بەس كارتاسى بار ادامدار باقىلانادى

شارت قاتاڭداپ, شەكتەۋ كۇشەيەدى

قارجى نارىعىن رەتتەۋ جانە دامىتۋ اگەنتتىگى بانكتەردى (قنردا) احقو-دا تىركەلمەگەن تسيفر­لىق بيرجالارعا تولەم جاساۋ­دان, اقشا اۋدارۋدان اۆتومات­تى تۇردە باس تارتۋعا مىندەت­تەپ وتىر. وسى تالاپتىڭ ناتيجە­سىن­دە ەسىرتكى مەن تسيفرلىق اكتيۆ­تەر­دىڭ زاڭسىز اينالىمىنا, بانك ونىمدەرىن پايدالانۋ تاۋەكە­لىنە توسقاۋىل قويىلماق. ءسويتىپ, بانكتەر ەسىرتكىنىڭ زاڭسىز ءون­دىرىلۋى, اينالىمى مەن ءترانزيتى, احقو قاتىسۋشىسى ەمەس قول­دانۋ­شىلار, ەلەكتروندى كازينو مەن ينتەرنەت-كازينو پايداسىنا تولەم جۇرگىزۋدەن باس تارتادى. سونداي-اق 21 جاسقا تولماعان جەكە تۇلعالاردىڭ ويىن بيزنەسىن ۇيىمداستىرۋشىلارعا پايدا اكەلەتىن اقشا اۋدارىمدارىن جۇرگىزۋدەن اۋلاق بولادى.

تسيفرلىق اكتيۆتەر بيرجا­لارى­نىڭ پايداسىنا تولەم جۇر­گىزۋدىڭ دە جولى كەسىلەدى. سونىمەن قاتار ەكىنشى دەڭگەيلى بانكتەر ءبىر كليەنتكە 5 كارتادان ارتىق كارتامەن تولەم وپەراتسيا­­لارىن جۇرگىزۋگە تىيىم سالماق. لي­ميت ايىنا 100 مىڭ تەڭگەگە دەيىن 3 تو­لەم­نەن اسپاۋى كەرەك.

– بانك ەلىمىزدىڭ بەيرەزيدەنت­تەرى – اتالعان بانك شىعارعان تولەم كارتوچكالارىن ۇستاۋشى­لار, ەسىرتكىلەردىڭ زاڭسىز ءون­دىرىلۋى, اينالىمى, ءترانزيتى نەگىزىندە كىرىستى جىلىس­تاتۋ, تەر­روريزمدى قارجىلان­دىرۋ تاۋە­كەلى جوعارى ەلدەردىڭ رەزي­دەنت­تەرىنە كىرەتىن كليەنتتەردىڭ, ەلدە بولۋ نەگىزدىلىگىن راستايتىن قۇ­جات­تاردى (ەڭبەك شارتىن, وقۋ شارتىن, ەلدە شەتەل ازاماتىنىڭ تۇرۋ ىقتيارحاتى مەن باسقا دا قۇجاتتاردى) تەكسەرەدى, – دەپ جازىلعان قۇجاتتا.

دەمەك تەكسەرىس بارىسىندا بەستەن كوپ تولەم كارتاسى بار كليەنتتەن قانداي دا ءبىر كۇدىكتى وپەراتسيالار انىقتالسا, بانك قاراجاتتىڭ شىعۋ كوزىنە تەكسەرىس جۇرگىزۋگە مىندەتتى. وعان قوسا, قىلمىستىق جولمەن الىنعان كىرىستەردى زاڭداستىرۋعا, تەررو­ريزمدى قارجىلاندىرۋعا قارسى ءىس-قيمىل تۋرالى زاڭنامانىڭ تالاپتارىندا بەلگىلەنگەن شارالاردى ۇستانۋى قاجەت. مۇندايدا كۇدىكتى وپەراتسيالار تۋرالى قارجىلىق مونيتورينگ جونىندەگى ۋاكىلەتتى ورگانعا اقپارات جىبەرىلەدى.

الاياقتار العان نەسيە كەشىرىلەدى

بيىل ەلىمىزدە فيشينگ شا­ب­ۋىل­دارىنىڭ سانى 7,5 ەسە ارت­قان. قانشا ادامدى وزدەرى را­سىم­دەگەن ونلاين نەسيە ورعا جىعىپ, نەسىبەسىنەن ايىردى. ەندى ولاي بولمايدى. ازاماتتار­دىڭ اتىنا الاياقتىق جولمەن راسىم­دەلگەن نەسيە ەسەپتەن شىعا­رىلادى. قنردا باسشىسى مادينا ابىلقاسىموۆانىڭ ايتۋىنشا, ەسەپتەن شىعارۋ تەك سوت شەشىمىمەن جۇزەگە اسىرىلادى.

– قازىر ءبىز الاياقتىق جولمەن راسىمدەلگەن نەسيەلەردى ەسەپتەن شىعارۋ ماسەلەسىن قاراستىرىپ جاتىرمىز. ازاماتتار ونلاين نەسيە راسىمدەۋگە «eGov» پورتالى ارقىلى تىيىم سالا الادى. بۇگىندە 700 مىڭعا جۋىق ازامات ەرىكتى تۇردە ونلاين نەسيە راسىمدەۋگە تىيىم سالدى. وسى تىيىمعا قارا­ماستان, ازاماتتاردىڭ اتىنا نەسيە راسىمدەلگەن بولسا, سوت شە­شىمىمەن مۇنداي نەسيەلەر مىن­دەتتى تۇردە ەسەپتەن شىعا­رى­لادى. الاياقتار راسىمدەگەن ونلاين-نەسيە­لەردى ەسەپتەن شىعارۋعا قا­تىستى كريتە­ري­لەردى كەڭەيتىپ, ازاماتتارى­مىزدىڭ قۇقىن قورعاۋ ماسەلەسىن پىسىقتاپ جاتىرمىز, – دەدى اگەنتتىك توراعاسى.

بيىل ماۋسىمنان باستاپ, بيومەتريالىق دەرەكتەر ۇسىنۋعا قاتىستى تالاپتار دا كۇشەيتىلگەن. سونىمەن قاتار ونلاين نەسيە بەرۋگە قاتىستى ەكى فاكتورلى اۋدەن­تيفيكاتسيا جۇرگىزىلىپ ءجۇر. الاياقتاردىڭ نەسيە راسىمدەۋى سوندا دا توقتار ەمەس. سول سەبەپتى اگەنتتىك الاياقتار راسىمدەيتىن ونلاين نەسيەلەرگە قاتىستى كريتەريلەردى بەكىتىپ جاتىر.