ايگىلى عالىم اپامىزدى بالا كۇنىمنەن كورىپ ءوستىم. ولاي بولاتىن سەبەبى, رابيعا اپاي اكە-شەشەمنىڭ ارىپتەسى ءارى سىيلاس دوسى رەتىندە جاقىن ارالاستى. مەكتەپتە وقىپ جۇرگەنىمدە اپايدى ۇيدەن ءجيى كورەتىنمىن. بۇل ۋاقىتتا اكەم ء(مۇسىلىم بازارباەۆ) ادەبيەت جانە ونەر ينستيتۋتىنىڭ ديرەكتورى بولاتىن. ۇيدەن عالىمدار مەن قالامگەرلەر ەش ارىلمايدى. سولاردىڭ ورتاسىندا جامالى جارقىراپ رابيعا سىزدىق وتىرادى. ءبىز, اپكەم ەكەۋمىز انامىزعا كومەكتەسىپ, قوناقتارعا شاي تاسيمىز. سونداعى بالا سانامىزدا جاتتالىپ قالعان ءبىر جايت, رابيعا اپاي وتە ادەمى بولاتىن. مەيىرىم نۇرى توگىلگەن جارقىن ءجۇزى كىسىنى وزىنە ماگنيتتەي تارتىپ تۇراتىن. اسىرەسە ءبىزدى, بالالاردى كورگەندە كوركەم ءبىر كۇيگە ەنەدى. كوكىرەك كوزىمىزگە ۇڭىلەدى. ساباعىمىزدى, نە وقىپ جاتقانىمىزدى سۇرايدى. مۇنداي ءۇنسىز ۇعىنىسۋدى, سۇيىسپەنشىلىك سەزىمىن سوزبەن ايتىپ جەتكىزۋ استە مۇمكىن ەمەس-اۋ. بىردە رابيعا اپاي جاڭا جىل مەرەكەسىنە وراي ينستيتۋتتا ىستەيتىن ادامداردىڭ بالالارىنا ارناپ ءىس-شارا وتكىزدى. انامنىڭ ءبىزدى قار قىزىنداي كيىندىرىپ, ءوز قولىمەن اق كويلەك تىگىپ بەرگەنى, اكادەميا عيماراتىنىڭ شەۆچەنكو جاعىنداعى فويەدە شىرشانى اينالا بي بيلەپ, ولەڭ ايتىپ جۇرگەنىمىز, رابيعا اپايدىڭ سوندا ءار بالاعا كىتاپ سىيلاعان ءساتى ءالى كۇنگە سانامدا سايراپ تۇر. كەيىن ماسكەۋدەن وقۋ ءبىتىرىپ كەلىپ, ءتىل ءبىلىمى ينستيتۋتىنا قىزمەتكە ورنالاسقانىمدا, اپايدى مىقتى عالىم رەتىندە تاني باستادىم. عالىمنىڭ ەڭبەكتەرىن, عىلىمي شىعارماشىلىعىن زەرتتەپ, تالداعان بىرنەشە ماقالام جارىق كوردى.
اكادەميك ر.سىزدىقتىڭ زامانداستارى اپايدىڭ ەڭبەكقورلىعى مەن ادامگەرشىلىگى, پاراساتتىلىعى مەن رۋحاني تازالىعى جونىندە ءجيى ايتادى. بەلگىلى اقىندار, جازۋشىلار, عالىمدار, مەملەكەت جانە قوعام قايراتكەرلەرى اپاي تۋرالى ادەمى ولەڭدەر, جاقسى دۇنيەلەر جازدى. كورنەكتى اقىنىمىز قاسىم امانجولوۆتىڭ 1946 جىلى رابيعا عاليقىزىنا ارناپ ولەڭ جازعانىن بىرەۋ بىلسە, بىرەۋ بىلمەس.
ء «تىلىڭىز ءتاتتى, ويىڭىز قانداي!
تىڭدادىم, ۇقتىم جان كۇيىڭىزدى.
بولار ەم كۇندە ءبىر جاسارعانداي,
كوپ تۋسا قازاق ءدال سىزدەي قىزدى!...» عاجاپ ەمەس پە! قاسىم اقىننىڭ جىرىنا ارقاۋ بولعان ارۋدا ارمان بار ما, ءسىرا؟ زامانىمىزدىڭ كورنەكتى عالىم-فەنومەنىنىڭ ۇزاق جانە جارقىن ءومىرىن باقىلاي وتىرىپ, وسى سوزدەر ونىڭ بۇكىل ءومىرى مەن جۇمىسىنىڭ لەيتموتيۆى بولىپ, تۇلعانىڭ دۇرىس ءارى ءدال باعالانعانىنا تاعى ءبىر مارتە كوز جەتكىزەدى.
