بيىل 178 كاسىپكەر قايتارىمسىز گرانتقا يە بولدى. ولارعا جالپى 262,5 ملن تەڭگە قارجى بولىنگەن. ءار كاسىپكەرگە ەڭ كوبى 1 1480 000 تەڭگە قارجى تاعايىندالعان. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى اسەم جۇنىسپەكوۆا بۇل جولعى گرانتتىڭ كوبىن كوپبالالى وتباسىنداعىلار الدى دەيدى.
– «باستاۋ بيزنەستىڭ» گرانتى كاسىبىن جاڭا باستاعان كاسىپكەرلەرگە وزدەرىنىڭ بيزنەس-الەۋەتىن اشىپ, ءوندىرىسىن جولعا قويىپ, ونى دامىتىپ, سول ارقىلى ءوزىن تۇراقتى تابىسپەن, وزگەنى جۇمىسپەن قامتۋعا مۇمكىندىك بەرىپ وتىر. بيىل 106 وتباسى گرانتقا قول جەتكىزىپ, وزدەرىنىڭ ءتۇرلى كاسىبىن جولعا قويدى. قالعان 44-ءى – مۇمكىندىگى شەكتەۋلى جانعا, 18-ءى – ەرەكشە بالالاردى ءوسىرىپ وتىرعان اتا-اناعا, 6-اۋى – اسىراۋشىسىنان ايىرىلعانعا, 4-ەۋى اتاۋلى الەۋمەتتىك كومەك تاعايىندالعاندارعا ۇلەستىرىلدى, – دەيدى اسەم ايتجانقىزى.
گرانتتى يەلەنگەندەر جيھاز تسەحى, ەتنوكيىم تىگىن ورتالىعى, ءسان سالونى, كونديتەر تسەحى, ىستالعان ەت, تەز تاماقتانۋ ورنى, اۆتوبولشەك دۇكەنى, سابىن تسەحى, مال بورداقىلاۋ الاڭى, مەتالل قۇراستىرۋ تسەحى, مەديتسينا كابينەتى, ماسساج كابينەتى, سپورت كلۋبى, اياقكيىم شەبەرحاناسى, جىلىجاي, ناۋبايحانا, شاشتاراز, ءسۇت ونىمدەرى, شۇجىق, ۆەتەريناريالىق ءدارىحانا, قۇس شارۋاشىلىعى, پلاستيكالىق تەرەزە مەن ەسىك ءوندىرىسى, مونشا سەكىلدى حالىق سۇرانىسىنا يە كاسىپتەرىن دوڭگەلەتەدى.
بۇقار جىراۋ اۋدانى, دوسكەي اۋىلىنىڭ تۇرعىنى دانيار تاتىعۇلوۆقا «باستاۋ بيزنەستەن» وقىعان سەرتيفيكاتى سەرپىن بەرىپ, «2024-2029 جىلدارعا ارنالعان ەڭبەك نارىعىن دامىتۋ تۇجىرىمداماسى» شەڭبەرىندە مەملەكەتتىك گرانت العان. بىردەن ويلاستىرىپ جۇرگەن قۇس فەرماسىن قولعا الدى. گرانت قاراجاتىنا شارۋاسىنا قاجەتتى سىيىمدىلىعى 2 000 جۇمىرتقا بولاتىن ينكۋباتور, ۆاكۋمدىق تىعىزداعىش, ەتتى ىستاپ, پىسىرەتىن پەش, مۇزداتقىش ساتىپ العان. كاسىپكەر قازىر بودەنە ءوسىرىپ جاتىر.
– وتباسىممەن اقىلداسا كەلە ەتى ۇنەمى ءوتىمدى قۇس فەرماسىن اشايىق دەپ شەشتىك. مەملەكەتتىڭ قولداۋى ويىمىزدىڭ جۇزەگە اسۋىنا كادىمگىدەي سەپ بولدى. ءسويتىپ ءتارتىپ-تالابىنا ساي قۇجاتتاردى وتكىزىپ, كونكۋرسقا قاتىسىپ, 1 476 800 تەڭگە الدىق. بودەنەنىڭ ەتىن تۇزداپ, ىستاپ, ساۋدالاپ كورەمىز. شاعىن كاسىبىمىز دوڭگەلەپ جاتسا, اۋىلداعى ءبىر-ەكى ادامعا جۇمىس بەرەمىز. اۋىلداعى ەستىپ-بىلگەندەر قازىردىڭ وزىندە ءونىمدى سۇراپ جاتىر. سوعان قاراعاندا كاسىبىمىز وركەن جايادى دەپ وتىرمىز, – دەيدى كوپبالالى اكە.
ۇشتوبە اۋىلىنداعى ءۇش بالانىڭ اناسى اسەمگۇل ەلۋباەۆا دا گرانت يەگەرى اتانىپ, ىرىمشىكتىڭ ءتۇر-ءتۇرىن ازىرلەپ, قولىنان شىققان ءونىمىن ساۋدالاپ وتىر.
– وسىنداي گرانتقا قول جەتكىزۋ مۇمكىندىگى بارىن جاقىنىمنان ەستىپ, ارنايى كۋرستان ءبىلىم جەتىلدىردىم. 1 500 000 تەڭگە قاراجاتقا قاجەت جابدىقتاردى ساتىپ الدىم. تابيعي ونىمگە قاشاندا سۇرانىس بار. اۋىلدىڭ وزىندە جەدەل ءوتىپ كەتەدى. ىرىمشىكتى ازىرلەۋ تەحنولوگياسىن ەرتەدەن بىلەمىن. گرانتتىڭ ارقاسىندا كاسىبىم كەڭەيىپ, تاپسىرىسىم كوبەيدى, – دەيدى گرانت يەگەرى.
گۇلنۇر بالتاباەۆا گرانت ارقىلى شەلكوگرافيا ءادىسى جانە دتف پرينتەر كومەگىمەن ۇلتتىق ناقىشتى ازىرلەيتىن بيزنەس ورتالىعىنا وراسان پايدا اكەلدى. قولونەرشى دتف پرينتەردى باعدارلاماسىمەن بىرگە 700 مىڭ تەڭگەگە ساتىپ العان. ونىمەن قوسا, نوۋتبۋك, كوپفۋنكتسيونالدى تەرموپرەسسكە دە قول جەتكىزگەن.
– بۇگىنگى كۇنى «اسىل مۇرا» ونەر مەكتەبىندەگى «اسىل مۇرا» كۇيشىلەر ءانسامبلىنىڭ تاپسىرىسىن ورىنداۋ ۇستىندەمىز. جاقىندا تاشكەنتكە كونكۋرسقا بارادى. ونەرپاز بالالاردىڭ كيىمىنە قازاقى ناقىش سالىپ جاتىرمىز. تاپسىرىس كۇن وتكەن سايىن كوبەيىپ جاتىر, – دەيدى كاسىپكەر كەلىنشەك.
قاراعاندى وبلىسى
