شوقان ماقىنى 10 جاسىندا سانكت-پەتەربۋرگتەگى ەستۋ قابىلەتى جوق بالالاردى وقىتاتىن ارناۋلى ۋچيليششەگە ورنالاستىرادى. وقۋعا اتتاناردا اكەسى شىڭعىس ماقىعا شىركەۋگە بارماۋدى, شوقىنباۋدى, شوشقا ەتىن جەمەۋدى قاعازعا سۋرەت سالا وتىرىپ تۇسىندىرگەن ەكەن. قۇلدىراڭداعان بالا اكەنىڭ تاپسىرمالارىن بويىنا تەرەڭ ءسىڭىرىپ, بۇلجىتپاي ورىنداعان.
ماقى وقىعان ۋچيليششە كەمباعال بالالاردى سۋرەت سالۋعا, سىزۋ, كالليگرافيا, گراۆيۋرا ونەرىنە ۇيرەتكەن. شوقان ءۋاليحانوۆ سانكت-پەتەربۋرگتە ونى ءوزىنىڭ دەموكرات, اعارتۋشى دوستارىمەن تانىستىرعان. زەرەكتىگىنىڭ ارقاسىندا ماقى الەمدىك اتاقتى سۋرەتشىلەردىڭ ونەرىمەن تانىس بولىپ, ورىس جانە الەم ادەبيەتى وكىلدەرىنىڭ وزىق شىعارمالارىن بويىنا سىڭىرگەن.
توعىز جىل وقىپ, تۋعان ەلىنە سۋرەت, قولونەر تۋىندىلارىنىڭ كاسىبي مامانى, ۇزدىك شەبەرى بولىپ ورالادى. اعاشتان, سۇيەكتەن ويۋلاپ توسەكاعاش, ساندىق, استاۋ, ساپتاياق, وجاۋ, ناقىشتى قاپ (فۋتليار) سياقتى تاماشا جادىگەرلەر جاساعان. 1876 جىلى سانكت-پەتەربۋرگتە بولعان شىعىس زەرتتەۋشىلەرى شىعارمالارىنىڭ كورمەسىندە ماقىنىڭ ونىمدەرىنە التىن مەدال بەرىلگەن.
ول ءوز اكەسى مەن ونىڭ زامانداستارىنا, ەل اعالارىنا ارناپ ءتۇرلى كادەسىيلار, سونىڭ ىشىندە سۇيەكتەن, مۇيىزدەن جاسالعان شاقشالار, ولارعا اراب شريفتىمەن قولتاڭبالار جازىپ بەرىپ وتىرعان. ءتىپتى جاقىن تۇسكەن ورىس قالالارىندا ءۇي سالعىسى كەلگەن قازاقتارعا تۇرعىن ۇيلەردىڭ جوباسىن, ءساندى ويۋلارىنا دەيىن سىزىپ بەرەدى ەكەن. قازىردىڭ وزىندە ونىڭ ارحيتەكتۋرالىق جوباسىن سىزىپ بەرگەن ۇيلەرى ساۋمالكول, سىرىمبەت, كوكشەتاۋ, قىزىلجار قالالارىندا بار كورىنەدى.
ماقى – ۇيلەنىپ, بالالى-شاعالى بولعان جان. ونىڭ ىدىرىس دەگەن ۇلى, اجار, قاليما دەگەن قىزدارى بولعان. ماقى بالالارىنىڭ, اكەسىنىڭ پورترەتىن سالعان.
بولشەۆيكتەر وكىمەتتى باسىپ الىپ, زيالى وتباسىلاردىڭ بارىنە بۇيىدەي تيگەندە ءۋاليحانوۆ اۋلەتىندە دە قۋدالاۋ باستالىپ, ماقىنىڭ ونەر تۋىندىلارى شاشىلىپ, ۇستاعاننىڭ قولىندا, تىستەگەننىڭ اۋزىندا كەتكەن. ءتىپتى ءپىل سۇيەگىنەن جاسالدى دەگەن باعا جەتپەس تۋىندىلارى دا قولدى بولعان. تەك بىرەن-ساران دۇنيەلەرىن ۇرپاقتارى ساقتاپ قالىپتى. سونىڭ ءبىرىن ماقىنىڭ نەمەرەسى, قازاقتىڭ اتاقتى ارحيتەكتورى, مەملەكەتتىك سىيلىقتىڭ لاۋرەاتى, مەملەكەتتىك گەرب اۆتورلارىنىڭ ءبىرى شوت-امان ءۋاليحانوۆ اتاسىنىڭ تۋعان جەرى – ايىرتاۋ اۋدانىنداعى ش.ءۋاليحانوۆ اتىنداعى سىرىمبەت اۋىلىنداعى مۋزەيگە تاپسىرىپتى. ونى جۋىردا وبلىستىق گازەتتىڭ جاس ءجۋرناليسى سامرات قۇسكەن تاۋىپ, جاريالادى. سىرتى ءپىل سۇيەگىمەن اشەكەيلەنگەن بۇل ساندىقتىڭ كوركەمدىك قۇندىلىعى, ديزاين شەبەرلىگى وراسان زور. قولدانىلعان ماتەريالدى ماقى سانكت-پەتەربۋرگتە وقىعان جىلدارىندا ساتىپ العان كورىنەدى. قازىر ساندىققا قىزىعىپ, تاماشالاۋشىلار سانى جىل سايىن ارتىپ كەلەدى.
سولتۇستىك قازاقستان وبلىسى,
سىرىمبەت اۋىلى
