تاربيەلىك ءمانى مول ءىس-شارانىڭ ماقساتى – حالقىمىزدىڭ سالت-ءداستۇرىن, ادەت-عۇرپىن زامانعا ساي جاڭعىرتىپ, ونى جاستار اراسىنا ناسيحاتتاپ, وتباسى ينستيتۋتىنىڭ مارتەبەسىن كوتەرۋ.
«قارا شاڭىراق» قوعامدىق بىرلەستىگىنىڭ باسشىسى تۇرار شاكەننىڭ ايتۋىنشا, بۇل ءىس-شارا بيىل ەكىنشى مارتە ءوتىپ وتىر.
«ەلىمىزدە وتباسىلارعا ارنالعان ءتۇرلى بايقاۋ بار ەكەنىن بىلەمىز. بىراق جاس وتباسىلار اراسىندا ەتنوگرافيالىق باعىتتاعى بايقاۋ وتە از. ءبىر جاعىنان, قازىر ۇرپاق تاربيەسى قاتتى الاڭداتادى. وسى سالاعا قاتىستى وزەكتى ماسەلەلەر دە كوپ. ونى شەشۋگە دە بولادى. سونىڭ ءبىر جولى – ۇلتتىق قۇندىلىقتاردى جاستاردىڭ ساناسىنا ءسىڭىرۋ. بۇگىنگى ءىس-شارانىڭ ماقساتى دا وسى», دەدى ول.
ءۇش كەزەڭنەن تۇرعان سايىسقا 15-كە جۋىق جاس وتباسىنان ءوتىنىم ءتۇسىپ, بايقاۋ شارتىنا سايكەس 8 وتباسى ىرىكتەلىپ الىندى.
تاعىلىمدى ءىس-شارا بارىسىندا جاس وتباسىلار قازاقتىڭ باي سالت-ءداستۇرىن دارىپتەپ, قولونەر بۇيىمدارىمىزدى ناسيحاتتاپ, ۇمىت بولعان ۇلتتىق تاعامدارىمىز — ۇلپەرشەك, ورمەتوس, قارىنبۇرمە, ميپالاۋ, بالقۋىرداق, ءاسىپتى دايىنداۋ ءتاسىلىن كورسەتىپ, كوپشىلىك ىقىلاسىنا بولەندى.
وتباسىلىق سايىسقا اقىن, قوعام قايراتكەرى اكىم ىسقاق, پرەزيدەنت ورتالىعىنىڭ جەتەكشى عىلىمي قىزمەتكەرى اقبوتا حاميت, «قارا شاڭىراق» قب باسشىسى تۇرار شاكەن, «قازاق انالارى – داستۇرگە جول» رەسپۋبليكالىق قوعامدىق بىرلەستىگىنىڭ توراعاسى, اكتريسا اينۇر جۇگىنىس, ايتىسكەر اقىن ازامات مالجانباي قازىلىق ەتتى.
سونىمەن تارتىستى وتكەن سايىستىڭ باس جۇلدەسىن مەكەباي وتباسى جەڭىپ السا, ءبىرىنشى ورىن مۇقاجان وتباسىنا بۇيىردى. ەكىنشى ورىندى سەمبەك وتباسى السا, ءۇشىنشى ورىندى ساۋحان مەن حىزايحان وتباسى يەلەندى. ال ارنايى اتالىم بويىنشا «ونەگەلى وتباسى» – قاليت وتباسىنا, «داستۇرگە بەرىك وتباسى» – پىرىمقۇل وتباسىنا جانە «كورەرمەن كوزايىمى» – مۇقان وتباسىنا تابىستالدى.
