بيىل مەملەكەت باسشىسى قاسىم-جومارت توقاەۆ جوشى ۇلىسىنىڭ 800 جىلدىعىن مەملەكەت كولەمىندە اتاپ ءوتۋ جونىندە تاپسىرما بەردى. بۇل باستاما قولداۋ تاۋىپ, 2024 جىلدىڭ 4 قازانىندا اتىراۋ وبلىسىنداعى تاريحي مەكەن, كونە قالا سارايشىقتا جوشى ۇلىسىنىڭ 800 جىلدىعىنا وراي وتاندىق, شەتەلدىك بەلگىلى عالىمداردىڭ جانە ەل زيالىلارىنىڭ قاتىسۋىمەن «سارايشىق جانە ەۋرازيانىڭ ورتاعاسىرلىق الەمى» رەسپۋبليكالىق عىلىمي-تاجىريبەلىك كونفەرەنتسياسى وتكەن بولاتىن.
بۇگىن سول شارانىڭ جالعاسى رەتىندە استانا قالاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا «جوشى ۇلىسى (التىن وردا) كەزەڭىنىڭ تاريحي-مادەني مۇراسى» جىلجىمالى كورمەسى اشىلدى.
«سارايشىق - مەملەكەتىمىزدىڭ قالىپتاسۋى مەن دامۋىندا ەرەكشە ورنى بار, ونىڭ العاشقى استانالارىنىڭ ءبىرى بولعان قالا. كورمەگە جوشى ۇلىسىنىڭ رۋحاني ورتالىعىنا اينالعان قاسيەتتى جەردەن 140 جادىگەر اكەلىنىپ وتىر. ۇلى جىبەك جولىندا ورنالاسقان سارايشىقتىڭ قىش بۇيىمدارى, ادەمى بوياۋلارمەن ەرەكشەلەنەتىن سىرلى ىدىستار, حورەزمدىك قۇمىرا, سەلادون كەسە (قىتاي فارفورى), البارەللو ء(دارى-دارمەك سالاتىن قۇتى), حIII-XIV عاسىرلاردا سارايشىق قالاسىنىڭ كوشەلەرىندە توسەلگەن تاستارى, سۋ, كارىز قۇبىرلارى, شىعىر قۇمىرالارى قويىلعان. سان عاسىر بۇرىن اقشا ورنىنا جۇرگەن جىلى تەڭىزدەردەن اكەلىنگەن كاۋري باقالشاقتارى مەن سارايشىقتىڭ مىس (پۇل) جانە كۇمىس (ديرحام) اقشالار توپتاماسى, زەرگەرلىك بۇيىمدار ورنەكتەرى, تابيعي تاستاردان جاسالعان مونشاقتار ۇسىنىلدى», دەيدى «حان وردالى – سارايشىق» مۋزەي-قورىعىنىڭ ديرەكتورى ابىلسەيت مۇحتار.
سونىمەن قاتار كورمەدە « ۇلىتاۋ» مەملەكەتتىك تاريحي-مادەني جانە تابيعي مۋزەي-قورىعى, قاراعاندى وبلىستىق تاريحي-ولكەتانۋ مۋزەيى, جەزقازعان قالاسىنداعى ساتباەۆ مۋزەيى, قولجازبالار جانە سيرەك كىتاپتار ۇلتتىق ورتالىعىنان جادىگەرلەر مەن تاريحي قولجازبالار قويىلدى.
جوشى ۇلىسىنىڭ استانالارىنىڭ ءبىرى بولعان سارايشىق قالاسىنىڭ تاريحىنان سىر شەرتەتىن كورمە 23 قازاننان 23 قاراشاعا دەيىن جالعاسادى.
