ەرتە كوكتەمنەن باستالعان نوسەر جاۋىن ءبىرشاما قولبايلاۋ بولىپ, بەينەت شەككەنىمەن, دالا ەرلەرى تابيعات سىنىنا مويىعان جوق. كۇزگى ەگىن وراعى كەزىندە دە ىلعال مول ءتۇستى. ايتسە دە, ەل ىرىسىن ەسەلەۋگە دەن قويعان ديقاندار كۇننىڭ ءاربىر اشىق ءساتىن ۇتىمدى پايدالانىپ, قاجىرلى ەڭبەك ەتتى. سول ەڭبەكتىڭ ارقاسىندا وبلىس بويىنشا گەكتار بەرەكەسى 14 تسەنتنەردەن اينالدى. ناتيجەسىندە, 6,6 ملن توننا التىن استىق باستىرىلدى. بيىلعىداي مول تابىسقا ديقاندار تاۋەلسىزدىك العان جىلداردان باستاپ ەسەپتەسەك, ەكىنشى رەت قول جەتكىزىپ وتىر. ەگىنشىلىك مادەنيەتىن جەتىلدىرۋدىڭ ارقاسىندا ءدال وسىنداي كول-كوسىر ءونىم 2011 جىلى بولعان ەكەن.
شەشۋشى شاقتا دالاداعى ەڭبەك تىنىسى جوعارى ءونىمدى تەحنيكاعا تىكەلەي بايلانىستى ەكەنى بەلگىلى. مەملەكەت قولداۋىنىڭ ارقاسىندا اۋىل شارۋاشىلىعى تەحنيكالارى پاركىن جىل سايىن مۇمكىندىگىنشە جاڭارتىپ كەلە جاتقان ءوڭىر ديقاندارى كۇزگى دالا جۇمىستارىنا 9 مىڭعا جۋىق تەحنيكا پايدالاندى. ونىڭ ىشىندە ونىمدىلىگى جوعارى استىق كومبايندارى, اۋقىمى كەڭ جاتكالار مەن جۇك كولىكتەرى بار. جاڭا ەگىننىڭ ءونىمىن قابىلداپ, ساقتاۋعا 66 ليتسەنزيالانعان استىق قابىلداۋ كاسىپورنى اتسالىستى. اۋىل شارۋاشىلىعى قۇرىلىمدارىندا 1,5 مىڭنان استام استىق قويماسى بار.
«ديقانداردىڭ ەڭبەگى ەرەسەن. ولار بار جان-تانىمەن ەڭبەك ەتتى, – دەپ اتاپ ءوتتى وبلىس اكىمى مارات احمەتجانوۆ شورتاندىداعى ا.باراەۆ اتىنداعى اۋىل شارۋاشىلىعى عىلىمي-وندىرىستىك ورتالىعىندا ءوڭىردىڭ جەتەكشى ۇجىمدارىنىڭ قاتىسۋىمەن وتكەن كەڭەستە. – جەردە وسكەن ءدان سول جەرگە توگىلگەن قاراپايىم ەڭبەككەرلەردىڭ ماڭداي تەرى».
اقمولا وبلىسى
