وبلىس اكىمى ءباسپاسوز قىزمەتىنىڭ اقپاراتىنا قاراعاندا, جاڭا مەكتەپتىڭ ءبىرى المالى اۋىلدىق وكرۋگىندەگى بەرەكە اۋلىندا اشىلدى. مۇنايلى شاھارعا جاقىن ورنالاسقان ەلدى مەكەندەگى بۇل ءبىلىم ورداسى 1 200 ورىنعا ەسەپتەلگەن. ال سارىوزەك شاعىن اۋدانىندا جۇمىس باستاعان مەكتەپ 300 وقۋشىنى قابىلدايدى.
«مەملەكەت باسشىسى قاسىم-جومارت توقاەۆ تابىستى ۇلت بولۋدىڭ ماڭىزدى شارتى رەتىندە ءار وقۋشىنىڭ ساپالى ءبىلىم الۋىنا, جان-جاقتى دامۋىنا قولايلى جاعداي جاساۋدى تاپسىردى. ۇلتتىق جوبامەن سالىنعان ءبىلىم ورداسىندا شاكىرتتەردىڭ بارلىق ءپاندى وقىپ-ۇيرەنۋىنە, ۇستازداردىڭ شىعارماشىلىقپەن اينالىسۋىنا تولىق جاعداي جاسالدى. بۇل مەكتەپتەردە مۇعالىم مەن وقۋشىنىڭ, مەكتەپ پەن اتا-انانىڭ بايلانىسى ارتىپ, ءبىلىمدى, تالانتتى, ساناسى سەرگەك, ويى ۇشقىر, باسەكەگە قابىلەتتى جاس ۇرپاق تاربيەلەنىپ شىعارىنا سەنەمىن», دەدى وبلىس اكىمى سەرىك شاپكەنوۆ.
جاڭا مەكتەپتەردە 3 مىڭ وقۋشى ەكى اۋىسىمدا وقيدى. ولارعا 120-دان استام ۇستاز ءدارىس بەرەدى. ماسەلەن, بەرەكە اۋلىنداعى مەكتەپتە حانشايىم كوپبەرگەنوۆانىڭ 8 نەمەرەسى ءبىلىم الادى. اجەي نەمەرەلەرىنىڭ جاڭا مەكتەپتە وقيتىنىنا قۋانىپ ءجۇر.
«اۋلىمىزدا كوپتەن كۇتكەن جاڭا مەكتەپ اشىلدى. مەكتەپتىڭ قۇرىلىسى باستالىپ, اياقتالعانعا دەيىن كۋا بولدىق. ەندى بالالاردى قابىلداپ جاتىر. مەن دە, باسقا اتا-انالار دا ءدان ريزامىز. سەبەبى بۇعان دەيىن نەمەرەلەرىم وسى اۋىلداعى مەكتەپتە وقىدى. بىراق ورىن سانى تاپشى ەدى. بۇل ماسەلە وڭ شەشىمىن تاپتى. جاڭا مەكتەپتە بالارىمىزدىڭ زەيىنى اشىلسىن», دەيدى ح.كوپبەرگەنوۆا.
مەكتەپتەرگە جەدەل باسقارۋ ورتالىعىنا قوسىلعان بەينەباقىلاۋ كامەرالارى ورناتىلعان. ال ەرەكشە بالالارعا كەدەرگىسىز ورتا قالىپتاستىرىلىپ وتىر. باستاۋىش جانە جوعارى سىنىپ وقۋشىلارىنا بولەك بلوكتار سالىنعان. ءبىلىم ورداسىنىڭ اۋماعىندا 2 جۇگىرۋ جولاعى, باسكەتبول, ۆولەيبول الاڭدارى بار. تەننيس كورتى, ويىن جانە workout الاڭدارى دا جابدىقتالعان. ال عيماراتتاردا 2 سپورت زالى, باستاۋىش جانە جوعارى سىنىپ وقۋشىلارىنا ارنالعان ەكى اسحانا, 260 ورىندىق ءماجىلىس زالى جانە كىتاپحانا بار. ءبىلىم ورداسىندا پسيحولوگ, لوگوپەد, مەديتسينا كابينەتتەرى, زاماناۋي ۇلگىدەگى وقۋ سىنىپتارى, فيزيكا, حيميا زەرتحانالارى جانە STEM كابينەتى قاجەتتى قۇرالدارمەن جاراقتالعان.
