جىل باسىنداعى II كورپوراتيۆتىك قايىرىمدىلىق فورۋمىندا «سامۇرىق-قازىنا» اق باسقارما توراعاسى نۇرلان جاقىپوۆ 2024 جىلعى نەگىزگى باعىتتاردىڭ قاتارىندا مەملەكەت باسشىسىنىڭ تاپسىرماسىنا وراي, كرەاتيۆتى يندۋستريانى, قازىرگى زامانعى قازاق ونەرىن وركەندەتۋدى ەرەكشە نۇسقاعانى بەلگىلى. وسى ايتىلعانداردىڭ ءبارىن قورىتا كەلە, ۇلىق مەرەكە قارساڭىندا, قور تاراپىنان بىرىڭعاي قايىرىمدىلىق وپەراتورى – «Samruk-Kazyna Trust» قورى ارقىلى بىرقاتار ءىرى دە ىلكىمدى, يگىلىكتى ءىس ومىرگە جول تارتتى.
اقتوبەدە جاڭا وڭالتۋ ورتالىعى اشىلدى
22 قازاندا جىل سايىن 125 ەرەكشە بالانى اقىسىز قابىلدايتىن مەكەمەنى «سامۇرىق-قازىنا» قورى «قازاقستان حالقىنا» قق, «قامقورلىق» كق, وبلىس اكىمدىگىمەن بىرلەسە ىسكە قوستى.
ءاۋتيزمى, باسقا دا وي-سانا كىناراتتارى بار بالالارعا ارنالعان, زامان تالابىنا ساي وزىق قۇرال-جابدىق قويىلعان كۇندىزگى بولۋ ورتالىعى اقتوبە قالاسى ساڭكىباي باتىر, 171ب مەكەنجايىندا ورنالاسقان.
ورتالىق 1,5 جاستان 18 جاسقا دەيىنگى بالالاردى قابىلداپ, دامىتۋ شارالارى مەن وڭالتۋدى عانا ەمەس, سونىمەن قاتار ماڭىزدى الەۋمەتتىك, كۇندەلىكتى بەيىمدەلۋ داعدىلارىن قامتاماسىز ەتەدى. مۇندا ولارعا تۇرمىستىق ادەتتەر: توسەكتىك ورىن, داستارقان جيناۋ, كيىم ۇتىكتەۋ, ىدىس جۋ, سونىمەن قاتار تاماق دايىنداۋ ۇيرەتىلەدى. بۇل بالالاردىڭ جان-جاقتى جەتىلۋىنە, دەربەس ارەكەت ەتە بىلۋىنە كومەكتەسەدى.
«ەرەكشە بالا اسىراپ وتىرعان ءار اتا-اناعا بۇل ورتالىقتاردىڭ ماڭىزى زور. ءبىزدىڭ ماقساتىمىز – ەلدىڭ بارلىق ءوڭىرىن قامتي وتىرىپ, ەرەكشە بالالاردى جاقىن جەردەن قولجەتىمدى ءارى ءتيىمدى وڭالتۋمەن قامتاماسىز ەتۋ», دەدى اشىلۋ راسىمىندە «سامۇرىق-قازىنا» اق كورپوراتيۆتىك باسقارۋ, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ.
جەتكىنشەكتەرگە اعاش ۇستاسى, قىش, تىگىن شەبەرحانالارىندا دارىستەر قاراستىرىلىپ, وسى ارقىلى ەرەكشە وسكەلەڭ ۇرپاق وكىلدەرى بولاشاقتا ءوزىن اسىراۋعا كومەكتەسەتىن قولونەر تۇرلەرىن مەڭگەرەدى. سونداي-اق ورتالىقتا ادامدارمەن كوز ءتۇيىستىرىپ, تىكەلەي ارالاسۋدان قاشقاقتايتىن بالالارعا روبوت تەراپياسى قولدانىلادى. بۇدان تىس, بالالاردىڭ دامۋىنا عانا ەمەس, الەۋمەتتەنۋىنە دە سەپتىگىن تيگىزەتىن, ولاردىڭ قوعاممەن ەتەنە ارالاسىپ, تولىققاندى ءومىر سۇرۋىنە كومەكتەسەتىن لەگو-تەراپيا, ارت-تەراپيا, مۋزىكالىق تەراپيا ساباقتارى ۇسىنىلادى.
قور دەمەۋشىلىگىمەن ينكليۋزيۆتى قوعامدى دامىتۋعا باعىتتالعان «قامقورلىق» باستاماسى اياسىندا سوڭعى ءۇش جىلدا 43 ورتالىق قولدانىسقا بەرىلسە, ونىڭ ىشىندە قازىرگى زامانعى قۇرال-جابدىقپەن جابدىقتالعان جەتىنشى اۋتيزم ورتالىعى شىمكەنت قالاسى مەن پاۆلودار, جەتىسۋ, شىعىس قازاقستان, جامبىل وبلىستارىنان سوڭ بيىل قوستاناي وڭىرىندە, اقتوبە قالاسىندا اشىلدى.
