اتالعان ساباقتار مۇعالىمدەردىڭ ءبىلىم كوكجيەگىن كەڭەيتىپ قانا قويماي, سونىمەن قاتار ۇستازداردىڭ بىلىكتىلىگى ارقىلى جاستاردىڭ پاتريوتتىق سەزىمىن وياتىپ, اسكەري قىزمەتكە دەگەن قىزىعۋشىلىعىن تۋدىرادى. ۇيىمداستىرۋشىلار ءىس-شارانىڭ باستى ماقساتى ساپتىق جانە دەنەشىنىقتىرۋ دايارلىعىن پىسىقتاۋ ەكەنىن ايتتى. ءارى وسى وقۋلاردا قاتىسۋشىلار تەوريالىق پەن پراكتيكالىق داعدىنى ءبىر-بىرىمەن ۇشتاستىردى. سونداي-اق ۇستازدار جالپىاسكەري جارعىلاردىڭ ەرەجەلەرىندەگى نەگىزگى وزگەرىستەرمەن دە تانىستى. بۇعان قوسا ەلىمىزدىڭ قارۋلى كۇشتەرىنىڭ قارۋ-جاراعى مەن اسكەري تەحنيكاسىن تاماشالادى.
ال دارىستە وقىتۋشىلار قۇرامى ءارتۇرلى بولدى. ۇستازدارعا كەڭەس وداعىندا قىزمەت ەتكەندەر دە, بىرنەشە جىل بۇرىن اسكەري قىزمەتىن اياقتاعاندار دا ساباق بەردى. ءبىر قىزىعى, العاشقى اسكەري دايىندىق ءپانى مۇعالىمدەرىنىڭ اراسىندا قىزدار دا بولدى. ولارعا بۇل ءپان وتە ۇنايتىن بولعاندىقتان وسى ماماندىقتى تاڭداپتى. سول ءۇشىن ارنايى پەداگوگيكالىق جوعارى وقۋ ورنىندا ءبىلىم العان.
دارىسكە قاتىسۋشىلارعا وقۋ-ماتەريالدىق بازادان ورىن بەرىلسە, الدىن الا دايىندالعان جەكە قۇرام دا سولارعا ءبولىندى. ءوز كەزەگىندە 35748 اسكەري ءبولىمىنىڭ تاجىريبەلى نۇسقاۋشىلارى وقىتۋشىلاردى اسكەري دايىندىق نەگىزدەرىنە قالاي دۇرىس ءارى ساۋاتتى وقىتۋ كەرەكتىگىن بايانداپ, مۇعالىمدەردىڭ قىزىقتىرعان سۇراقتارىنا جاۋاپ بەردى.
– بۇگىندە العاشقى اسكەري دايىندىقتىڭ ءاربىر مۇعالىمى مەكتەپتىڭ اسكەري-پاتريوتتىق كلۋبىنىڭ باسشىسى دەسەك بولادى. وسى ورايدا قورعانىس ىستەرى جونىندەگى دەپارتامەنتتىڭ مالىمەتىنە سۇيەنسەك, شىمكەنت قالاسىنىڭ اۋماعىندا 137 مەكتەپتە العاشقى اسكەري جانە تەحنولوگيالىق دايىندىق بويىنشا ساباق وتكىزىلەدى. ءاربىر وقۋشى ارميا تۋرالى ماعلۇماتتى ءبىرىنشى مۇعالىمىنەن الاتىنى بەلگىلى. سوندىقتان ءبىز ولاردىڭ قىزمەتىنە ەرەكشە نازار اۋدارۋىمىز كەرەك. اسكەري بولىمدە وتكەن ادىستەمەلىك ساباقتار – ۇستازداردىڭ ءبىلىمى مەن تاجىريبەسىن بايىتۋداعى العاشقى قادامدار, – دەدى ءبولىم كومانديرىنىڭ تاربيە جونىندەگى ورىنباسارى پودپولكوۆنيك قۋانىش ايدىنعاليەۆ.
قورعانىس سالاسى ماماندارىنىڭ ايتۋىنشا, بۇگىنگى تاڭدا وقۋشىلاردى جاۋىنگەرلىك دايىندىق نەگىزدەرىنە ۇيرەتۋدىڭ ماڭىزى ەرەكشە. سەبەبى سول ارقىلى بولاشاق اسكەرگە شاقىرىلۋشىلاردىڭ بويىندا وتان الدىنداعى بورىشىن وتەۋگە دەگەن سەزىمى ويانادى ءارى جاسوسپىرىمدەردىڭ سوعان ىشتەي دايىندالىپ جۇرۋىنە مۇمكىندىك تۋادى. جالپى, اسكەريلەر مۇنداي ساباقتار قالا مەن ەلدى مەكەندەگى ءبىلىم بەرۋ ۇيىمدارىندا اسكەري دايىندىق ءپانىن وقىتۋدا وڭ وزگەرىستەرگە جول اشادى دەپ ۇمىتتەنەدى. بۇل دارىستە مۇعالىمدەر ءوزارا تاجىريبە الماسۋعا, ساباق بارىسىندا تۋىنداعان قيىندىقتاردى ورتاعا سالىپ بىرگە تالقىلاۋعا, سونداي-اق ءبىلىم بەرۋ ۇدەرىسىن جاقسارتۋ بويىنشا ۇسىنىستارىن ازىرلەۋگە مۇمكىندىك الدى.
– مۇنداي ءىس-شارالار پەداگوگتەردىڭ بىلىكتىلىگىن ارتتىرىپ قانا قويماي, وسكەلەڭ ۇرپاقتىڭ ساناسىن سىلكىندىرىپ, پاتريوتتىق رۋحىن كۇشەيتۋمەن دە ماڭىزدى. ءبولىم باسشىلىعى جاستاردى پاتريوتتىق رۋحتا تاربيەلەۋ ىسىندە ۇستازدارمەن بىرلەسىپ جۇمىس ىستەۋگە ارقاشان دا دايىن. وسى ورايدا اسكەري مەن ءبىلىم بەرۋ مەكەمەلەرى اراسىنداعى ىنتىماقتاستىق ودان ءارى ارتا بەرەدى دەگەن ۇمىتتەمىن, – دەدى پودپولكوۆنيك ق.ايدىنعاليەۆ.
