اۋىل تۇرعىندارىنىڭ دەنساۋلىعى مەن ءال-اۋقاتىن جاقسارتۋ ماقساتىندا ەل يگىلىگىنە بەرىلگەن بۇل نىسان «Amanat» پارتياسىنىڭ سايلاۋالدى باعدارلاماسى اياسىندا جۇزەگە اسىرىلدى. جالپى قۇنى 118 239 464,34 تەڭگەنى قۇرايدى.
«كومىرشىگە كەلىن بولىپ تۇسكەنىمە 40 جىل بولدى. وسى ۋاقىت ىشىندە ارنايى مەديتسينالىق عيمارات تۇڭعىش رەت سالىنىپ وتىر. بۇعان دەيىن اۋىلداعى مەكەمەلەردىڭ ءبىر بۇرىشىن پانالاپ قىزمەت كورسەتەتىن ەدىك. ەندى, مىنە, جارقىراعان اق سارايداي عيماراتتا ەڭبەك ەتۋ باقىتى بىزگە دە بۇيىردى. مۇنداعى جايلىلىق سىرقاتتانىپ كەلگەن ادامنىڭ دا كوڭىلىن سەرپىلتەرىنە سەنىمدىمىز. اۋىل تۇرعىندارىنىڭ جاعدايىن ەسكەرىپ, وسىنداي نىسان سىيلاعان ەل ازاماتتارىنا العىسىمىز شەكسىز», دەيدى مەيىربيكە ميراش ابدىلداەۆا.
ايتسا ايتقانداي, كومىرشىلىكتەردىڭ قازىرگى قۋانىشىندا شەك جوق. عيمارات زاماناۋي تالاپقا ساي جابدىقتالعان. ءتىپتى مەديتسينا قىزمەتكەرلەرىنىڭ اق حالاتىن جۋىپ, ۇتىكتەپ الۋىنا قاجەت اۆتوماتتى كىر جۋ ماشيناسى مەن ۇتىككە دەيىن قاراستىرىلعان. مۇندا اق جەلەڭدى 3 مامان تۇرعىندارعا قالتقىسىز قىزمەت كورسەتەدى.
مەديتسينالىق پۋنكتتىڭ جوبالانعان اۋماعى 3000 شارشى مەتردى قامتيدى. كوگالداندىرۋ جۇمىستارى دا تولىق اياقتالعان مەدپۋنكت جايلى بولمەلەرىمەن, زاماناۋي ينفراقۇرىلىمىمەن ەرەكشەلەنەدى. مۇندا ورتا مەديتسينا قىزمەتكەرلەرىنىڭ كابينەتى, ەگۋ كابينەتى, پروتسەدۋرالىق, اكۋشەرلىك قابىلداۋ كابينەتى, مۇگەدەكتەر مەن باسقا دا كەلۋشىلەرگە ارنالعان سانيتارلىق توراپتار, ءدارىحانا پۋنكتى, قىزمەتكەرلەرگە ارنالعان گاردەروب جانە جۋ بولمەلەرى, سونداي-اق مەديتسينالىق قالدىقتاردى ۋاقىتشا ساقتاۋ, قۇرالداردى دەزينفەكتسيالاۋ مەن دايىنداۋ بولمەلەرى بار. ماماندار مەدپۋنكتتە العاشقى كومەك كورسەتۋگە, ديسپانسەرلىك ەسەپتە تۇراتىندارعا تاعايىندالعان ءدارى-دارمەك تە جەتكىلىكتى ەكەنىن ايتادى.
مەديتسينالىق نىسان ورتالىقتاندىرىلعان سۋ مەن جىلۋ جۇيەسىنە قوسىلعان. بۇل – اۋىل تۇرعىندارىنا العاشقى مەديتسينالىق كومەك كورسەتۋدى جاقسارتۋمەن قاتار, ايماقتاعى دەنساۋلىق ساقتاۋ قىزمەتىنىڭ ساپاسىن ارتتىرا تۇسكەنىن اڭعارتىپ وتىر.
«بيىل اۋلىمىزعا ايرىقشا كوڭىل ءبولىنىپ, تابىستى جىل بولىپ وتىر. جەكە كاسىپكەر ءوزىنىڭ قارجىسىنا حاتىمحانا سالىپ بەرىپ, قازان ايىنىڭ ورتاسىندا پايدالانۋعا بەرسە, ەندى, مىنە, ەڭسەلى مەدپۋنكت اشىلدى. كومىرشى اۋلىنىڭ كوشەلەرى اسفالتتالىپ, جارىق تارتىلىپ, مەكتەپ جوندەۋدەن ءوتىپ, قات-قابات يگى ىستەردىڭ جۇزەگە اسىپ جاتقانىنا قۋانىشتىمىز. اۋىلدىڭ ينفراقۇرىلىمىنىڭ وسىلايشا جاڭعىرىپ, جاقسارا ءتۇسۋى, ەڭ الدىمەن, جاستارىمىزدىڭ تۋعان جەرىندە تۇراقتاۋىنا, تىرشىلىك ەتۋىنە ىقپال ەتەرى ءسوزسىز», دەيدى اۋىل تۇرعىنى داۋرەن سۇلتانباي ۇلى.
الماتى وبلىسى
