«Qazaqstan» جەڭىل اتلەتيكالىق سپورت كەشەنىندە دومبىرا ۇيىرمەسىنە قاتىسۋشىلار قۇرمانعازى ساعىرباي ۇلىنىڭ شوقتىعى بيىك «بالبىراۋىن» كۇيىن ءبىر مەزگىلدە كۇمبىرلەتتى. بۇل جارقىن ءساتتى ارنايى ماماندار باقىلاپ وتىردى. بالالاردىڭ سانىن 8 ساراپشى, ال كۇيدىڭ ورىندالۋ ساپاسىن 4 ساراپشى قاداعالادى. ايتا كەتەيىك, كۇي مەرەكەسىنە مادەنيەت قايراتكەرى شولپان قورعانبەك ديريجەرلىك ەتتى.
بي ۇيرەتەتىن جي
جاپونيا جاساندى ينتەللەكت ارقىلى ۇلتتىق ءبيدى ناسيحاتتاۋعا كىرىستى. بۇل قۇرىلعى ەجەلدەن كەلە جاتقان ءداستۇرلى ونەردى دارىپتەپ, جاس ۇرپاقتىڭ مادەنيەتكە دەگەن قىزىعۋشىلىعىن ارتتىرادى.
تىڭ تەحنولوگيا بيگە ىقىلاسى بار جاننىڭ ءاربىر قيمىل-قوزعالىسىن كامەراعا جازىپ الىپ, تالدايدى. سودان سوڭ الىنعان مالىمەتتەردى قورىتىپ, ادامنىڭ يكەمىنە ساي ساباقتاردى ەكرانعا شىعارادى. سونى قايتالاپ وتىرساڭىز جەتكىلىكتى. «كومپيۋتەرلىك گرافيكا جاساعان نۇسقاۋلىق دۇرىس باعىت كورسەتىپ, ءبيدى تەز مەڭگەرۋگە سەپتىگىن تيگىزەدى. قازىرگى تاڭدا جاڭا تەحنولوگيا توكيونىڭ سپورت مەكتەپتەرىندە قولدانىسقا ەنگىزىلىپ جاتىر», دەدى «Fujitsu» كومپانياسىنىڭ ءبولىم باسشىسى حيدەنوري فۋدزيۆارا.
پلاستيك كىرپىش
ەكونوميكالىق ىنتىماقتاستىق جانە دامۋ ۇيىمىنىڭ مالىمەتىنە سۇيەنسەك, قازىر پلاستيك قالدىقتاردىڭ كولەمى 20 جىل بۇرىنعى كورسەتكىشتەن ەكى ەسە كوپ. الايدا سونىڭ 9 پايىزى عانا قايتا وڭدەلەدى.
وسى ماسەلەگە ايرىقشا كوڭىل بولگەن قىتايلىق ونەرتاپقىشتار قۇرىلىستا قولدانۋعا بولاتىن بىرەگەي كىرپىش جاساپ شىقتى. ول ءجۇز پايىز قايتا وڭدەلگەن پلاستيكالىق قالدىقتاردان جاسالعان. مامانداردىڭ ايتۋىنشا, جاڭا ءونىم جوعارى بەرىكتىگىمەن, جەڭىلدىگىمەن جانە ۇزاق قىزمەت ەتۋ قاسيەتىمەن ەرەكشە. ونەرتابىس كوپشىلىك نازارىنا گۋانچجوۋ قالاسىندا وتكەن جىل سايىنعى كانتون جارمەڭكەسىندە ۇسىنىلدى.
