ساكەن تەاترى سەربتەرگە ايگىلى جازۋشى-دراماتۋرگ ورالحان بوكەيدىڭ «اتاۋكەرە» دراماسىن الىپ باردى. مۇنى ساحنالاعان رەجيسسەر – ايدىن سالبان.
Joakimfest XIX حالىقارالىق فەستيۆالدىڭ قازىلار القاسى تەاتر ارتىستەرىنىڭ شەبەرلىگىنە تامسانىپ, ونى جوعارى باعالاپ, «ۇزدىك اكتەرلىك انسامبل» دەگەن سىيلىقپەن ماراپاتتادى.
جان-جاقتان كەلگەن تەاترلاردىڭ ونەرىنە تەاتر سىنشىسى, تەاترتانۋشى, دراماتۋرگ الەكساندر ميلوساۆلەۆيچ (سەربيا), تەاتر رەجيسسەرى جانە بەلگرادتاعى ونەر ينستيتۋتىنىڭ دراما ونەرى فاكۋلتەتىنىڭ وقىتۋشىسى يۆانا ۆۋيچ (سەربيا), اكتەر جانە تەاترتانۋشى ميروليۋب مياتوۆيچ (بوسنيا, گەرتسوگوۆينا) سەكىلدى ونەر مايتالماندارى باعا بەردى.
– باسىندا جازۋشى-دراماتۋرگ ورالحان بوكەيدىڭ تەرەڭ فيلوسوفيالىق ويعا قۇرىلعان «اتاۋكەرە» شىعارماسى بويىنشا ينستسەنيروۆكاسىن رەجيسسەر ايدىن سالباننىڭ ءوزى جاساعان قويىلىمىمىزدى سەربتەر قالاي تۇسىنەر ەكەن دەگەن قوبالجۋدىڭ بولعانى راس. دەگەنمەن, ساحنانىڭ جوعارعى جاق ماڭدايىندا سەرب تىلىنە اۋدارىلعان تيتر قاتار بەرىلىپ وتىرعاندا, زالدا شىبىننىڭ ىزىڭى ەستىلەردەي تىنىشتىق ورنادى. ەكى ساعات 10 مينۋتقا جالعاسقان سپەكتاكل اياقتالعانشا, ەشكىم ورنىنان قوزعالعان جوق. قويىلىم بىتكەندە كورەرمەندەردىڭ كوڭىل كۇيى ولاردىڭ دۇركىرەتىپ قول سوققاندارىنان ايقىن اڭعارىلدى. ۇلتتىق مۋزىكامىز, اسىرەسە دومبىرانىڭ قوڭىر ءۇنى مەن ارتىستەرىمىزدىڭ ويىنى قاتتى ۇناعانىن ايتتى سەربيالىق كورەرمەندەر, – دەيدى تەاتردىڭ ءباسپاسوز قىزمەتكەرى ساعات باتىرحانقىزى.
بىلۋىمىزشە, بۇل تەاتر فەستيۆالىنىڭ سەربيادا بەدەلى زور. ونىڭ نەگىزى سوناۋ XIX عاسىردىڭ ەكىنشى شيرەگىندە قالانعان. سەربياعا تەاتر اكەلگەن يواكيم ۆۋيچتىڭ اتىمەن اتالعان. فەستيۆال باستاۋ العالى بەرى كراگۋەۆاتس قالاسىنا الەمنىڭ 25 مەملەكەتىنەن تەاتر ۇجىمدارى كەلىپ, 150-گە جۋىق قويىلىم قويىپتى.
قاراعاندى وبلىسى
