بىراق... عيمارات قۇرىلىسى تولىق اياقتالماعاندىقتان, گيمنازيا وقۋشىلارى ءبىر جىل بويى قالانىڭ ءار مەكتەپتەرىندە شاشىراپ ءجۇرىپ وقيدى.
بۇل گيمنازيا تاريحىنا قاتىستى ءبىر ۇزىك سىر بولسا, ەكىنشىسى ونىڭ قالايشا ساكەن سەيفۋللين ەسىمىن يەلەنگەنى تۋرالى.
1994 جىلى قازان ايىنىڭ باس كەزىندە بۇرىنعى جەزقازعان وبلىسىندا ساكەن سەيفۋلليننىڭ ەسكەرتكىشى اشىلىپ, رەسپۋبليكالىق اقىندار ءمۇشايراسى وتكىزىلدى. جاڭاارقا اۋدانىندا دۇرىلدەگەن توي ءوتتى. سول تۇستا مەن قالالىق گازەتتىڭ باسشىسى ەدىم. قالا تويعا دايىندالىپ جاتتى. بىراق تويعا بارعاندا اۋىز تولتىرىپ ايتاتىن ەرەكشەلەۋ ەشتەڭە بايقالا قويمادى. ءبىر كۇنى «جاڭادان اشىلىپ جاتقان گيمنازياعا نەگە ساكەن ەسىمىن بەرمەسكە؟» دەگەن وي سارت ەتە قالدى. قالالىق «قازاق ءتىلى» قوعامىنىڭ توراعاسى قويشىبەك توقتامىس ۇلى دەگەن اعامىز اكىم-قارالارعا ءسوزى ءوتىمدى ەدى. ول كىسى مەنىڭ ويىمدى قۇپ كوردى.
تاۋەلسىزدىكتى ەندى عانا الىپ, ءالى كوپ نارسە جۇيەلەنە قويماعان كەز عوي, كوشە, مەكتەپ اتاۋلارىن اكىمدەر وزدەرىنىڭ شەشىمى ارقىلى بەرۋگە قۇقىلى ەدى. قالا اكىمى سەرالى دوسماعانبەتوۆ دەگەن ازامات بولاتىن.
ءسويتىپ, ساكەننىڭ تويىنا دەيىن اكىمنىڭ شەشىمى شىعىپ, ونى قالالىق گازەتتىڭ ءبىرىنشى بەتىنە جاريالاپ تا جىبەردىك. بۇل اقىننىڭ 100 جىلدىعىنا وراي تاماشا تارتۋ-تارالعى بولدى.
كەيىن گيمنازيا باسشىسى ءاليا كامەشقىزىمەن سويلەسىپ, بىلمەيتىن كىسى سەكىلدەنىپ, «گيمنازياعا ساكەن سەيفۋللين ەسىمى قالاي بەرىلىپ ەدى؟» دەپ سۇرادىم.
ء«وز باسىم گيمنازياعا شوقان ءۋاليحانوۆتىڭ ەسىمىن قولايلى كورىپ جۇرگەن ەدىم. بىراق قويشىبەك اعامىز قالا باسشىلىعىنا ساكەن اعامىزدىڭ ەسىمىن ۇسىنىپتى, سوسىن ارينە, ءبىز دە ماقۇلداپ, سولاي اتالۋىن دۇرىس كوردىك», دەدى ءا.سادەنوۆا.
مىنە, سودان بەرى دە 30 جىل زۋ ەتىپ وتە شىعىپتى. ساكەن ەسىمىن قالاي يەلەنگەنىن سول گيمنازيا ۇستازدارىنىڭ دا, وقۋشىلارىنىڭ دا, بىلايعى كوپشىلىكتىڭ دە بىلە جۇرگەنى دۇرىس-اۋ.
ۇلىتاۋ وبلىسى,
ساتباەۆ قالاسى
