننادان استام قۇم جيناعان.
دايىندىق شارالارى تۋرالى ايتا كەلە, قالا اكىمىنىڭ ورىنباسارى ەل بويىنشا ەڭ تومەن سانالاتىن جولداردى قىسقى كۇتىپ ۇستاۋ تاريفتەرىن قايتا قاراۋ قاجەتتىگىن اتاپ ءوتتى.
اسحات شاحاروۆ وبلىستا جولداردى قىسقى كۇتىپ ۇستاۋعا دايىندىق تۋرالى باياندامالاردى تىڭداپ بولعان سوڭ, تولىق دايىندىقتى, اۋا رايى جاعدايلارىنا ۋاقىتىلى دەن قويۋدى جانە قوزعالىستىڭ بارلىق قاتىسۋشىلارى ءۇشىن قاۋىپسىزدىكتى قامتاماسىز ەتۋدى تاپسىردى.
«جولداردا قاۋىپسىزدىكتى قامتاماسىز ەتۋ جانە قىس مەزگىلىندە جۇرگىزۋشىلەر ءۇشىن تاۋەكەلدەردى ازايتۋ قاجەت. جولداردى جوندەۋدى ۋاقتىلى اياقتاۋعا جانە قولايسىز اۋا-رايىنا جەدەل دەن قويۋعا ەرەكشە نازار اۋدارۋ ماڭىزدى. بارلىق جۇمىس اۋا رايى جاعدايلارى مەن حالىق قاجەتتىلىگىن ەسكەرە وتىرىپ جۇرگىزىلۋى ءتيىس. قاردىڭ سالدارىن تەز ارادا جويۋ عانا ەمەس, سونىمەن قاتار الدىن-الا دايىندالۋ – جىلۋ پۋنكتتەرىن, قۇم مەن تۇز قورىن ۇيىمداستىرۋ, قورشاۋلار مەن ارنايى تەحنيكانىڭ بولۋىن قامتاماسىز ەتۋ كەرەكپىز. جولداردا قاۋىپسىز ءجۇرۋ ءۇشىن جاعدايلار بارلىق نەگىزگى ۋچاسكەلەردە قامتاماسىز ەتىلۋى ءتيىس», دەدى وبلىس اكىمى.
