وسىدان ءۇش جىل بۇرىن قاراعاندى زاۋىتى «API Q1» تالاپتارىنا سايكەس كەلەتىن ساپا مەنەدجمەنتى جۇيەسىن ازىرلەۋدى باستاعان ەدى. API – «American Petroleum Institute», امەريكالىق مۇناي ينستيتۋتى دەگەندى بىلدىرەدى. بۇل – اقش-تاعى مۇناي-گاز سالاسىنا قاتىستى ماسەلەلەردى زەرتتەيتىن, رەتتەيتىن ەڭ ءىرى ۇكىمەتتىك ەمەس ۇيىم. سەرتيفيكات بارلىق سىناق پەن تەكسەرىستەن ءساتتى وتكەننەن كەيىن بەرىلدى.
«مaker» جشس باسقارما توراعاسى جانىبەك بايعابەلوۆ سەرتيفيكات الۋعا «NCOC» كومپانياسىنىڭ كومەگى كوپ بولدى دەيدى.
– ءبىر كەزدەرى مۇنداي سەرتيفيكاتتى يەلەنۋ مۇمكىن ەمەس سياقتى كورىنەتىن. «NCOC» كومپانياسىنىڭ ارقاسىندا قول جەتكىزدىك. قاراعاندى وبلىسى – بىرلەسكەن وندىرىسكە باسقا دا كاسىپورىنداردى تارتا الاتىن ۇلكەن ونەركاسىپتىك ايماق. ايماعىمىزدا ۇلكەن مۇمكىندىكتەر اشىلىپ جاتىر. ەلىمىز ساتىپ الاتىن مۇناي-گاز جابدىعىنىڭ كولەمى 1,4 ترلن تەڭگەگە باعالانادى. بۇل – ماتەريالدار مەن قوسالقى بولشەكتەر ءوندىرىسىن وقشاۋلاۋداعى وتە ۇلكەن ۇلەس, – دەدى جانىبەك بايعابەلوۆ.
وبلىس اكىمى ەرماعانبەت بولەكپاەۆ وڭىرىمىزدە مۇنداي الەمدىك سەرتيفيكاتتى يەلەنگەن ەكى ىرگەلى ءوندىرىس وشاعى بارىن ايتىپ, زاۋىت قىزمەتكەرلەرىن جاڭا جەتىستىكپەن قۇتتىقتادى.
– بۇل سەرتيفيكات ديپلوم ىسپەتتى. مۇندا زاۋىتتىڭ بارلىق قىزمەتكەرىنىڭ وراسان زور ەڭبەگى بار. قۇجات حالىقارالىق دەڭگەيگە شىعۋعا زور مۇمكىندىك بەرەدى. 100-دەن استام ەل ءارى سەرتيفيكاتىنىڭ تيىمدىلىگىن مويىندايدى. ءبىزدىڭ وبلىستا وسىنداي سەرتيفيكاتى بار ەكىنشى كاسىپورىن پايدا بولىپ وتىر. ونى ءبىرىنشى بولىپ تەمىرتاۋداعى «كازارماتۋرا» كومپانياسى العان ەدى, – دەدى ايماق باسشىسى ەرماعانبەت قابدۋلا ۇلى.
جاڭا سەرتيفيكات KLMZ-دە مۇناي-گاز جابدىقتارىنىڭ نومەنكلاتۋراسىن كەڭەيتۋگە سەرپىن بەرمەك. قاراعاندى زاۋىتىنىڭ باستى الەۋەتتى تاپسىرىس بەرۋشىلەرىنىڭ ءبىرى – «NCOC» كومپانياسى. وسىلايشا, كاسىپورىن قاشاعان كەن ورنىن يگەرىپ, ەلىمىزدەگى ەڭ ءىرى مۇناي كومپانيالارىنىڭ ۇشتىگىنە كىردى.
