ەڭسەلى دە ادەمى عيمارات ىشىندە ونەر ۇيىرمەلەرىنە ارنالعان كەڭ دە جارىق بىرنەشە كابينەت جاساقتالعان. زاماناۋي باسقارۋ ستۋدياسى, گريم بولمەلەر, ايشىقتى ساحنا, 180 ورىندىق اكت زالى, ءبىر سوزبەن, مادەنيەت ءۇيىنىڭ ماتەريالدىق-تەحنيكالىق بازاسى تولىق جابدىقتالعان. التى اي قىس بولاتىن ءوڭىردىڭ اۋا رايى ەسكەرىلىپ, 12 توننالىق سۇيىق وتىن ساقتايتىن بوشكەلەر ورناتىلىپ, سۋىق, ىستىق سۋ جۇيەلەرى ىسكە قوسىلعان.
مىڭنان استام تۇرعىنى بار قاراتوعان اۋىلدىق وكرۋگى – ءتۋريزمنىڭ قاينار كوزى, كۇرەجولى. قاتارلاسا قونىس تىككەن قاراتوعان مەن جامبىل اۋىلدارىنىڭ ورتاڭعى كوشەلەرىمەن اتاقتى اقكول, شوعانساي دەمالىس ورىندارىنا جاز ايلارىندا كۇنىگە جۇزدەگەن جولاۋشى-تۋريست اعىلىپ وتەدى. تابيعاتى تامىلجىپ تۇرعان اۋىل تۇرعىندارىنىڭ ءتۋريزمدى دامىتۋعا دەگەن ىنتا-ىقىلاستارى ارتا تۇسكەن. سونداي-اق وكرۋگ تۇرعىندارى حالىقتىق ونەردى اسپەتتەپ, ءورىسىن كەڭەيتۋگە بەلسەنە ارالاسىپ كەلەدى. بۇل اۋىلداردا دومبىرانىڭ قوس ىشەگىنەن كۇي توگىلدىرىپ, اۋەلەتە ءان سالاتىن ءانشى-تەرمەشىلەر, شەجىرەشىلەر كوپتەپ ءوسىپ كەلە جاتقانىن باققوجا مۇقاي اتىنداعى اۋداندىق مادەنيەت ءۇيىنىڭ ديرەكتورى مەدەت بايجۇما اسەرلى اڭگىمەلەدى.
«قاراتوعان مەن جامبىل اۋىلدارىندا بۇرىن-سوڭدى مادەنيەت ءۇيى بولماعان. سوعان قاراماستان, مۇنداعى تۇرعىندار مەن جاس بۋىن ونەردەن شەت قالعان ەمەس. اۋداندىق, وبلىستىق ونەر سايىستارىنا قاتىسىپ, جەڭىمپاز اتانعاندارى جەتىپ ارتىلادى. دارىندى جاستاردى ماماندار مەكتەپىشىلىك ۇيىرمەلەرگە قاتىستىرىپ, ونەرلەرىن ۇشتاپ كەلگەن ەدى. ەندى مىنە, دارىن يەلەرىنىڭ باسى قوسىلىپ, شىعارماشىلىقتارىن شىڭداۋعا قولايلى عيماراتتىڭ پايدالانۋعا بەرىلۋى – تىڭ جاڭالىق, زور قۋانىش بولىپ وتىر», – دەيدى مەدەت سەرىك ۇلى.
اسپانتاۋ ەلىنىڭ مەرەيىن تاسىتىپ, قۋانىشىن ەسەلەگەن مەرەيلى سالتاناتقا رايىمبەك اۋدانىنىڭ اكىمى بەرىك دۇيسەنباەۆ, ونەر مايتالماندارى مەن اۋىل تۇرعىندارى قاتىستى. مەرەكەلىك كوڭىل كۇي سىيلاعان رۋحاني شارا اۋداندىق «اقتولقىن» حالىقتىق-فولكلورلىق ءانسامبلىنىڭ كوڭىل تەربەگەن كۇي-شاشۋىمەن باستالدى.
«Amanat» پارتياسىنىڭ سايلاۋالدى باعدارلاماسى اياسىندا ەلىمىزدىڭ ءاربىر وڭىرىندە, سونىڭ ىشىندە رايىمبەك اۋدانىندا كوپتەگەن الەۋمەتتىك نىسانداردىڭ قۇرىلىسى ءجۇرىپ جاتىر. اۋدانىمىز 2018 جىلى ءوز الدىنا جەكە شاڭىراق كوتەرگەلى بەرى مادەنيەت سالاسىندا كوپتەگەن وزگەرىستەر بولدى. مەملەكەتتىڭ قولداۋىمەن اۋداننىڭ ءار تۇكپىرىندە جاڭا مادەنيەت عيماراتتارى اشىلدى. بۇل نىسان دا اۋىلىمىزداعى مادەني-رۋحاني قۇندىلىقتار جۇيەسىن جاڭا دەڭگەيگە كوتەرۋگە مۇمكىندىك بەرەتىنىنە سەنىم مول. وسى يگى ىسكە قاتىسقان قۇرىلىسشىلارعا, مادەنيەت سالاسىنىڭ قىزمەتكەرلەرىنە, اۋىلىمىزدىڭ وركەندەۋىنە ءوز ۇلەسىن قوسقان ءاربىر ازاماتقا العىسىمدى بىلدىرەمىن», – دەدى اۋدان اكىمى ب.دۇيسەنباەۆ قۇتتىقتاۋ سوزىندە.
2019 جىلى اۋداندىق مادەنيەت ۇيىنە قۇنى 25 ملن تەڭگە تۇراتىن جىلجىمالى ساحنا ساتىپ الىندى, 2021 جىلى قاقپاق اۋىلىنداعى مادەنيەت ءۇيى كۇردەلى جوندەۋدەن ءوتتى. ال بىلتىرعى جىلى سۇمدە اۋىلىنداعى مادەنيەت ءۇيى پايدالانۋعا بەرىلدى.
«ۇلتتىق قۇندىلىقتارىمىز, ونىڭ ىشىندە سپورت پەن مادەنيەتتىڭ ارقاسىندا كوك تۋىمىز, ەلىمىز بەن جەرىمىز تورتكۇل دۇنيەگە تانىلىپ وتىر. جامبىل – شاعىن عانا قۇت قونعان اۋىل. بۇل جەردە بەردىبەك سوقپاقباەۆ, مۇقاعالي ماقاتاەۆ, ساعاتحان اشىمباەۆ سىندى اقىن-جازۋشىلار, قايراتكەرلەر دۇنيەگە كەلگەن. اۋىل تۇرعىندارىنىڭ ۇيىمشىلدىعىندا شەك جوق. مەكتەبى جاڭاردى, كوشەسى اسفالتتالىپ, جىلدان-جىلعا كوركەيىپ كەلەدى. بۇگىنگى مادەنيەت ءۇيىنىڭ اشىلۋى جاستاردىڭ تۇراقتاۋىنا, ەڭبەك ەتۋىنە, ونەرىن ورىستەتۋگە سەپتىگىن تيگىزەرى ءسوزسىز», – دەيدى قازاقستاننىڭ ەڭبەك سىڭىرگەن قايراتكەرى, اكتەر باۋىرجان قاپتاعاەۆ.
مادەنيەت ءۇيى عيماراتىنىڭ قۇرىلىس جۇمىستارىن سادۋاقاس مۇتاليەۆ باسقاراتىن «الماتى-Construction.بم» جشس ساپالى جۇرگىزىپ, ۋاقىتىندا تاپسىردى.
الماتى وبلىسى
