فوتو سەناتتىڭ ءباسپاسوز قىزمەتى
ماۋلەن اشىمباەۆ قورشاعان ورتانى قورعاۋ, ەكولوگيا ماسەلەلەرى بۇكىل الەمدى الاڭداتىپ وتىرعانىنا جانە بۇل ورتالىق ازيا ەلدەرى ءۇشىن ەڭ وزەكتى پروبلەمالاردىڭ ءبىرى ەكەنىنە نازار اۋدارىپ, وسى باعىتتا پارلامەنتتىك ديپلوماتيانىڭ ماڭىزدى ءرول اتقاراتىنىنا توقتالدى.
«قازىر الەم جاھاندىق جىلىنۋمەن بەتپە-بەت كەلىپ وتىر. بۇل ۇدەرىس ءبىزدىڭ وڭىردە دە ايقىن سەزىلۋدە. قۋاڭشىلىق, سۋ تاسقىندارى, ارال ماسەلەسى سياقتى سىن-قاتەرلەر سونىڭ سالدارى ەكەنى انىق. مۇزدىقتاردىڭ دا ەرۋى الاڭداۋشىلىق تۋدىرادى. بۇل – سىرداريا, ءامۋداريا سياقتى ءىرى وزەن سۋلارىنىڭ ازايۋىنا اسەر ەتەتىن وزەكتى جايت. وسى ماسەلەدە ءوڭىر ەلدەرى ورتاق ساياسات ۇستانىپ, بىرلەسىپ جۇمىس ىستەۋدى كوزدەپ وتىر. بۇل رەتتە پارلامەنتتىك ديپلوماتيانىڭ دا الەۋەتىن كەڭىرەك پايدالانعان ابزال», دەدى پالاتا سپيكەرى.
سونىمەن قاتار ماۋلەن اشىمباەۆ قازىرگى تاڭدا قازاقستان مەن وزبەكستان اراسىنداعى پارلامەنتارالىق كوميسسيا ءتيىمدى جۇمىس ىستەپ كەلە جاتقانىن ايتتى. كوميسسيانىڭ جۇمىسى اياسىندا سەناتورلار ارالعا ارنايى بارىپ, وزبەك ارىپتەستەرىمەن كەزدەسىپ, بىرقاتار تۇيتكىلدەردى شەشۋگە, ەكى ەلدىڭ اتالعان سالاداعى قارىم-قاتىناسىن نىعايتۋعا قاتىستى پروبلەمالاردى تالقىلادى. سونداي-اق سەنات توراعاسى ەكولوگيا ماسەلەسى بويىنشا ءوڭىر ەلدەرىنىڭ حالىقارالىق ۇيىمدار اياسىندا ورتاق ۇستانىمدارى بار ەكەنىن ايتىپ, مۇنداي بىرلەسكەن جۇمىستىڭ بەرەرى مول ەكەنىن تىلگە تيەك ەتتى.
«حالىقارالىق كەلىسىمدەر, جالپى وداقتاستىق تۋرالى شارت اياسىندا پارلامەنتتىك ديپلوماتيانىڭ الەۋەتىن ەسكەرگەن ءجون. قازىر ورتالىق ازيادا پارلامەنتتەردىڭ ءرولى كۇشەيىپ كەلەدى. ءبىزدىڭ سەنات پەن وزبەكستاننىڭ سەناتى وڭىرلەرمەن تىكەلەي جۇمىس ىستەيدى. ال, ارال ماسەلەسى, ەڭ الدىمەن, وڭىرگە تىكەلەي قاتىستى. سوندىقتان وسى باعىتتاعى جۇمىستا پارلامەنتارالىق كوميسسيانىڭ, دەپۋتاتتاردىڭ مۇمكىندىكتەرىن جان-جاقتى پايدالانعان ورىندى. بۇل ورتالىق ازياداعى جانە شەكارالىق اۋماقتارداعى ماسەلەردىڭ وڭ شەشىلۋىنە ءوز سەپتىگىن تيگىزەدى دەپ سەنەمىز», دەدى ماۋلەن اشىمباەۆ.
ايتا كەتەيىك, بۇگىن پالاتا وتىرىسىندا سەناتورلار «قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى ەكولوگيا جانە قورشاعان ورتانى قورعاۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭدى قاراپ, ماقۇلدادى.
