فوتو: ءىىم
مينيستر بۇل اقپاراتتى ءماجىلىس دەپۋتاتتارىنىڭ ساۋالىنا بەرگەن جاۋابىندا جاريالادى.
«تالعار قالاسىندا بولعان ش.بولاتتىڭ ولىمىنە قاتىستى الماتى وبلىسىنىڭ پوليتسيا دەپارتامەنتى قىلمىستىق كودەكسىنىڭ 99-بابىنىڭ 2-بولىگى (ادام ءولتىرۋ), 293-بابىنىڭ 3-بولىگى (بۇزاقىلىق), 115-بابى (قورقىتۋ), 432-بابى (قىلمىستى جاسىرىپ قالۋ) جانە 434-بابىمەن (قىلمىس تۋرالى حابارلاماۋ) قىلمىستىق ىستەر تىركەلىپ, تەرگەلىپ جاتىر», دەلىنگەن ءمينيستردىڭ جاۋابىندا.
ەرجان سادەنوۆ قىلمىستىق ءىستىڭ تەرگەلۋ بارىسىن ءوز باقىلاۋىنا العانىن ايتىپ, وقيعا ورنىندا مينيسترلىكتىڭ ورتالىق اپپاراتىنىڭ قىزمەتكەرلەرى دە جۇمىس ىستەپ جاتقانىنان حاباردار ەتتى.
«العاشقىدا وقيعانىڭ سەبەبىنە قاتىستى الەۋمەتتىك جەلىلەردە شىندىققا جاناسپايتىن ءارتۇرلى مالىمەتتەردىڭ تارالۋىنا بايلانىستى مينيسترلىك بەلگىلەنگەن تارتىپتە (قىلمىستىق پروتسەستىك كودەكسىنىڭ 201-بابىنىڭ تالاپتارىنا ساي) وسى جىلدىڭ 15 قازانىندا باق وكىلدەرىنىڭ قاتىسۋىمەن بريفينگ وتكىزىپ, كەيبىر تەرگەۋ مالىمەتتەرىن جاريا ەتتى. بريفينگ قوعامدى الاڭداتقان كەيبىر ماسەلەلەردى قامتىدى. قازىرگى تاندا قاساقانا كىسى ولتىرۋگە قاتىستى كۇدىكپەن 8 ادام جانە قىلمىس تۋرالى حابارلاماۋ بويىنشا 3 ادام سوتتىڭ سانكتسياسىمەن قاماۋعا الىندى.
تەرگەۋ امالدارى جالعاسىپ جاتىر, ونىڭ بارىسىندا وقيعا بولعان جەردە بولعان باسقا دا ادامداردىڭ قاتىستىلىعى تەكسەرىلىپ, ارەكەتتەرىنە قۇقىقتىق باعا بەرىلەدى», دەلىنگەن مينيستردىڭ جاۋابىندا.
