بي, شەشەن, جەتىسۋدى جوڭعارلاردان ازات ەتۋگە اتسالىسقان قازاق تاريحىنداعى كورنەكتى تۇلعالاردىڭ ءبىرى التاي نايمانباي ۇلىن دارىپتەۋگە ارنالعان ءىس-شاراعا وتاندىق عالىمدار, تاريحشىلار, ادەبيەتتانۋشىلار مەن باتىردىڭ ۇرپاقتارى قاتىستى.
جيىندى قازاقستاننىڭ ەڭبەك سىڭىرگەن قايراتكەرى قوشان مۇستافا تىزگىندەدى. القالى جيىندا قازاق اگرارلىق زەرتتەۋ ۋنيۆەرسيتەتىنىڭ پروفەسسورى ءدامىر الىمقۇلوۆ التاي بي تۋرالى تىڭ دەرەكتەر كەلتىردى.
«التاي ءبيدىڭ ەرلىگىن, بولمىسىن, قاھارماندىق جولىن, ۇلاعاتتى سوزدەرىن ويداعىداي جەتكىزگەن اۆتور دۇكەن ءماسىمحانۇلىنا العىسىمىز شەكسىز. ول التاي ءبيدى قايتا ءتىرىلتتى. تاريحي داستان جازۋ ەكىنىڭ ءبىرىنىڭ قولىنان كەلمەيدى», دەدى فيلولوگيا عىلىمدارىنىڭ دوكتورى, ل.ن.گۋميلەۆ اتىنداعى ەۇۋ پروفەسسورى سەرىك نەگيموۆ.
مەملەكەتتىك سىيلىقتىڭ لاۋرەاتى بايىنقول قالي ۇلى داستاننىڭ ءار ءبولىمىنىڭ ەرەكشەلىگىنە توقتالدى. «اۆتور «العاشقى جورىق» دەپ اتاعان ءبىرىنشى تاراۋىندا التاي بي – اتامىزدىڭ ەرلىگىن, باتىرلىعىن سيپاتتاعان. «تۋرا بيدە تۋعان جوق» دەگەن كەلەسى تاراۋدا بيلىگى تۋرالى ءسوز ەتەدى. ءۇشىنشى تاراۋدى «تۇڭعىش تورەلىك» دەپ اتاپ, بابامىزدىڭ العاش جاساعان تورەلىگى تۋرالى ايتسا, ءتورتىنشى تاراۋدا دانالىعى جىرلانادى. مىنە, وسىلايشا, التاي ءبيدىڭ باسىنداعى بىرنەشە ەرەكشەلىگىن قوزعاعان. جىردا ەرتەدەگى قيسسالاردىڭ ءداستۇرىن ساقتاعان», دەدى ب.قالي ۇلى.
التاي بي – جەتىسۋ ولكەسىن جوڭعار شاپقىنشىلىعىنان قورعاۋدا باتىرلىعىمەن ءارى ادىلدىگىمەن ەسىمى ەلگە تانىمال بولعان بي. ابىلايدىڭ اق تۋىنىڭ استىنا بىرىگىپ, ەلىن جوڭعار شاپقىنشىلىعىنان ازات ەتۋگە تىكەلەي ارالاسقان تۇلعا. بۇل تۋرالى ءال-فارابي اتىنداعى قازۇۋ جانىنداعى قازىرگى زامانعى قىتايدى زەرتتەۋ ورتالىعىنىڭ ديرەكتورى, تاريح عىلىمدارىنىڭ دوكتورى, پروفەسسور ءنابيجان مۇحامەتحان ۇلى ايتتى. ۇعا اكادەميگى, ءال-فارابي اتىنداعى قازاق ۇلتتىق ۋنيۆەرسيتەتى قازاقستان تاريحى كافەدراسىنىڭ مەڭگەرۋشىسى, تاريح عىلىمدارىنىڭ دوكتورى, پروفەسسور بەرەكەت كارىباەۆ «التاي بي» داستانىنداعى كوركەمدىك شىندىقتى تىلگە تيەك ەتسە, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس ديرەكتورى, ۇعا اكادەميگى, تاريح عىلىمدارىنىڭ دوكتورى, پروفەسسور زيابەك ەرمۇحان ۇلى «قازاقتىڭ بيلەر سوتى جانە ونىڭ «التاي بي» داستانىنداعى كورىنىسى» تاقىرىبىندا بايانداما جاساپ, داستان تۋرالى ويىن ورتاعا سالدى.
الماتى وبلىسى
