«بۇل جىل بىزگە ايرىقشا ماڭىزدى بولدى. بيىلعى جىلدىڭ العاشقى توعىز ايىندا وبلىسقا 615 ميلليارد تەڭگە ينۆەستيتسيا تارتىلىپ, وتكەن جىلمەن سالىستىرعاندا 32,8 پايىزعا ءوستى. ونەركاسىپ ءوندىرىسىنىڭ كولەمى 1,4 تريلليون تەڭگەگە جەتسە, اۋىل شارۋاشىلىعى ونىمدەرى 480,6 ميلليارد تەڭگەگە جەتىپ, 1,9 پايىزعا ءوستى. سونىمەن قاتار جالپى كولەمى 777,1 مىڭ شارشى مەتر جاڭا تۇرعىن ءۇي پايدالانۋعا بەرىلدى, قۇرىلىس جۇمىستارىنىڭ قۇنى 243,8 ميلليارد تەڭگەگە تەڭ بولدى. جىل باسىنان بەرى 45 مىڭنان استام جاڭا جۇمىس ورنى اشىلدى, بۇل – تۇرعىنداردىڭ ءال-اۋقاتىن ارتتىرۋدىڭ ماڭىزدى كورسەتكىشى. ءبىز دۇرىس باعىتتا كەلە جاتىرمىز, بىرلەسە وتىرىپ بۇدان دا ۇلكەن جەتىستىكتەرگە قول جەتكىزەمىز», – دەدى الماتى وبلىسىنىڭ اكىمى مارات سۇلتانعازيەۆ.
سالتاناتتى ءىس-شارادا وبلىستىڭ دامۋىنا ۇلەس قوسقان 30-دان استام ازامات مەملەكەتتىك ناگرادالارمەن ماراپاتتالدى. ولاردىڭ قاتارىندا ءتۇرلى سالا وكىلدەرى بار.
مەرەكە اياسىندا اشىلعان نىساندار ءوڭىر تۇرعىندارىنىڭ ءومىر ساپاسىن ارتتىرۋعا باعىتتالعان. اتاپ ايتار بولساق, ەڭبەكشىقازاق اۋدانى اششىساي اۋىلىندا كوپتەن كۇتكەن 150 ورىندىق زاماناۋي سپورت كەشەنىنىڭ اشىلۋ سالتاناتى ءوتتى. بۇل وقيعا – جەرگىلىكتى ينفراقۇرىلىمدى دامىتۋداعى ەلەۋلى قادام, اۋىل تۇرعىندارىنىڭ سپورتپەن شۇعىلدانۋىنا, دەنساۋلىعىن نىعايتۋعا جاڭا مۇمكىندىك اشادى.
«مەملەكەت باسشىسى قاسىم-جومارت توقاەۆ «سپورتپەن شۇعىلدانۋ كەرەك. اسىرەسە جاستارىمىزدىڭ دەنى ساۋ, مىقتى ازامات بولىپ ءوسۋى قاجەت. سەبەبى قازاقستاننىڭ بولاشاعى – جاستاردىڭ قولىندا. جاستاردىڭ دەنى ساۋ بولسا, مەملەكەت تە قۋاتتى بولادى», – دەپ اتاپ ءوتتى. ءبىزدىڭ مىندەتىمىز – وسكەلەڭ ۇرپاقتىڭ, اسىرەسە اۋىل جاستارىنىڭ بويىنداعى كۇش-قۋاتىن دۇرىس باعىتتاۋ, سپورتپەن شۇعىلدانۋعا ءتيىستى جاعداي جاساۋ. جاڭا سپورت كەشەنىندە حالقىمىزدى الەمگە تانىتار اتاقتى چەمپيوندار شىعۋىنا تىلەكتەسپىن. بۇل عيمارات سانالى ۇرپاق تاربيەلەپ, سالاماتتى ۇلت قالىپتاستىراتىن ورتالىققا اينالاتىنى ءسوزسىز. تاۋەلسىز ەلىمىزدىڭ كوك تۋىن بيىكتە ۇستار ۇلاندارىمىز كوپ بولسىن», – دەدى ءىس-شاراعا قاتىسقان الماتى وبلىسى اكىمىنىڭ ورىنباسارى نۇرجان قۇدايبەرگەنوۆ.
سپورت كەشەنى الماتى وبلىسى قۇرىلىس باسقارماسىنىڭ تاپسىرىسىمەن سالىندى, ال باس مەردىگەر – «سمۋ شىعىس» جشس. كەشەننىڭ قۇرىلىسى بىلتىرعى جىلى باستالىپ, ءبىر جارىم جىل ىشىندە سپورتتىق شارالاردى ۇيىمداستىرۋعا قويىلاتىن بارلىق تالاپقا ساي زاماناۋي نىسانعا اينالدى. سپورت كەشەنىنىڭ جالپى اۋدانى 1538,6 شارشى مەتر, ونىڭ ىشىندە بوكس, كۇرەس, ۆولەيبول, باسكەتبول, فۋتبول, گاندبول زالدارى بار. قۇرىلىستىڭ جالپى قۇنى – 907, 2 ملن تەڭگە.
رەسپۋبليكا كۇنى مەرەكەسى قارساڭىندا بالقاش اۋدانىنىڭ اقدالا اۋىلدىق وكرۋگىندە كۇنىنە 30 ادام قابىلدايتىن فەلدشەرلىك-اكۋشەرلىك پۋنكتتىڭ اشىلۋ سالتاناتى ءوتتى. فاپ قۇرىلىسى «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىنىڭ شەڭبەرىندە جۇزەگە استى. جەر تەلىمى – 0,3000 گا. سمەتالىق قۇنى 210 239,49 مىڭ تەڭگەنى قۇرايدى. مەردىگەر – «گرادسترويسەرۆيس» جشس.
