ەل تاۋەلسىزدىگى جاريالاناتىن جىلى ءومىر ەسىگىن اشقان مەرۋەرت اسحانبەكقىزى جامبىل وبلىسىنىڭ قورداي اۋدانىنا قاراستى بەتقاينار اۋىلىندا مەكتەپ تابالدىرىعىن اتتايدى. شاعىن عانا اۋىلدا تۋىپ-وسكەن ونىڭ بويىندا تۋعان جەرگە دەگەن سۇيىسپەنشىلىك, وتانعا دەگەن ماحاببات ادال قىزمەت ەتۋدەن باستالاتىنى بالا كۇننەن باستاپ ساناسىنا قۇيىلادى. سەبەبى اكەسى ادال ەڭبەك ەتىپ, اۋىل شارۋاشىلىعىمەن اينالىسقان. اناسى اۋىلدىڭ اكىمشىلىگىندە زەينەت جاسىنا جەتكەندە تابان اۋدارماي قىزمەت ەتتى. وتباسىندا ەڭبەكتىڭ نانى ءتاتتى بولاتىنىن ءتۇسىنىپ وسكەن ول دا باستاۋىش سىنىپ پەداگوگيكاسى مەن پسيحولوگياسى ماماندىعىنا وقۋعا تۇسەدى.
«بالا كۇنىمدە اۋىرعان ادامدارعا كومەكتەسەتىن دارىگەر بولۋدى ارمانداۋشى ەدىم. بىراق ۇلكەندەردىڭ باعىت-باعدار بەرۋىمەن ءومىر جولىمدى ۇستازدىققا بۇردىم. ءسويتىپ مۇعالىم ماماندىعىن تاڭداپ, ءبىلىمدى ۇرپاق تاربيەلەۋ جولىندا ءتالىم الدىم. بىراق مەنىڭ ومىرلىك ماقساتىم سول, ءبىر ورىندا تۇرىپ قالعىم كەلمەيدى. جەتىستىكتەرگە جەتۋ جولىندا ۇنەمى ىلگەرىلەۋدى, العا جىلجۋدى قالايمىن. قوعامداعى ادىلدىكتىڭ ورناۋى مەن قۇقىق بۇزۋشىلاردىڭ جاۋاپكەرشىلىك ارقالاپ, ءتارتىپ ورناتۋعا تامشىداي ۇلەسىمدى تيگىزگىم كەلەتىنىن ءتۇسىندىم. سوندىقتان وسى سالاعا كەلدىم. اسكەرگە دەيىن اۋداندىق اكىمشىلىكتە دە قىزمەت ەتتىم», دەيدى ول.
ازاماتتىق ومىرگە قاراعاندا قىزىعى مەن شىجىعى كوپ, تەمىردەي تارتىپكە باعىتتالعان بۇل سالا بۇرىمدىنىڭ بويىنداعى ادامگەرشىلىك قاسيەتتەردى مولايتىپ, جاۋاپكەرشىلىكتىڭ جۇگى اۋىر ەكەنىن تۇسىندىرگەن.