رابيعا عاليقىزىنىڭ ءجۇرىپ وتكەن جولدارىنا ۇڭىلسەك, ونىڭ بالالىق, جاستىق شاقتارى ەلىمىزدىڭ تاريحىنداعى ەڭ قيىن كەزەڭدەرگە تۇسپا-تۇس كەلدى: اكەسى سول كەزدەگى زيالى تۇلعالار قاتارىندا رەپرەسسياعا ۇشىراپ, 1937 جىلى «حالىق جاۋى» رەتىندە اتىلدى. بۇل وقيعا تۋرالى رابيعا اپاي ءوزىنىڭ ەستەلىگىندە بىلاي دەپ جازادى: «جازدا, ءبىر كۇنى انامىز روزا ەكەۋمىزدى قالاداعى نانعا جىبەردى. ءتۇس كەزى بولاتىن. ەكەۋمىز نان الىپ قورادان كىرە بەرسەك, ات اربا شىعىپ كەلە جاتىر ەكەن. الدىندا كوشىر وتىر, ارتىندا 3 ادام, ەكى جاعىندا ەكى ادام, ورتاسىندا اكەم وتىر. ءبىزدى كوردى دە باسىن يزەدى. سويتكەنشە بولماي, زۋلاتىپ الىپ كەتتى. ۇيگە كىرسەك, ءۇيدىڭ ءىشى تاس-تالقان. ساندىق اشىلىپ, ىشىندەگى كيىم-كەشەكتىڭ بارلىعى جەردە جاتىر. ازىن-اۋلاق كىتاپ-قاعازدار دا جەردە جاتىر, ىدىس-اياقتار دا جەردە. انامىز جىلاپ, بۇك ءتۇسىپ وتىر. حاميت اعام سۇپ-سۇر بولىپ ءۇيدىڭ ورتاسىندا تۇر. اكەلەرىڭدى ۇستاپ الىپ كەتتى», دەدى. سول ساتتەن باستاپ ءۇي شارۋاسىنداعى بارلىق قيىندىق اناسىنىڭ موينىنا تۇسەدى. قۋعىن-سۇرگىننەن قاسىرەت شەككەن وتباسىنداعى بالالار ەرتە ەسەيىپ, ۇلكەندەر اتقاراتىن ىستەرگە بۋىنى قاتپاي جاتىپ ارالاسادى. ون التى جاسىندا رابيعا عاليقىزى مەكتەپتە قازاق ءتىلى مەن ادەبيەتىنەن جانە باسقا دا مۇعالىم بولماي بيولوگيا, زوولوگيا سياقتى پاندەردەن ساباق بەرەدى.
1945 جىلى حاكىم ابايدىڭ 100 جىلدىعىنا ارنالعان كونفەرەنتسياعا قاتىسۋعا قازاقستاننىڭ بارلىق ايماعىنان مۇعالىمدەر الماتىدا باس قوستى. ولاردىڭ اراسىندا رابيعا عاليقىزى دا بار ەدى. سول كونفەرەنتسيا تۋرالى اپايدىڭ ءوزى ءبۇي دەيدى: ء«بىر سەكتسيادا باسقا وبلىستاردان كەلگەندەردەن كىم سويلەيتىنىن سۇرادى. قاراپ وتىرماي, قول كوتەردىم. ءبىر ەسىمدە قالعانى, وقۋلىقتاردا كەتەتىن ەملە قاتەلەرىنىڭ بار ەكەنىن ايتتىم. سوندا ورتا جاستان اسا بەرگەن ءبىر ادام كەلىپ: «قاراعىم, قايدان كەلدىڭ, جاقسى سويلەدىڭ, دۇرىس سويلەدىڭ», دەدى. سويتسەم, بۇل كىسى اكادەميك ىسمەت كەڭەسباەۆ ەكەن. كەلەسى ءبىر ۇزىلىستە ادەمى ءبىر «ورىس» كەلدى قاسىما. كەلدى دە, تاپ-تازا قازاقشا: ء«وزىڭ ءبىر پىسىق قىز ەكەنسىڭ, قايدان كەلدىڭ؟», دەدى. بۇل كىسى – ماۋلەن بالاقاەۆ ەكەن». جاس, جىگەرلى قىزدىڭ سويلەگەن ءسوزى نازاردان تىس قالعان جوق. سول كەزدەگى قازاق پەداگوگيكالىق ينستيتۋتىن باسقارعان پروفەسسور احمەدي ىسقاقوۆ جالىنداعان جاننىڭ ەرەكشە قابىلەتى مەن ءتىلىنىڭ وتكىرلىگىن بايقاپ, ونى بىردەن فيلولوگيا فاكۋلتەتىنىڭ ءۇشىنشى كۋرسىنا شاقىرادى.