ءىس-شاراعا قاتىسقان بالقاش اۋدانىنىڭ اكىمى ازات قۇتپانبەتوۆ تۇرعىنداردى مەرەيلى مەرەكەمەن قۇتتىقتاپ, جاڭا عيمارات ەل يگىلىگىنە قىزمەت ەتسىن دەپ تىلەدى.
حالىق تىعىز شوعىرلانعان قاراساي اۋدانى, قاسكەلەڭ قالاسىنداعى «قارلىعاش» تۇرعىن ءۇي كەشەنىندە الەۋمەتتىك وسال توپتار ساناتى بويىنشا ساتىپ الۋ قۇقىعىنسىز جىل باسىنان بەرى 30 ءۇيدىڭ كىلتى تابىس ەتىلگەن بولسا, مەرەكە قارساڭىندا ولاردىڭ قاتارى باسپاناعا مۇقتاج 10 وتباسىمەن تولىقتى. جاڭا پاتەردىڭ كىلتىن العان وتباسى مۇشەلەرى ۇلان-اسىر قۋانىشقا كەنەلدى.
مەگاپوليسپەن ىرگەلەس ىلە, تالعار اۋداندارىندا, الاتاۋ قالاسىندا بلوكتى-مودۋلدىك قازاندىقتار (بمق) ىسكە قوسىلىپ, كوپقاباتتى تۇرعىن ءۇي يەلەرىنىڭ كوپتەن كۇتكەن قۋانىشىن ەسەلەدى. جاڭا زاماناۋي تەحنولوگيالارمەن جابدىقتالعان قازاندىقتار ەكولوگيالىق تازا ءارى ەكونوميكالىق جاعىنان ءتيىمدى جىلۋ الۋدى قامتاماسىز ەتەدى. تۇرعىنداردىڭ ۇيلەرىندە جىلۋدىڭ جايلىلىعى مەن قاۋىپسىزدىگى ورنايدى, بۇل اسىرەسە ايازدى كۇندەردە ماڭىزدى. جاڭا قازاندىقتاردىڭ ىسكە قوسىلۋى, تۇرعىنداردىڭ تۇرمىس-تىرشىلىگىن جاقسارتۋعا باعىتتالعان. الداعى ۋاقىتتا اۆتوماتتاندىرىلعان جۇيەلەر مەن زاماناۋي تەحنولوگيالار قىزمەت كورسەتۋ مەرزىمىن ۇزارتۋعا, جوندەۋ جۇمىستارىن وڭتايلاندىرۋعا مۇمكىندىك بەرەدى.
سونىڭ ءبىرى ىلە اۋدانى بورالداي كەنتىندەگى «المات» قازاندىعى جاڭا كەزەڭنىڭ باستاۋى بولدى. مەرەكە قارساڭىندا قازاندىقتىڭ بارلىق قۇرىلىس جۇمىستارى اياقتالىپ, جەلىلەردى سىناۋ, ىسكە قوسۋ-جوندەۋ ۇدەرىستەرى ءساتتى جۇزەگە اسىرىلدى. سىناق كەزىندە قازاندىقتىڭ قۋاتتىلىعى, جىلۋ ءبولۋ تيىمدىلىگى مەن قاۋىپسىزدىگى تەكسەرىلدى. ناتيجەسىندە, بارلىعى جوسپارعا ساي ورىندالىپ, تۇرعىندارعا سەنىمدىلىك سىيلادى.
مەرەكە كۇنى كەڭدالا اۋىلىندا قۇنى 234,5 ميلليون تەڭگە بولاتىن بمق ىسكە قوسىلدى, ول بۇگىندە قالىپتى جۇمىس ىستەپ تۇر. ال الاتاۋ قالاسىنداعى «وفيتسەرلەر ءۇيى» قازاندىعى 13 كوپقاباتتى تۇرعىن ءۇيدى جىلۋمەن قامتاماسىز ەتىپ وتىر.
قازىرگى تاڭدا تالعار اۋدانى الاتاۋ اۋىلدىق وكرۋگىنە قاراستى ءالتىندان اۋىلىنداعى كوپپاتەرلى تۇرعىن ۇيلەردى جىلۋمەن قامتاماسىز ەتۋ ماقساتىندا گازبەن جۇمىس ىستەيتىن بمق قۇرىلىسى جالعاسىپ جاتىر. مۇندا قۇرىلىس-مونتاج جۇمىستارى 90 پايىزعا ورىندالىپ, جوبانىڭ جالپى قۇنى 106,6 ميلليون تەڭگەنى قۇرايدى. جوبا قاراشا ايىنىڭ باسىندا اياقتالادى دەپ جوسپارلانىپ وتىر.
بۇل باستامالار تۇرعىنداردى جىلۋمەن قامتاماسىز ەتىپ قانا قويماي, ءوڭىردىڭ ەكونوميكالىق دامۋىنا, جاڭا جۇمىس ورىندارىنىڭ اشىلۋىنا, ءومىر ءسۇرۋ ساپاسىنىڭ ارتۋىنا ىقپال ەتەدى. وبلىس تۇرعىندارى الداعى قىس ايلارىندا جىلۋمەن قالىپتى تۇردە قامتاماسىز ەتىلەتىن بولادى.
الماتى وبلىسى