«كەز كەلگەن سالادا قىزمەت ەتسەم دە, ومىرلىك ۇستازىم – اتا-انام. ولاردىڭ بالا كۇنى ايتقان ءاربىر ءسوزى قيالىما قانات بىتىرسە, كۇنى بۇگىنگە دەيىن سول اكەمنىڭ ايتقان ءاربىر اقىلى ومىرلىك ازىعىما اينالىپ جاتىر. تاعدىردىڭ ءار سالعان سىناعىنا كەزىككەن سايىن اكە سوزىنە سۇيەنىپ, ارەكەت ەتەمىن. ال مەنىڭ بويىمداعى نازىكتىك انامنىڭ ۇلگى-ونەگەسى دەر ەدىم. سول سەكىلدى ادام ومىرىندەگى ءار كەزەڭدە ءارتۇرلى ادامدى, ءارتۇرلى ۇستازدى كەزدەستىرە الادى. اسكەري ورتاعا كەلگەندە مەنىڭ بويىمدى تىكتەپ, كاسىبي قابىلەتىمدى كورسەتۋىمە دەمەۋ بىلدىرگەن وفيتسەرلەر دە جوق ەمەس. ولاردى دا ءومىردىڭ ءبىر كەزەڭىندە ۇستازدىق ەتكەن ادام رەتىندە تانىستىرا الامىن. مىسالى, ءبىزدىڭ اسكەري ءبولىم كومانديرىنىڭ تاربيە جانە الەۋمەتتىك قۇقىقتىق جۇمىستار جونىندەگى ورىنباسارى, پودپولكوۆنيك باۋىرجان قانسەيىتوۆ – تەمىردەي ءتارتىپ ورنىققان ورتادا قالاي قىزمەت اتقارۋ كەرەكتىگىن ۇيرەتۋدەن جالىقپاعان جان. ونىڭ مول تاجىريبەسى مەن قول استىنداعى ءار قارۋلاسىنا دەگەن جاناشىرلىعى اسكەري قىزمەتشىنىڭ كاسىبي بىلىكتىلىگىن كورسەتۋگە دەم بەرەدى», دەپ اعىنان جارىلدى ول.
قازىر ۇلتتىق ۇلاننىڭ اسكەري بولىمىنە كىتاپحاناشى بولىپ تاعايىندالعان ول «جانىما جاقىن كاسىبي ورتامدى تاپقانداي بولدىم» دەيدى. ونىڭ كۇندەلىكتى جۇمىسىنا ساربازدارمەن ەركىن سۇحبات جۇرگىزۋ, ونەرلەرىن شىڭداپ, وزدەرىنىڭ شىعارماشىلىق قابىلەتتەرىن دامىتۋعا اتسالىسۋ كىرەدى. بىلە بىلگەن ادامعا ادام بويىنداعى قابىلەتتى وياتىپ, شىعارماشىلىعىن شىڭداۋ – جاۋاپتى مىندەت.
«ولاردىڭ قىزىعۋشىلىقتارىن ءوشىرىپ الماي, كەرىسىنشە دۇرىس باعىت-باعدار كورسەتۋدى ءوزىمنىڭ پارىزىم سياقتى سەزىنەمىن. ساربازدارمەن وتە كوپ جانە قىزىقتى ءىس-شارالار وتكىزۋگە تىرىسامىز. ءبىزدىڭ ساربازدار وبلىستىق جانە قالالىق كىتاپحانالاردا وتەتىن ۆيكتورينالارعا, مەرەكەلىك ءىس-شارالارعا ءجيى قاتىسادى. دەمالىس جانە مەرەكە كۇندەرى بىزدە ۇنەمى ونەرلى ساربازدار جارىسى بولادى. كونتسەرت جانە كوڭىلدى تاپقىرلار سايىستارىن ۇيىمداستىرامىز. قازىرگى جاستاردىڭ بويىنداعى جالىندى ءوشىرىپ الماي, دۇرىس جولدى كورسەتىپ, دۇرىس باعىت بەرە الساق, ولاردىڭ ارقايسىسى ومىرلىك جولىن تاۋىپ كەتەرىنە كۇمانىم جوق», دەيدى م.چوراەۆا.
جۇمىستا ساربازداردىڭ قابىلەتىن شىڭدايتىن ول ءوز وتباسىنداعى مەيىرىمدى انا ءرولىن دە ەشقاشان ۇمىت قالدىرمايدى. سەبەبى ءبىزدىڭ كەيىپكەر وتانعا ادال قىزمەت ەتۋدىڭ ۇلگىسى وتباسىنداعى تاتۋلىقتان باستالاتىنىن ايتادى.
