كەڭەس توراعاسى مەلەس سەيىتجانوۆ قالا اكىمدىگى تاراپىنان وڭىرگە ينۆەستورلار تارتىلىپ جاتقانىن, ول ءۇشىن بارلىق ءتيىستى شارالار قابىلدانعانىن جەتكىزدى. سونداي-اق جاڭا يندۋستريالىق ايماقتار قۇرىلعانىن, سوڭعى جىلدارى شاھار ساۋلەت جاعىنان جاقسارا تۇسكەنىن, اسىرەسە ءتۋريزمدى دامىتۋ ءۇشىن كوپتەگەن جۇمىس اتقارىلعانىن اتاپ ءوتتى. ول ينۆەستيتسيا سالاسىندا وسى كۇندە ءبىراز ءىرى جوبالار قولعا الىنعانىن ايتىپ, سونىڭ ناتيجەسىندە اۋقىمدى ءوندىرىس ورىندارى اشىلعانىن تىلگە تيەك ەتتى.
وسى جيىندا كاسىپكەرلەر پالاتاسى ديرەكتورىنىڭ ورىنباسارى مايا يساەۆا ءسوز الىپ, شىمكەنتتەگى اەا-نىڭ قالا ەكونوميكاسىن وركەندەتۋگە قوسقان ۇلەسىن بايانداپ بەردى.
«2022 جىلى مەملەكەت باسشىسى قاسىم-جومارت توقاەۆتىڭ تاپسىرماسىمەن ارنايى ەكونوميكالىق ايماقتاردى دامىتۋ جونىندەگى جول كارتاسى بەكىتىلدى. قازىرگى تاڭدا بۇل – باستى ستراتەگيالىق قۇجات. سوندىقتان ول بارلىق مۇددەلى تاراپتار مەن ەكونوميكالىق ايماقتاردىڭ جۇمىسىن جۇيەلەيدى. وسى تۇستا ايتا كەتۋ كەرەك, «وڭتۇستىك» اەا تەك مەگاپوليستىڭ ەمەس, ەلىمىزدەگى تابىستى ارنايى ەكونوميكالىق ايماقتاردىڭ ءبىرى سانالادى. وعان سالىنعان ينۆەستيتسيا – 60 ميلليارد تەڭگە بولسا, ءوندىرىس كولەمى – 156,4 ميلليارد تەڭگەنى قۇرايدى. ايماقتى قۇرۋعا كەتكەن بيۋدجەتتىڭ 1 تەڭگەسىنە 7,4 تەڭگە ينۆەستيتسيا قۇيىلعان. بۇعان قوسا اەا كاسىپورىندارى سالىق كودەكسىنە سايكەس ءتۇرلى سالىقتىق جەڭىلدىكتەردى قولدانادى», دەدى ول.
كەڭەس وتىرىسىندا شىمكەنت قالاسى پروكۋراتۋراسى باسقارماسىنىڭ باسشىسى باقىتجان بايعوزيەۆ «وڭتۇستىك» اەا كاسىپورىندارىنىڭ جەر ۋچاسكەلەرىن الۋداعى پروبلەمالارى تۋرالى باياندادى.
«كۇن تارتىبىندە قارالعان ماسەلە شىنىمەن دە كۇردەلى. ارنايى ەكونوميكالىق ايماقتى قۇرۋداعى باستى ماقسات – ءوڭىردى جەدەل دامىتۋ, وتە ءتيىمدى, باسەكەگە قابىلەتتى ءوندىرىس ورىندارىن قۇرۋ ەدى. زاڭعا سايكەس ارنايى ەكونوميكالىق ايماقتىڭ باسقارۋشى كومپانياسى اەا قاتىسۋشىلارىنا اقىلى نەگىزدە ۋاقىتشا پايدالانۋعا جەر ۋچاسكەلەرىن بەرۋگە ءتيىس. پروكۋراتۋرا تەكسەرۋ جۇرگىزۋ ناتيجەسىندە ينۆەستيتسيالىق ءتۇرلى قولداۋلارعا قاراماستان, باسقارۋشى كومپانيا تاراپىنان جەر ۋچاسكەلەرىن اەا قاتىسۋشىلارىنا بەرۋ بارىسىندا ءارتۇرلى اكىمشىلىك كەدەرگى جاسالعانىن انىقتاعان. سونىڭ سالدارىنان ينۆەستورلار ءوز مىندەتتەمەلەرىن كەلىسىمشارتتا بەلگىلەنگەن مەرزىم ىشىندە ورىنداي الماي جاتىر. پروكۋراتۋرانىڭ ارالاسۋىمەن اەا-نىڭ ەكى كاسىپكەرىنە جەر ۋچاسكەلەرى بەرىلدى. انىقتالعان زاڭ بۇزۋشىلىقتار بويىنشا پروكۋراتۋرا ارنايى اكت تۇزەتىن بولادى», دەدى ب.بايعوزيەۆ.