60-جىلداردان باستاپ رابيعا عاليقىزى قازاق كسر عىلىم اكادەمياسىنىڭ ءتىل جانە ادەبيەت ينستيتۋتىندا جۇمىس ىستەيدى. ول قاتىسقان عىلىمي كونفەرەنتسيالاردىڭ بىرىنە مۇحتار اۋەزوۆتىڭ ءوزى كەلەدى. كونفەرەنتسياعا قاتىسۋشىلاردىڭ بارلىعىن تىڭداعاننان كەيىن م.ومارحان ۇلى جاس عالىمدى ءسوز سويلەگەنى ءۇشىن ماقتايدى, ونىڭ بايانداماسىندا كوتەرىلگەن پروبلەما لينگۆيستەر مەن ادەبيەتتانۋشىلار ءۇشىن ماڭىزدى ەكەنىن اتاپ ءوتىپ, تالانتىن جوعارى باعالايدى. م.اۋەزوۆتىڭ كەڭەسى بويىنشا ر.سىزدىق اباي شىعارماشىلىعىن لينگۆيستيكالىق تۇرعىدان زەرتتەي باستايدى. ۇلى جازۋشىنىڭ وسيەتى ءوز جەمىسىن بەرەدى. رەسپۋبليكالىق عىلىمي جانە قوعامدىق ورتادا جوعارى باعالانعان «اباي شىعارمالارىنىڭ ءتىلى», «ابايدىڭ ءسوز ورنەگى», «اباي ولەڭدەرىنىڭ سينتاكسيستىك قۇرىلىسى» سياقتى كۇردەلى ەڭبەكتەر دۇنيەگە كەلەدى. اباي ولەڭدەرى ءتىلىنىڭ سينتاكسيستىك ەرەكشەلىكتەرىنە ارنالعان ەڭبەگىندە اۆتور: «پوەزيالىق شىعارمالاردىڭ وزىنە ءتان زاڭدارى بولادى. بۇل زاڭدار ىرعاق, ۇيقاس, شۋماقتالۋ, ينتوناتسيالىق-مەلوديالىق قۇبىلىس ءتارىزدى ولەڭ بەلگىلەرىنە قاراي پايدا بولادى», دەيدى. پوەزيا ءتىلىنىڭ سينتاكسيستىك ەرەكشەلىكتەرىن تانىپ-ءبىلۋ ءۇشىن ول كۇردەلى سينتاكسيستىك تۇتاستىق, شۋماق كاتەگوريالارىن, ءبىر-بىرىمەن بايلانىسىن, ينۆەرسيا, ىقشامداۋ, تارماق ۇعىمدارىن جان-جاقتى تالداپ, اباي ولەڭدەرىنىڭ سينتاكسيستىك قۇرىلىسىن, كومپوزيتسيالىق قۇرامى مەن ولشەم تۇرلەرىن انىقتاپ سيپاتتايدى.
رابيعا سىزدىقتىڭ ء«سوز سازى» دەگەن ەڭبەگى 1995 جىلى ەكىنشى رەت باسىلىپ شىقتى ء(بىرىنشى باسىلىمى 1983 جىلى جارىق كوردى). كومەكشى قۇرال رەتىندەگى جۇمىستىڭ نەگىزگى ماقساتى – سويلەۋ ۇستىندە سوزدەردى دۇرىس دىبىستاۋ زاڭدىلىقتارىن ايقىنداپ, مۇنى قالىڭ جۇرتشىلىققا, اسىرەسە جاستارعا ۇيرەتۋ. عالىمنىڭ ايتۋىنشا, ء«سوز سازى – سويلەۋ ۇستىندە (اكتىسىندە) سوزدەردىڭ دۇرىس ايتىلىپ, قۇلاققا جاعىمدى ەستىلۋى. ال سوزدەردى دۇرىس ايتۋ دەگەنىمىز – ءتىلدىڭ تابيعي دىبىس زاڭدىلىقتارىن ساقتاۋ», دەيدى عالىم. اۆتور وسى ەڭبەكتى «ورفوەپيالىق انىقتاعىش» دەپ اتاسا دا, مۇندا تەوريالىق تۇجىرىمدار بارشىلىق جانە بۇل قازاق ءتىل ءبىلىمىنىڭ جاڭا باعىتى – ينتونولوگيا سالاسىنىڭ نەگىزگى ماسەلەلەرىمەن ۇندەسىپ, ونى ءارى قاراي دامىتۋعا نەگىزدەلەدى.