«بەس بالام بار. بالالارىم – بايلىعىم. ءۇش ۇلىم جانە ەكى قىزىم بار. تۇڭعىش ۇلىم 8-سىنىپتا وقيدى. اناسىنىڭ جولىن قۋىپ سپورت الەمىندە دە باق سىناپ كەلەدى. بوكستان ءتۇرلى جارىستىڭ جۇلدەگەرى, مۋزىكا سالاسىندا دا از-ماز جەتىستىكتەرى بار. ۇلىمنان كەيىن ەگىز قىزىم دۇنيەگە كەلدى. قوس ارۋىم, نازىك گۇلدەرىم 4-سىنىپتا وقيدى. قول تيگەندە بىرگە كىتاپ وقيمىز, وتباسى بولىپ مۋزىكامەن شۇعىلدانامىز. ودان كەيىنگى بالالارىم دا – ەگىز. كەنجەمنىڭ ەكەۋى دە – ۇل. كىشكەنتاي قورعاۋشىلارىم بيىل 1-سىنىپقا قادام باستى. ولاردى دا سپورتقا جاقىن ۇستايمىن. ەكەۋى دە كاراتەمەن شۇعىلدانادى. كورسەتكىشتەرى جاقسى, قاتارلاستارى اراسىندا جۇلدەلى ورىن الىپ ءجۇر. انا باقىتى دەگەن وسى ەكەن. ءوزىمدى ەرەكشە باقىتتى سەزىنەمىن», دەيدى ول.
جالعىزىلىكتى كوپبالالى انانىڭ قاۋىرت قىزمەتى وتباسىنداعى بالا تاربيەسىنە ەشقانداي سىلتاۋ بولا المايتىنى وسىنى كورسەتسە كەرەك. ءتىپتى بەس بالاسىنىڭ وزىنە ءتان مىنەز-قۇلىقتارىنا دەيىن جاقسى بىلەدى ەكەن. ءسوز اراسىندا ءوزىن بەس مەملەكەتپەن جۇمىس اتقارىپ جۇرگەن ديپلومات سەكىلدى سەزىنەتىنىن ايتىپ ازىلدەپ تە الدى.
«بالالارىمنان انالىق ماحابباتىمدى ايامايمىن. كوڭىلىن تابۋعا تىرىسىپ, تاربيە بەرۋ بارىسىندا دوس سەكىلدى ارالاسامىن. بىرگە ويىن ويناعان كەزدە ولاردىڭ قىزىق كورەتىن كەيىپكەرىنە دە اينالا سالۋ ماعان تۇك قيىن ەمەس. ولار انالارىنىڭ اسكەري قىزمەت اتقاراتىنىن بىلەدى. مۇنداي كەزدە ولار دا ەرەسەك ادام سەكىلدى جاۋاپكەرشىلىك جوعارى ەكەنىن جاقسى تۇسىنەدى. كۇتپەگەن تاپسىرمالار مەن شۇعىل جاۋىنگەرلىك دايىندىق ۋاقىتتارىندا بالالارىم ماعان تۇسىنىستىكپەن قاراي الادى. ولاردى سول ءۇشىن دە قۇرمەتتەيمىن, ماقتان ەتەمىن. مەن ءۇشىن ءاربىر مينۋتىم باعالى. قولىم قالت ەتكەن ۋاقىتتا ولارمەن بىرگە كىتاپ وقىپ, پايدالى ىسپەن شۇعىلدانۋعا ۋاقىت تابامىن», دەيدى ول.
قىزمەت پەن وتباسىن قاتار الىپ جۇرگەن كوپبالالى انا تۇراقتى سپورتپەن اينالىسادى ەكەن. قويان-قولتىق ۇرىستان سپورت شەبەرى اتانعان ونىڭ اۋزىنان بۇل سپورت تۇرىنەن جەتىستىكتەرى دە از ەمەس ەكەنىن بايقادىق. قولى قالت ەتە قالسا, اۋەلەتىپ ءان ايتقاندى ۇناتاتىنى تاعى بار. ساليقالى ايەلدىڭ سيپاتىن كورسەتكەن كەيىپكەرىمىزدىڭ بويىنداعى سەنىمدىلىك پەن تاباندىلىق اسكەري سالادا ادال قىزمەت ەتۋگە كومەكتەسسە, وتباسىنداعى تاربيەنىڭ تىزگىنىن بەرىك ۇستاۋعا دا سەپتىگىن تيگىزسە كەرەك.