زاۋىت نەگىزىنەن تاۋ-كەن, مەتاللۋرگيا سالاسىنا قاجەتتى جابدىقتاردى وندىرەدى. كومىر تاسيتىن ۆاگونەتكالار, شاحتا تۇبىندەگى سۋدى سوراتىن ناسوس تۇرلەرىن, جۇزدەگەن توننا توپىراقتى ۇستاپ تۇراتىن انكەرلىك بەكىتپە, كەنىشتەردەگى اۋىر تەحنيكانىڭ بولشەكتەرى, زاۋلاعان پويىزداردىڭ تەجەگىشتەرى سىندى مىڭداعان بۇيىم جاسالادى. بارلىعى 12 مىڭ ءتۇرلى ءونىم بار. ءونىمى ىشكى نارىققا دا, شەتەلگە دە باعىتتالعان.
زاۋىت قاراماعىنا قاراعاندىدان تىس, بالقاش, جەزقازعان قالالارىندا كاسىپورىندار بەرىلگەن. ءۇش قالادا 2 مىڭعا جۋىق ادام ەڭبەك ەتەدى. مەتاللۋرگيا مەن تاۋ-كەن سالاسىنان بولەك, زاۋىت جاڭا باعىتتاردى دا يگەرۋگە كۇش سالىپ وتىر. كەيىنىرەك مۇناي-گاز سالاسىنا قىزىعۋشىلىعى ارتقان كومپانيا العاش «قازمۇنايگاز» ۇك» اق-نىڭ قۇنى 1,2 ملرد تەڭگەنى قۇرايتىن تاپسىرىسىن جەڭىپ العانى ءمالىم. ارينە, مۇنىڭ ءبارى جۇمىستى جۇيەلى ۇيىمداستىرىپ, ولاردى ىنتالاندىرىپ وتىرعان باسشىلىقتىڭ بىلىكتىلىگى دەر ەدىك.
«Maker» كاسىپورنىندا ەلىمىزدەگى سبب ستانوكتاردىڭ ەڭ اۋقىمدى پاركى بار. كاسىپورىن وزىق تەحنولوگيالاردى, قۇرالداردى, ۆيرتۋالدى ورتادا وڭدەۋدى تولىق مودەلدەي الاتىن دەڭگەيدە كومپيۋتەرلەنگەن. كونسترۋكتورلىق-تەحنولوگيالىق ونىمدەردى پايدالانىپ, مەحانيكالىق وڭدەۋدىڭ كەڭ اۋقىمىن قامتيتىن امبەباپ ۇلگىدەگى يمپورت الماستىراتىن ءىرى ماشينا جاسايدى.
– زاۋىت وڭدەۋدىڭ بارلىق كەزەڭدەرىندە «Renishaw» داتچيكتەرىن پايدالانىپ, ستانوكتا بولشەكتەردى ولشەپ, يمپورتتىق كەسكىش قۇرالدى قولدانا وتىرىپ, جوعارى جىلدامدىقتى, جوعارى دالدىكتى وڭدەۋدى قولدانادى. «Siemens NX», «Teamcenter» باعدارلامالىق ونىمدەرى بازاسىندا ءوندىرىستى كونسترۋكتورلىق جانە تەحنولوگيالىق دايىنداۋدىڭ بىرىڭعاي جۇيەسىن, قۇرال ۇزىندىعىن انىقتاۋ ماقساتىندا «Zollerd» ولشەۋ ماشيناسىن پايدالانادى. كاسىپورىندا مەتالدىڭ بارلىق ءتۇرى وڭدەلەدى. كوپشىلىككە «قدب-ليزينگ» باعدارلاماسىمەن ساتىپ الىنعان بىرەگەي ستانوكتار قىزىقتى بولدى. ءوڭىردىڭ باسقا دا ماشينا جاساۋشىلارىمەن بىرگە تيىمدىلىكتى ارتتىرىپ, ساپالى ءونىم شىعارامىز. كۇنى كەشە قول جەتكىزگەن سەرتيفيكات كاسىپورىن كەلەشەگىنىڭ كەمەلدىگىن راستايدى, – دەيدى ىرگەلى كاسىپورىن باسشىسى.
قاراعاندى وبلىسى