ءتىلدىڭ جازباشا ءتۇرى ءار قىرىنان جەتە زەرتتەلىپ, سوعان بايلانىستى ءتيىستى وقۋلىقتار دا جارىق كورگەنى ءمالىم. ال اۋىزەكى سويلەۋ ءتىلىن الار بولساق, سويلەۋ مادەنيەتىنىڭ بىلىك-تانىمىن كەڭەيتۋگە ارنالعان وقۋلىقتار, وقۋ قۇرالدارى ءالى دە جەتكىلىكسىز. ادامدى دۇرىس مانەرلەپ سويلەتۋ ءۇشىن اۋىزشا ءتىلدىڭ زاڭدىلىقتارىن ءبىلۋ شارت. ال اۋىزەكى سويلەۋ ءتىلىنىڭ بىردەن-ءبىر كورسەتكىشى – ينتوناتسيا. تۇتىنۋشىلاردىڭ قاتىناس قۇرالى رەتىندەگى سۋپەرسەگمەنتتى فونەتيكا تۋرالى ءبىلىمىن قالىڭ جۇرتشىلىققا تانىستىرۋ نەگىزگى ماسەلەلەردىڭ ءبىرى بولىپ وتىر. سويلەۋگە ۇيرەتۋدە ماتەريال رەتىندە لەكسيكالىق جانە گرامماتيكالىق بىرلىكتەر جەتە قولدانىلسا, پروسوديكالىق ەلەمەنتتەرگە ەرەكشە نازار اۋدارىلماعان. سويلەۋ بارىسىندا كورىنىس تاباتىن پروسوديكالىق تاسىلدەردىڭ قىزمەتى ءسوز اعىمىندا جۇزەگە اسۋى اۋىزەكى ءسوزدىڭ اۋەزدىلىگىندە, اسەرلىلىگىندە كورىنەدى. ر.سىزدىق ءوزىنىڭ ەڭبەگىندە: ء«سوزدى دىبىستاۋ, ياعني دۇرىس ايتۋ نورمالارى بارلىق ساتتە بىردەي, ەشبىر بۇلجىمايتىن نارسە ەمەس», دەيدى. اۆتوردىڭ قۇندى تۇجىرىمدامالارى سويلەۋ ينتوناتسياسىنىڭ قاعيدالارىمەن سايكەس كەلەدى. بۇل تۇستا ءتىل ۇيرەنۋشىنىڭ سويلەۋ اكتىسىن ءتۇسىنۋىن دالەلدەيتىن پروسوديكالىق تاسىلدەردىڭ ورنى ەرەكشە. ءتىل ۇيرەنۋشىنىڭ سويلەي ءبىلۋ قابىلەتىن دامىتۋدا سۋپەرسەگمەنتتى فونەتيكا زاڭدىلىقتارىن مەڭگەرۋدىڭ ماڭىزى زور.
عۇلاما عالىمنىڭ تۇركى جانە قازاق ءتىل ءبىلىمى سالاسىنداعى بىرقاتار باعىتتاعى, ەڭ الدىمەن, قازاق ادەبي ءتىلى تاريحىنىڭ ماسەلەلەرى بويىنشا زەرتتەۋلەرى – لينگۆيستيكا عىلىمىنىڭ دامۋىنا قوسىلعان ولشەۋسىز ەڭبەك. اكادەميك ر.سىزدىق ەڭبەكتەرىندە قازاق ءتىل ءبىلىمىنىڭ ءارتۇرلى سالاسى قامتىلعان. كورنەكتى عالىم-فيلولوگ كوپ جىل بويى جالپى تۇركولوگيالىق زەرتتەۋلەرمەن, قازاق ادەبي ءتىلىنىڭ پروبلەمالارىمەن, سويلەۋ مادەنيەتى, قولدانبالى لينگۆيستيكا جانە باسقا دا ماسەلەلەرمەن جان-جاقتى, بايىپتى اينالىستى.
