مەملەكەتتىك سىيلىقتى ادىلەتتى قازاقستاننىڭ كوشباسشىسىنىڭ قولىنان العانىما دا بەك قۋانىشتىمىن. الدا ەلىمىزدىڭ ادامزاتتىق وركەنيەتكە ءوزىنىڭ ۇلتتىق بولمىسىمەن, سالت-داستۇرىمەن, رۋحاني جيھازىمەن جەتكەنىن قالايمىن. سول كۇنى حالقىممەن بىرگە شىنداپ قۋاناتىن بولۋىم كەرەك. اتا-بابالارىمىز قيىن دا كۇردەلى جولدى ءجۇرىپ ءوتتى. تاۋەلسىزدىكتىڭ 30 جىلدىعى بىزگە دە وڭاي بولمادى. قاتەلىكتەن ساباق الا ءجۇرىپ جەتىلىپ كەلەمىز. تاعدىر اياماعان ۇلت پەرزەنتىنىڭ قۋانىشى تولىق قۋانىش بولا الا ما؟ مەملەكەتتىك سىيلىق شاراسىنىڭ مىنبەرىندە تۇرىپ بۇگىنگى جاميعاتقا ەندىگى جاڭا ۋاقىت, جاڭا قازاق قوعامى اداسپاسا ەكەن دەپ تىلەدىم. جاڭارعان قازاقتىڭ تەگەۋرىندى ۇرپاعى باقىت بەسىگىندە جاساسا ەكەن!
مەملەكەتتىك سىيلىقتى العان ەڭبەگىمدى جالعاستىرىپ, ەندى «ادامنىڭ بار قىزىعى بالا دەگەن» اتتى بالالار ادەبيەتىنىڭ بارى مەن ءنارىن, كەڭشىلىگى مەن جوعىن تۇگەندەيتىن تاعى ءبىر كىتاپتى اياقتاۋعا جاقىندادىم.
بۇگىنگى رەسپۋبليكا كۇنىنە كەلسەك, بۇل كۇن – ءبىزدىڭ بالادان داناعا دەيىن, بۇقارا حالىقتان بيلىك باسىنداعىلارعا دەيىن تەرەڭ تانىم تۇرعىسىنان ءتۇسىنىپ, جان-جۇرەگىمىزبەن قابىلداپ, شىن قۋاناتىن ناعىز ۇلتتىق مەرەكە. ۇلتىمىزدىڭ, مەملەكەتىمىزدىڭ تاعدىرى شەشىلگەن شۋاقتى كۇن. اسپاندى بۇلت تورلاپ, جەر-كوكتى تۇمان السا, كەيىن اسپان اشىلعاندا ادام بالاسىنىڭ دا كوڭىل كۇيى كوتەرىلىپ, ءبىر جاساپ قالماي ما؟ ودان دا زور قۋانىش – وسى كۇن. سوندىقتان رەسپۋبليكا كۇنى قازىر دە, بولاشاقتا دا تاۋەلسىزدىگىمىزدىڭ ايبارى بولادى دەپ سانايمىن.
قۇلبەك ەرگوبەك,
اباي اتىنداعى مەملەكەتتىك سىيلىقتىڭ لاۋرەاتى, ادەبيەت سىنشىسى
