قازاقستان 2025 جىلى ساياحاتتاۋعا ارنالعان ۇزدىك ەلدەردىڭ تىزىمىنە ەندى

جۋرنال ساراپشىلارى جىل سايىن ساياحاتشىلار, قىزمەتكەرلەر, اۆتورلار جانە تۋريزم سالاسىنداعى باسقا دا مامانداردىڭ ۇسىنىستارىنا نەگىزدەلگەن باعىتتاردى مۇقيات تالداپ, ۇزدىكتەردى انىقتايدى. 2025 جىلعى تاڭداۋ قازاقستانعا ءتۇسىپ وتىر. ءبىزدىڭ ەلىمىز ءوزىنىڭ باي تاريحىمەن, الۋان ءتۇرلى تابيعاتىمەن جانە قايتالانباس مادەني مۇراسىمەن شەتەلدىك سالا ماماندارىن قىزىقتىرعان.

«قازاقستاننىڭ Lonely Planet سەكىلدى الەمدەگى بەدەلدى باسىلىمنىڭ Best in Travel 2025 رەيتينگىندە بولۋى – ەلىمىزدىڭ تۋريزمىنە الەم بويىنشا قىزىعۋشىلىقتىڭ ارتىپ كەلە جاتقانىن كورسەتەدى. ەلدىڭ شىنايى مادەنيەتى مەن الۋان ءتۇرلى تابيعاتىن حالىقارالىق دەڭگەيدە ىلگەرىلەتۋدى جالعاستىرا وتىرىپ, ءبىز تۇراقتى تۋريزم پرينتسيپتەرىن ۇستانامىز», دەدى قر تۋريزم جانە سپورت ۆيتسە-ءمينيسترى ەرجان ەركىنباەۆ.

الەمنىڭ بەدەلدى باسىلىمىنىڭ تىزىمىنە ەنگەن قازاقستان ەجەلگى ءداستۇر مەن زاماناۋي ءومىر توعىسقان ەل رەتىندە سيپاتتالعان.

«Best in Travel 2025 — بۇل ءبىزدىڭ جىل سايىنعى الەمگە ارنالعان جۇرەكجاردى حاتىمىزدىڭ سوڭعى نۇسقاسى. ءبىز وسى باسىلىمعا ەنگەن باعىتتاردى ماقتان تۇتامىز جانە ۇسىنىستارىمىزدىڭ نەگىزىندە جاتقان تەرەڭ تۇسىنىك پەن جەرگىلىكتى بىلىممەن بولىسۋگە قۋانىشتىمىز. ءبىزدىڭ ءتىزىم كەلەسى جىلى ساياحاتشىلارعا جاڭا باعىتتاردى اشۋعا شابىتتاندىرادى دەپ سەنەمىز», دەدى Lonely Planet-ءتىڭ كونتەنت بويىنشا اعا ۆيتسە-پرەزيدەنتى جانە اتقارۋشى رەداكتورى نيتيا چامبەرس.

Lonely Planet باسىلىمىنىڭ ماقالاسىندا: «قازاقستان – تەك ساياحاتتايتىن ەل ەمەس, اشىلۋى ءتيىس الەم, ساپارعا شىعۋدى قاجەت ەتەتىن جانە تاريحتىڭ ءبىر بولشەگى بولاتىن ەل. ەجەلگى جىبەك جولىنىڭ سىبدىرى قازاقستان قالالارىن قورشاپ تۇرعان شەكسىز دالادا دا ەستىلەدى», دەپ جازىلعان.

ايتا كەتەرلىگى, قازاقستاننىڭ تۋريستىك الەۋەتىن تەك Lonely Planet جۋرنالى عانا ەمەس, الەمگە تانىمال تۋريستىك باسىلىمدار دا جوعارى باعالاعان. ماسەلەن, Conde Nast Traveler مەن Wanderlust باسىلىمدارى قازاقستاندى 2024 جىلعى الەمدەگى ەڭ ۇزدىك ساياحات باعىتتارىنىڭ تىزىمىنە ەنگىزگەن. الماتى قالاسى The New York Times رەيتينگى بويىنشا 52 ۇزدىك تۋريستىك باعىتتىڭ قاتارىنا كىردى.