1993 جىلى «XV-XIX عاسىرلارداعى قازاق ادەبي ءتىلىنىڭ تاريحى» مونوگرافياسى قايتا باسىلىپ, تولىقتىرىلدى. 60-جىلداردان باستاپ ءتىلشى عالىم قازاق ادەبي ءتىلىنىڭ قالىپتاسۋ, دامۋ كەزەڭدەرىن زەرتتەدى. ادەبي ءتىلدىڭ مارتەبەسىن ايقىنداۋ قاعيداسى تۋرالى عالىمنىڭ وزىندىك پىكىرى بار, سوعان سايكەس, XV-XVII عاسىرلارداعى اقىندار مەن جىراۋلار شىعارمالارىنىڭ ءتىلى – قاشاندا ادەبي ءتىلدىڭ ۇلگىسى. تاريحي ەسكەرتكىشتەردى جان-جاقتى, كەشەندى تۇردە زەردەلەۋدىڭ نەگىزىندە زەرتتەۋشى ادەبي ءتىلدىڭ نورماتيۆتىك نەگىزدەرىن بىرىكتىرۋ مەن دامىتۋ تەك جازباشا تۇردە ەمەس, اۋىزشا تۇردە دە جۇرەدى دەگەن قورىتىندىعا كەلەدى. قازاق ادەبي ءتىلىنىڭ دامۋى مەن تاريحى ماسەلەلەرى عالىمنىڭ تۇركولوگيالىق زەرتتەۋلەرىمەن تىعىز بايلانىستى. ورتاعاسىرلىق «جاميات-تاۋاريح» ەسكەرتكىشى ءتىلىنىڭ لەكسيكالىق جانە گرامماتيكالىق ەرەكشەلىكتەرىنە (XVI عاسىر) تالداۋ جاسايدى. تۇركى تىلدەرىنىڭ وعىز جانە قىپشاق ەلەمەنتتەرىن سالىستىرۋ ناتيجەسىندە زەرتتەۋشى جازبا ەسكەرتكىش قازاق حالقىنىڭ رۋحاني مادەنيەتىنىڭ تاريحي مۇراسى ەكەنىن دالەلدەيدى. عالىمنىڭ قوجا احمەت ءياساۋيدىڭ ء(حىى عاسىر) حيكمەت تىلىندەگى ماتىندىك زەرتتەۋلەرى – عىلىمي قىزىعۋشىلىق تۋدىراتىن ۇلكەن ەڭبەك. بۇل رەتتە ر.سىزدىقتىڭ شىعارماشىلىعى پروبلەمالاردى تەرەڭ زەرتتەۋىمەن جانە تىلدىك دەرەكتەردىڭ كەڭدىگىمەن ەرەكشەلەنەتىنىن ايتا كەتۋىمىز كەرەك.
ايگىلى عالىمنىڭ عىلىمي زەرتتەۋلەرىندە سويلەۋ مادەنيەتىنە قاتىستى تەوريالىق جانە قولدانبالى ماسەلەلەر ماڭىزدى ورىن الادى. قازاق ادەبي ءتىلىنىڭ تەورياسى ونىڭ الەۋمەتتىك فۋنكتسيالارى مەن ءنورماتيۆتى ۇدەرىستەرىنىڭ دامۋى تۇرعىسىنان قاراستىرىلادى. ول ءوز ەڭبەكتەرىندە نورما, كوديفيكاتسيا, سويلەۋ, ت.ب. سياقتى لينگۆيستيكالىق ۇعىمداردى تەرەڭ تالداپ اشىپ بەرەدى. تىلدىك نورما مەن ونىڭ كوديفيكاتسياسىنىڭ ماسەلەلەرى, قازاق ورفوگرافياسى مەن پۋنكتۋاتسياسىنىڭ نەگىزگى ەرەجەلەرى, قازىرگى قازاق ءتىلىنىڭ لەكسيكوگرافيالىق بايلىعى, ستيليستيكا مەن شەشەندىك ماسەلەلەرى كوپتەگەن مونوگرافيادا, انىقتامالىق كىتاپتا, وقۋلىقتا, ت.ب. وقۋ قۇرالدارىندا كورىنىس تاۋىپ انىقتالادى.