ءوز كەزەگىندە «وڭتۇستىك» ارنايى ەكونوميكالىق ايماعىنىڭ باسقارۋشى كومپانياسى» اق باسقارما توراعاسى عانيبەت اۋباكىروۆ كاسىپكەرلەرگە بولىنەتىن جەر ۋچاسكەلەرىنىڭ قۇجاتتارىن راسىمدەۋ بارىسىنداعى مەرزىمدەردىڭ سوزىلىپ كەتۋ سەبەبىن ءتۇسىندىرىپ بەردى.
«كاسىپورىنداردىڭ جەر ۋچاسكەلەرىنىڭ مەملەكەتتىك اكتىلەرىن راسىمدەۋ ءۇشىن حالىققا قىزمەت كورسەتۋ ورتالىقتارىنا قۇجات تاپسىرىلادى. حقكو-دا راسىمدەۋ ۋاقىتى سوزىلاتىندىقتان ءبىزدىڭ جۇمىس كوپ جاعدايدا كەشەۋىلدەپ جاتادى. رەگلامەنت بويىنشا ول 14 كۇن ۋاقىتتى الادى. بىراق شىن مانىسىندە مەرزىم ودان دا اسىپ كەتىپ جاتادى. ونىڭ بىردەن-ءبىر سەبەبى – قۇجات راسىمدەۋدىڭ قيىندىق تۋدىرار تۇستارى كوپ. كاسىپكەرمەن كەلىسىمشارت جاسالعان سوڭ جەر ۋچاسكەسىنىڭ قۇجاتتارىن راسىمدەۋ مەرزىمىنىڭ تىم كەشىگىپ كەتەتىنى سوندىقتان», دەدى باسقارما توراعاسى.
باسقوسۋدا كەڭەس مۇشەلەرى اتالعان كەلەڭسىزدىكتەردى بولدىرماۋ ءۇشىن قۇجات راسىمدەۋدىڭ ناقتى ءارى تۇسىنىكتى الگوريتمىن قۇرۋ كەرەكتىگىن العا تارتتى. سونداي-اق ينۆەستيتسيالىق جوبالاردى جۇزەگە اسىرۋعا, ولاردى قولداۋعا بارىنشا جاعداي جاساۋ قاجەتتىگىنە توقتالدى.
سونىمەن, جوعارىداعى ماسەلەلەردى تالقىلاي كەلە كەڭەس مىناداي قورىتىندى جاساپ, ۇسىنىستاردى ازىرلەدى. بىرىنشىدەن, شىمكەنت قالاسىنىڭ پروكۋراتۋراسىنا كاسىپكەرلەردىڭ قۇقىقتارىن بۇزۋعا جول بەرگەن لاۋازىمدى تۇلعالاردى جاۋاپكەرشىلىككە تارتۋ ماسەلەسىن قاراۋعا ءتيىس. ەكىنشىدەن, كاسىپكەرلەر پالاتاسى قالالىق پروكۋراتۋرامەن, كاسىپكەرلىك, يندۋستريالىق-يننوۆاتسيالىق دامۋ باسقارماسىمەن بىرگە كاسىپكەرلەرگە ينۆەستيتسيالىق جوبالاردى ۋاقتىلى ىسكە اسىرۋىنا جان-جاقتى قولداۋ كورسەتۋى كەرەك. ۇشىنشىدەن, قالالىق كاسىپكەرلىك, يندۋستريالىق-يننوۆاتسيالىق دامۋ باسقارماسىنا زاڭنامادا كوزدەلگەن ناقتى مەرزىمدەردى كورسەتە وتىرىپ, اەا قاتىسۋشىلارى ءۇشىن جەر ۋچاسكەلەرىن بەرۋ بويىنشا ينۆەستيتسيالىق جوبالاردى ىسكە اسىرۋدىڭ قادامدىق الگوريتمىن ازىرلەۋ مىندەتتەلدى. ەڭ سوڭعىسى «وڭتۇستىك» اەا كاسىپكەرلەرىنە جەر ۋچاسكەلەرىن بولۋدەگى كەدەرگىلەرگە قاتىستى قالالىق سىبايلاس جەمقورلىققا قارسى ءىس-قيمىل دەپارتامەنتىنە ارنايى حات جولداناتىن بولدى.
شىمكەنت