وبلىس اكىمى سەرىك شاپكەنوۆتىڭ ايتۋىنا قاراعاندا, «جايلى مەكتەپ» ۇلتتىق جوباسى اياسىندا جىل سوڭىنا دەيىن تاعى ءۇش مەكتەپ پايدالانۋعا بەرىلەدى. الداعى جىلدىڭ سوڭىندا جايلى مەكتەپتەردىڭ سانى 12-گە جەتەدى. ەڭ وزىق ۇلگىمەن سالىنىپ جاتقان جاڭا مەكتەپتەر ىسكە قوسىلعاندا, وندا 12 مىڭنان استام وقۋشى ساباققا بارادى.
وقۋشىلاردى ءبىلىم نارىمەن سۋسىنداتىپ جۇرگەن ۇستازداردىڭ ەڭبەگىن باعالاۋعا بەتبۇرىس جاسالدى. ماسەلەن, بيىل اتىراۋ وبلىسىندا 88 مۇعالىم «ى.التىنسارين» توسبەلگىسىنە يە بولدى. ولاردىڭ بارىندە شەبەر ساناتى بار.
«مەملەكەت باسشىسى «پەداگوگ – ۇلتتىڭ جاڭا ساپاسىن قالىپتاستىرۋ ۇدەرىسىندەگى ەڭ ماڭىزدى بۋىن» دەگەن بولاتىن. دەمەك, مۇعالىمگە جۇكتەلگەن جاۋاپكەرشىلىك جۇگى جەڭىل ەمەس. كەيىنگى جىلدارى وڭىردە ءبىلىم دەڭگەيىنىڭ كورسەتكىشى ارتىپ, وقۋشىلار ءتۇرلى دودادا الدىڭعى قاتاردان كورىنىپ كەلەدى. بۇل – وقۋشى زەيىنىن اشىپ, ءبىلىم شىراعدانىن جاققان ىزدەنىمپاز, كرەاتيۆتى, ءبىلىمدى ۇستازدار ەڭبەگىنىڭ جەمىسى», دەيدى س.شاپكەنوۆ.
سونداي-اق مەكتەپتەرگە 1 مىڭ ينتەراكتيۆتى تاقتا ساتىپ الىندى. قازىر وقۋ وشاقتارىنداعى مۇنداي تاقتالار سانى 2 مىڭعا جۋىقتادى. اتىراۋ وبلىستىق ءبىلىم باسقارماسىنىڭ باسشىسى مارات ءابۋوۆتىڭ ايتۋىنشا, ينتەراكتيۆتى پانەلدەر 7 اۋدان مەن وبلىس ورتالىعىندا ورنالاسقان ءبىلىم ۇيالارىنا تاراتىلىپ جاتىر.
«ينتەراكتيۆتى تاقتالاردىڭ 500 داناسى اتىراۋ قالاسىنداعى مەكتەپتەرگە ورناتىلادى. ال يندەر اۋدانىنا وسىنداي 45 تاقتا جىبەرىلەدى. يساتاي مەن ماحامبەت اۋدانىنا 60 دانادان بەرىلەدى. قۇرمانعازى اۋدانىنا – 57, قىزىلقوعاعا – 56, جىلىويعا – 50, ماقات اۋدانىنداعى مەكتەپتەرگە 39 تاقتا جەتكىزىلەدى. گيمنازيا مەن ليتسەيلەرگە – 83, تەحنيكالىق ءبىلىم بەرەتىن كوللەدجدەرگە 50 تاقتانى بەرۋ كوزدەلىپ وتىر», دەپ حابارلادى م.ءابۋوۆ.
ونىڭ ايتۋىنا قاراعاندا, مۇنداي تاقتالار بۇرىندا دا الىنعان. ال بيىل يندەر جانە ماحامبەت اۋدانىنداعى, وبلىستىق گيمنازيا مەن ليتسەيلەردەگى ينتەراكتيۆتى پانەل تاپشىلىعى ماسەلەسى تولىقتاي شەشىمىن تاپتى.
«جالپى, ينتەراكتيۆتى تاقتا ءبىلىم بەرۋ ۇدەرىسىنىڭ قىزىقتى ءارى تارتىمدى وتۋىنە مۇمكىندىك بەرەدى. اتالعان تاقتانىڭ كومەگىمەن مۇعالىم ءتۇرلى وقۋ ماتەريالىن ۆيدەومەن كورسەتىپ, 3D فورماتتى قولدانا الادى. بۇل بالالارعا قاجەتتى اقپاراتتى جەڭىل ءارى تۇسىنىكتى جەتكىزۋگە جول اشادى. مۇعالىمنىڭ اشىق ساباقتى ونلاين فورماتتا وتكىزۋىنە مۇمكىندىك بار», دەپ ءمالىم ەتتى م.ءابۋوۆ.
اتىراۋ وبلىسى
