كوللاجدى جاساعان – قونىسباي شەجىمباي, «EQ»
ورتتەن وپات بولعانداردىڭ ۇشەۋى بالا. سونىڭ ىشىندە ەسىل اۋدانىنداعى يلينكا اۋىلىندا ورتەنىپ كەتكەن ەكى بالانىڭ قايعىسى جاقىندارىنا اۋىر ءتيدى. ۇيدە جالعىز قالعان توعىز جانە ءۇش جاستاعى بالا جانىپ جاتقان پەشتىڭ اۋزى اشىلىپ كەتكەن شالادان تۇتانعان ورتتەن تۇنشىعىپ ولگەن. كۇندىزگى ساعات 10-دا باستالعان ءورت ەكى ساعاتتىڭ ىشىندە سوندىرىلگەنىمەن, بالالاردىڭ ءومىرىن قيىپ كەتتى.
ءتىلسىز جاۋعا قۇرىق بەرەتىن سەبەپتىڭ ءبىرى – الكوگولدىك ىشىمدىك. ورتتەن قازا بولعانداردىڭ التاۋى – الكوگولدىك ىشىمدىكتىڭ كەسىرىنەن ماس كۇيىندە ۇيىقتاپ قالعاندار. سولتۇستىك قازاقستان وبلىستىق تج دەپارتامەنتى باستىعىنىڭ ورىنباسارى دميتري راستيحين: ء«ورتتىڭ نەگىزگى بولىگى جەكەمەنشىك سەكتورلاردىڭ ۇيلەرىنەن شىعادى. توعىز ايداعى بارلىق ءورتتىڭ 74 پايىزى, ياعني 226-سى سولاردىڭ ۇلەسىندە. 47 ءورت اۆتوجولدارداعى اپاتتاردىڭ كەسىرىنەن بولدى», دەيدى. ءورتتىڭ تاعى ءبىر سەبەبى – ەلەكتر جابدىقتارىنىڭ دۇرىس ورناتىلماۋى. سونداي-اق دۇرىس پايدالانىلىپ, ۋاقتىلى جوندەۋ جاسالماسا, وت جاعىلاتىن پەشتەردىڭ دە قاۋپى زور.
قازىر وت جاعۋ ماۋسىمى باستالدى. جۋىردا عانا پەتروپاۆلدىڭ زايتسەۆ كوشەسىندەگى قاتار سالىنعان 84 شارشى مەترلىك ەكى ءۇي جانىپ, پاتەردە تۇراتىن ءۇش ادام ورتەنىپ كەتتى. بىرەۋى 2021 جىلى تۋعان بوبەك. تج ساراپشىلارى ءورت تۇرعىنداردىڭ ىشىمدىك ءىشىپ, ۇيىقتاپ قالعاندىعىنان شىققان دەگەن قورىتىندىعا كەلدى. مۇنداعى ورتتە ءبىر ادامدى تج قىزمەتكەرلەرى قۇتقارعان. قازىر ءۇي يەسى ج.لىسەنكونىڭ ۇستىنەن پەشتى دۇرىس سالماي, پاتەرشىلەرگە جالعا بەرگەنىنە قاتىستى قىلمىستىق ءىس قوزعالعان.
تاعى ءبىر ءورت «راكەتا» ساياجاي بىرلەستىگىنەن شىقتى. ساياجايدىڭ يەسى, 1953 جىلى تۋعان ادام ورتتە قالىپ, جانىپ كەتتى. ءۇي يەسى ماس كۇيىندە, قولىنداعى سوندىرىلمەگەن تەمەكىسىمەن ۇيىقتاپ قالعان.
ءورت سوندىرۋشىلەر قار كەتىپ, دالا قۇرعاعان ءساۋىر ايىنىڭ باسىنان باستالعان جەتى ايدى ء«ورت قاۋپى مول كەزەڭ» دەپ اتايدى. ويتكەنى جاۋىن از بولسا, قۇرعاعان ءشوپ پەن بىلتىرعى قاۋ وتقا تەز تۇتانادى. لاقتىرىپ جىبەرگەن تەمەكى تۇقىلىنان دا ءورت كەتۋى مۇمكىن. بيىل دا وسىنداي 63 ءورت شىعىپ, 7,1 گەكتار جەردى كۇيدىرگەن. دەگەنمەن مۇنداي ءورتتىڭ سانى بىلتىرعىدان ەكى ەسە از. سونداي-اق ءۇيىلىپ تۇرعان شارۋالاردىڭ ءشوبى مەن سابانىنان دا ءورت شىعادى. بيىل وسىنداي 18 ءورت بولىپتى, بىراق بىلتىرعىمەن سالىستىرعاندا بۇل دا ازىراق. ءورت سوندىرۋشىلەر دالالى جەرلەرگە ءجيى شىعىپ, باقىلاۋدى جۇيەلى جۇرگىزىپ تۇرادى. رەيدتەردىڭ بارىسىندا 148 ادامعا اكىمشىلىك جازا بەلگىلەنگەن. ال باق ارقىلى ءورت قاۋىپسىزدىگىن ساقتاۋ تۋرالى 1197 رەت جاريالانىم جاسالعان.
سولتۇستىك قازاقستان وبلىسى