اقتوبەدە ءتيىستى ورتالىقتان بولەك, «سامۇرىق-قازىنا» اق كومپانيالارى توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» قورىنىڭ قارجىلاندىرۋىمەن وڭالتۋ جانە ەرتە ارالاسۋ ورتالىقتارى جۇمىس ىستەپ, ارقايسىسى جىلىنا 600 بالادان قامتىپ وتىر. ولاردا بۇگىندە 1994 بالا قابىلدانىپ, 153-ءى ءتاي-ءتاي باسىپ, العاشقى قادامىن جاساسا, ال 331-ءى ءبىرىنشى ءسوزىن ايتتى.
كرەاتيۆتى حاب قازاق ونەرىن وركەندەتەدى
23 قازان كۇنى پەتروپاۆل قالاسىندا Qyzyljar Creative Center اشىلدى. زاماناۋي قازاق ونەرىن دامىتۋدى ماقسات ەتكەن شىعارماشىلىق كەڭىستىكتى «Samruk-Kazyna Trust» قورى ارقىلى «سامۇرىق-قازىنا» كومپانيالار توبى مەن سولتۇستىك قازاقستان وبلىسى اكىمدىگى بىرلەسە ومىرگە اكەلدى.
«كرەاتيۆتى يندۋستريا قوردىڭ الەۋمەتتىك سالاداعى باسىم باعىتتارىنىڭ ءبىرى. ويتكەنى ونەرلى جاستاردى IT مەن قازىرگى زامانعى ديزاين سياقتى وزەكتى ماسەلەلەردە دەمەپ جىبەرۋ ماڭىزدى ەكەنىن تۇسىنەمىز. بۇل باعىتتا قور تاراپىنان اۋقىمدى شارالار اتقارىلىپ جاتىر. قىسقا ۋاقىت ارالىعىندا مىنە, وسىمەن ەكىنشى كرەاتيۆتى حابتى اشىپ وتىرمىز. قىزىلجار كرەاتيۆتى حابى دا قوعامنىڭ مادەني ساناسىن جاڭعىرتىپ, جەرگىلىكتى تالانتتاردى قولداۋدا تاپتىرماس الاڭعا اينالادى دەپ سەنەمىن. وسىعان دەيىنگى قازاق تەاترىنىڭ عيماراتى الداعى ۋاقىتتا دا قايناعان شىعارماشىلىق ورداسى بولا بەرۋىنە تىلەكتەسپىز», دەدى ءوز سوزىندە «Samruk-Kazyna Trust» كق باس ديرەكتورى الفيا اديەۆا.
سولتۇستىكقازاقستاندىق 2 شارشى مەتر اۋماقتاعى جاڭا كرەاتيۆتى حابتاعى 9 ايماقتىڭ ارقايسىسىنىڭ اتاۋى مەن بەلگىلەنگەن مەجەسى بار: Oyu lab (ديزاين, 3د-مودەلدەۋ), Santaram (گرافيكا ديزاينى), Sandyq (كيىم ديزاينى), Digital nomads (سمم, ماركەتينگ), Art galam (كورمەلەر اۋماعى), Qazyna (كىتاپحانا), Orta (كوۆوركينگ), Qainar (حورەوگرافيا), Koncerttik zal (شارالار). ءتيىستى ايماقتار 35 جاسقا دەيىنگى ىزدەنىمپاز ءارى ارمانشىل جاس بۋىننىڭ ۋاقىتىن بوس وتكىزبەي, ءبىلىمىن بايىتىپ, داعدىلارىن جەتىلدىرۋگە, ءوز يدەيالارىن ىسكە اسىرۋلارىنا جول اشپاق. وسىلايشا, «Samruk-Kazyna Trust» سوڭعى 5 جىلدا سولتۇستىك قازاقستان وبلىسىندا 600 ملن تەڭگەگە 5 ءىرى الەۋمەتتىك جوبانى جۇزەگە اسىرىپ وتىر.
العاش رەت قور دەمەۋشىلىگىمەن اقتوبە وبلىستىق س.جيەنباەۆ اتىنداعى جاسوسپىرىمدەر كىتاپحاناسىندا بارلىق جاستاعى ازاماتتارعا ارنالعان ءبىرىنشى زاماناۋي كەڭىستىك قۇرىلسا, تاعى ءبىر كرەاتيۆتى يندۋستريا نىسانى قور قولداۋىمەن كەلەسى جىلى باتىس قازاقستان وبلىسى ورال قالاسىندا قولدانىسقا بەرىلەدى.
ۇلتتىق وڭالتۋ ورتالىعىنا 73 ملن تەڭگەنىڭ تسيفرلى قۇرال-جابدىعى تابىستالدى
قور ەلورداداعى ۇلتتىق بالالاردى وڭالتۋ ورتالىعىن قۇنى 73 ملن تەڭگەدەن استام D-WALL روبوتتاندىرىلعان زەرتحاناسىمەن قامتاماسىز ەتتى. مۇنداي جابدىقتاۋ ارقىلى ورتالىقتاعى وڭالتۋ قىزمەتى جەتىلە تۇسپەك.
