گازي ۋنيۆەرسيتەتى – 1926 جىلى نەگىزى قالانعان جوعارى وقۋ ورنى. تۇركيادا عىلىم مەن ءبىلىم بەرۋدىڭ ىرگەلى ورتالىعى رەتىندە قۇرىلعان العاشقى وقۋ ورىندارىنىڭ ءبىرى. مۇندا گۋمانيتارلىق, جاراتىلىستانۋ عىلىمدارى, مەديتسينا جانە تاعى باسقا باعىتتار بويىنشا بىلىكتى ماماندار دايارلانادى. ال وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتى 1937 جىلى ەلىمىزدىڭ وڭتۇستىك وڭىرىندە بوي كوتەرگەن جوعارى ءبىلىم مەن عىلىمنىڭ قارا شاڭىراعى. بۇگىندە ۋنيۆەرسيتەت ءبىلىم سالاسىنىڭ ۇزدىك ماماندارىن وقىتادى.
ەكى ۋنيۆەرسيتەت اراسىنداعى ءوزارا ىنتىماقتاستىق 2021 جىلى 13 قازاندا باستاۋ العان. گازي ۋنيۆەرسيتەتىنىڭ رەكتورى, پروفەسسور مۇسا يىلدىزدىڭ وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنە رەسمي ساپارى بارىسىندا ءوزارا ىنتىماقتاستىق تۋرالى, «Erasmus» باعدارلاماسى بويىنشا ءوزارا سەرىكتەستىك تۋرالى ينستيتۋتارالىق كەلىسىمشارتقا قول قويعان. سونىڭ ناتيجەسىندە جوعارى ءبىلىم مەن عىلىم سالاسىنداعى بىرقاتار باستاماعا جول اشىلدى. بيىل ءو.جانىبەكوۆ ۋنيۆەرسيتەتىنىڭ 10 ستۋدەنتى اكادەميالىق ۇتقىرلىق باعدارلاماسى اياسىندا ءبىلىم الۋعا گازي ۋنيۆەرسيتەتىنە جىبەرىلىپ, ءبىر سەمەستر بويى ءبىلىم الىپ, تاجىريبە الماسىپ كەلدى. سونداي-اق 2 دوكتورانت گازي ۋنيۆەرسيتەتىندە بىلىكتى عالىمداردىڭ جەتەكشىلىگىمەن عىلىمي تاعىلىمدامادان ءوتتى.
بىلتىر مامىر ايىندا ءو.جانىبەكوۆ ۋنيۆەرسيتەتى رەكتورى گازي ۋنيۆەرسيتەتىنە رەسمي ساپارمەن باردى. سونىڭ بارىسىندا ادىستەمەلىك, عىلىمي قىزمەت, ماگيستراتۋرا, دوكتورانتۋرا سەكىلدى ءبىلىم بەرۋ باعدارلامالارى اياسىندا ىنتىماقتاستىق تۋرالى قوسىمشا كەلىسىمگە قول قويىلدى. بيىل ءو.جانىبەكوۆ ۋنيۆەرسيتەتىنىڭ تاعى 10 ستۋدەنتى اكادەميالىق ۇتقىرلىق باعدارلاماسى اياسىندا گازي ۋنيۆەرسيتەتىندە ءبىلىم السا, 6 دوكتورانت عىلىمي تاعىلىمدامادان ءوتىپ قايتتى. سونىمەن بىرگە گازي ۋنيۆەرسيتەتىنىڭ پروفەسسورى يۋجەل گەليشلي ەلىمىزدىڭ عىلىم جانە جوعارى ءبىلىم مينيسترلىگىنىڭ «شەتەلدىك عالىمداردى وقىتۋشىلىق قىزمەتكە تارتۋ» باعدارلاماسى اياسىندا ءو.جانىبەكوۆ ۋنيۆەرسيتەتىندە ءبىلىم الۋشىلارعا ءدارىس وقىپ, ءبىر اي بويى پروفەسسور-وقىتۋشىلارمەن تاجىريبە الماستى.
شىمكەنت