قازىرگى ۋاقىتتا قازاق ءتىلىن لاتىن الىپبيىنە كوشىرۋدە ر.سىزدىقتىڭ ورفوگرافيا, ورفوەپيا جونىندەگى ەڭبەكتەرى ەرەكشە وزەكتى بولىپ سانالادى. عالىم اپامىز وتكەن عاسىردىڭ 60-جىلدارىنان بۇگىنگە دەيىن ءوز قۇندىلىعىن جوعالتپاعان قازاق ءتىلىنىڭ ورفوگرافيالىق ەرەجەلەرى مەن انىقتامالىقتارىن جاسادى. ورفوگرافيالىق انىقتاما – قازاق ەملە ەرەجەلەرىنە جۇگىنەتىن بارشا قاۋىمنىڭ كۇندەلىكتى جازۋ بارىسىندا پايدالاناتىن ەڭ باستى قۇندى قۇرالى.
تاعى ءبىر ايتا كەتەتىن جايت, عالىم اپامىز كورنەكتى عالىمدار, قازاق ءتىل ءىلىمىنىڭ نەگىزىن سالۋشىلار ا.بايتۇرسىن ۇلى, ح.دوسمۇحامەد ۇلى, ق.جۇبانوۆتاردىڭ ەڭبەكتەرىن ناسيحاتتاۋعا ەلەۋلى ۇلەس قوستى. ولاردىڭ ومىرىنە جانە ەڭبەك جولىنا ارنالعان مونوگرافيالار, كىتاپتار, بروشيۋرالار مەن ماقالالار جارىق كوردى.
ىزگى نيەتى مەن جان دۇنيەسىنىڭ سۇلۋلىعىنا قاراي ول كىسىنىڭ جانىنا جاستار جاعى كوبىرەك ءۇيىرىلىپ تۇراتىن. ول قامقور, مەيىرىمدى تالىمگەر رەتىندە جاس ارىپتەستەرىنە تەك عىلىمدا عانا ەمەس, كۇندەلىكتى ءومىردىڭ ءتۇرلى بەلەسىندە كومەك قولىن سوزۋدان تارتىنبادى. رابيعا اپايدىڭ شاكىرتتەرى – عىلىم دوكتورلارى مەن كانديداتتارى تانىمال ماماندارعا اينالدى, ۋنيۆەرسيتەتتەردە جانە ەلىمىزدىڭ باسقا دا عىلىمي, مەملەكەتتىك مەكەمەلەرىندە جۇمىس ىستەيدى.
عالىمنىڭ تەرەڭ دانالىعىنا, ەڭبەككە دەگەن ۇلكەن قابىلەتىنە, كەڭ دۇنيەتانىمىنا, سونىمەن قاتار ءتىل ءبىلىمىنىڭ تاعدىرىنا دەگەن ازاماتتىق ۇستانىمىنا ۇلكەن دە, كىشى دە ءتانتى. عيبراتتى تۇلعا عىلىمعا عانا ەمەس, سونىمەن قاتار قازاق حالقىنىڭ ۇلتتىق مادەنيەتى مەن رۋحانياتىنا دا باعا جەتپەس ۇلەس قوسىپ كەتتى. وسىنشاما ەڭبەگى بار اكادەميك ر.سىزدىق عىلىمي, پەداگوگيكالىق جانە قوعامدىق قىزمەتى ءۇشىن «قۇرمەت», «پاراسات», «بارىس» وردەندەرىمەن ماراپاتتالدى. مەملەكەتتىك سىيلىقتىڭ, ش.ءۋاليحانوۆ اتىنداعى سىيلىقتىڭ لاۋرەاتى, ەڭبەك سىڭىرگەن عىلىم قايراتكەرى اتاندى.
ەندىگى كەزەكتە عۇلاما عالىمنىڭ عىلىمي-مادەني مۇراسىن كوز قاراشىعىنداي ساقتاپ, كەشەندى زەرتتەۋ جۇمىستارىن كەشىكتىرمەي قولعا الۋىمىز كەرەك. ونىڭ اسقان كاسىبي شەبەرلىگى, رۋحاني بايلىعى, جاۋاپكەرشىلىگى ءبىز ءۇشىن زور مارتەبە دەسەك, ال عىلىمعا كەيىن كەلىپ قوسىلىپ جاتقان جاستار ءۇشىن تاعىلىمى مول جارىق مەكتەپ.
زەينەپ بازارباەۆا,
ۇعا اكادەميگى