جاڭا تەحنيكالىق قوندىرعى سال اۋرۋى مەن اۋتيزم سىرقاتىنا ۇشىراعان بالالار مەن جاسوسپىرىمدەرگە جاسالاتىن ەمنىڭ ساپاسىن جاقسارتادى.
«سامۇرىق-قازىنا» كومپانيالار توبىنىڭ بىرىڭعاي قايىرىمدىلىق وپەراتورى ءوز قىزمەتىندە مەديتسينا سالاسىن قولداۋعا, اسىرەسە بالالارعا قامقورلىققا ەرەكشە كوڭىل بولەدى. وعان دالەل, وسى جىلى جۇزەگە اسىرىلعان جوبالاردىڭ ىشىندە دەنساۋلىق ساقتاۋ ماسەلەلەرىنە 1 ملرد تەڭگەدەن استام قارجى باعىتتالدى.
ماسەلەن, قور قولداۋىمەن, جىل سايىن «سالاماتتى قازاقستان» پويىزى اياسىندا شالعايداعى اۋىلداردا 100 مىڭ ادامعا تەگىن مەديتسينالىق كومەك كورسەتىپ كەلەدى. باتىس قازاقستان مەديتسينالىق ۋنيۆەرسيتەتىندە جاڭا ونكولوگيالىق وڭالتۋ ءبولىمى اشىلىپ, استاناداعى ن.باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىنا 400 ملن تەڭگەگە وزىق ۇلگىلى قۇرال-جابدىقتار تاپسىرىلدى.
اۋىلدىق جەرلەردە 4 ينكليۋزيا كابينەتى ەسىگىن ايقارا اشتى
ينكليۋزيا كەڭىستىكتەرى قور قولداۋىمەن ورازاق, قىزىلجار, قارامەندى, ى.التىنسارين اۋىلدارىندا قولدانىسقا بەرىلسە, تاعى بىرەۋىن بيىلعى جەلتوقسان ايىندا كوكشەتاۋ قالاسىندا پايدالانۋعا تاپسىرۋ جوسپارلانىپ وتىر.
جالپى سوماسى 87,3 ملن تەڭگەنى قۇرايتىن 5 ينكليۋزيا كابينەتىنىڭ جۇمىسى ناتيجەسىندە كەم دەگەندە مەكتەپكە, بالاباقشاعا باراتىن, ۇيدەن وقىپ كەلگەن مۇگەدەكتىگى بار 120 بالا قامتىلادى. وسىلايشا, اۋىلداعى ەرەكشە بالالاردىڭ باسقا قاتارلاستارىمەن تەڭ ساپالى ءبىلىم الۋىنا جاعداي جاسالادى.
تەڭ قوعامدى دامىتۋ ماقساتىندا جوبا بارىسىندا ينكليۋزيا ماماندارى ءتورت ايماقتان تۇراتىن بولمەلەردە ساباقتان تىس كەزدە جەكە جانە توپتىق شارالار وتكىزەدى. ءار بالاعا دەربەس باعدارلاما قاراستىرىلىپ, مۇعالىمدەرگە ءبىر جىل بويى ادىستەمەلىك قولداۋ جاسالماق.
ءار ءدارىسحانا تەز توزبايتىن, بۇلدىرۋگە ءتوزىمدى پارتالارمەن, ۇستەلدەرمەن, ورىندىقتارمەن, باسقا دا ارنايى جيھازبەن, بورمەن, ماركەرمەن جازۋعا بولاتىن, ينتەراكتيۆتى تاقتالارمەن جابدىقتالعان. سونىمەن قاتار ءتيىستى تەحنيكا مەن باعدارلامالىق قامتاماسىز ەتۋ, كومپيۋتەرلەر, سكانەرلەر جانە ديداكتيكالىق ماتەريالدار, ويىن جيناقتارى, دەنە بەلسەندىلىگىن شيراتۋعا ارنالعان ماتەريالدار تاعى باسقا زاتتار بار.
ەسكە سالا كەتسەك, بۇعان دەيىن قور ءوزىنىڭ بىرىڭعاي قايىرىمدىلىق وپەراتورى – «Samruk-Kazyna Trust» كق ارقىلى استانا قالاسىنىڭ 5 مەكتەبىندە ينكليۋزيانى قولداۋ كابينەتتەرىنىڭ تۇساۋىن كەسىپ, جىل اياعىنا دەيىن ولاردىڭ سانىن 10-عا جەتكىزۋدى كوزدەپ وتىر. اقمولا وبلىسىندا «Samruk-Kazyna Trust» كەيىنگى 4 جىلدا 862,6 ملن تەڭگەنىڭ 11 الەۋمەتتىك جوباسىن جۇزەگە اسىردى.
الدابەرگەن كەمپىرباي
