اۋىلعا اۋىزسۋ جەتتى

300-گە جۋىق ادام تۇراتىن بۇل ەلدى مەكەننىڭ تۇرعىندارى 30 جىلدان بەرى اۋىزسۋدى اۋىل سىرتىنداعى ءبىر شا­قىرىم جەردە اعىپ جاتقان بۇلاقتان تاسىپ ءىشىپ كەلگەن ەدى. ەندى, مىنە, «قۋاتتى وڭىرلەر – ەل دامۋىنىڭ درايۆەرى» ۇلت­تىق جوباسىنىڭ شەڭبەرىندە ول بەينەتتەن قۇتىلىپ, ساپالى اۋىزسۋعا قول جەتكىزىپ وتىر.

سۋ قۇبىرىن سالۋ جۇمىستارى وتكەن جىلى باستالىپ, ايتۋلى مەرەكە قار­ساڭىندا جۇمىس تولىعىمەن اياقتال­دى. سول كەزەڭ ارالىعىندا جاۋاپتى ماماندار ۇڭعىمالاردى بۇرعىلاپ, قاجەتتى جابدىقتاردى ورناتىپ, كوشەلەرگە سۋ قۇبىرلارىن تارتقان.

– وتكەن جىلى «وڭىرلەردى دامىتۋ» باعدارلاماسى ارقىلى قازىنا قارجىسىنان 676 ملن تەڭگە ءبولىنىپ, بۇگىندە ورتالىقتاندىرىلعان سۋ جۇيەسى ىسكە قوسىلدى. جەرگىلىكتى تۇرعىندارمەن جۇزدەسىپ, اۋىل حالقىن قۇتتىقتاپ, قۋا­نىشتارىمەن ءبولىسىپ قايتتىم. جال­پى اۋىل تۇرعىندارىن ساپالى اۋىزسۋمەن قامتاماسىز ەتۋ – باسىم مىندەتتەردىڭ ءبىرى. بۇقار جىراۋ اۋدانىندا بيىل تاعى ءۇش اۋىلدا جاڭا سۋ قۇبىرلارىن پايدالانۋعا بەرەمىز دەپ وتىرمىز. ولار: اقجار, ايۋلى, الا­باس. وسى جو­با­لار ىسكە اسىرىلعاننان كەيىن اۋدان تۇرعىندارىنىڭ 99 پايى­زى ورتا­لىقتاندىرىلعان سۋمەن قامتاماسىز ەتىلەدى. كەلەر جىلى بۇل كورسەتكىشتى 100 پايىزعا جەتكىزەمىز, – دەيدى بۇقار جىراۋ اۋدانىنىڭ اكىمى ەرلان قۇسايىن.

24 جاستاعى ارمان ءالىموۆ سۋ ماسەلەسى شەشىلمەگەندىكتەن, كوپشىلىك جۇرت اۋىل­دان قونىس اۋدارىپ كەتكەنىن ايتىپ, ەندى كوش كەرى بۇرىلا ما دەگەن ءۇمىتىن جاسىرمادى.

– وتكەن جىلى سۋ قۇبىرى سالىناتىنىن ايتقان كەزدە وعان ءبارىمىز كۇمانمەن قاراعانىمىز راس. بىراق ۋادە ەتىلگەندەي, ونىڭ قۇرىلىسى 2023 جىلدىڭ جازىندا قولعا الىنىپ, وسى مەرەكە الدىندا ءتامامدالىپ وتىر. اۋىزسۋدىڭ جوقتىعىنان اۋىلىمىزدان ءبىرتالاي ادام كوشىپ كەتتى. ەندى وسىدان كەيىن بۇل جەرگە جاڭادان قونىس اۋدارۋشىلار كەلىپ ورنالاسادى دەپ ويلايمىن, – دەيدى ول.

جاڭالىقتى قۋانا قابىلداعان تاعى ءبىر اۋىل تۇرعىنى جانات بالبەكوۆا:

– مەن استاحوۆكادا 50 جىلدان بەرى تۇرامىن. اۋىلدان جاستارىمىزدىڭ كوبىسى كوشىپ كەتكەن. ءبىز سياقتى زەينەتكەرلەرگە قاشىقتاعى بۇلاقتان سۋ اكەلۋ وڭاي ەمەس. اقىرى ارمانداعان سۋ قۇبىرى سالىنعانىنا قۋانىشتىمىن. كەلەسى كەزەكتە اۋىلىمىزدىڭ كوشە جولدارى اسفالتتالادى دەپ جوسپارلانعان ەكەن. ءسويتىپ, جاعدايىمىز بىرتىندەپ جاقسارا بەرەتىنىنە سەنەمىز, – دەدى.

قاراعاندى وبلىسى,

بۇقار جىراۋ اۋدانى,

استاحوۆكا اۋىلى