مامانداردىڭ ايتۋىنشا, كوكتەم مەن جاز مەزگىلىندەگى اۋا رايىنىڭ قولايلى بولۋى, توپىراقتاعى ىلعال قورىنىڭ جوعارىلىعى ديقاندارعا جايلى مۇمكىندىك بەردى. بۇگىندە ءداندى, ءداندى-بۇرشاقتى داقىل الاڭىنىڭ 90,8%-عا جۋىعى جينالىپ بولعان. ورتاشا ونىمدىلىك گەكتارىنا 15,1 تسەنتنەردى قۇراپ, 409,7 مىڭ توننا استىق باستىرىلدى. بيداي جيناۋ الاڭى 239,0 مىڭ گەكتاردى قۇراسا, ءدال قازىرگى كۇنى 218,0 مىڭ گەكتار اۋماقتان, 329,6 مىڭ توننادان استام ءونىم الىندى. كارتوپ ەگىلگەن 5,8 مىڭ گەكتاردىڭ 5,0 مىڭ گەكتارى جينالدى. ورتاشا ونىمدىلىگى – گەكتارىنا 224,0 تسەنتنەر. 5,4 مىڭ گەكتارعا ەگىلگەن كوكونىستىڭ 4,8 مىڭ گەكتارى جينالعان. ورتاشا ونىمدىلىك – 230,3 تسەنتنەر. مايلى داقىلداردى جيناۋ جۇمىستارى دا باستالدى. بۇگىندە 11 مىڭ گەكتاردان 11 مىڭ توننا ءونىم الىنعان.
ناۋقان كەزىندە جەكە شارۋا يەلەرىنىڭ وتىنىمدەرىنە سايكەس, جەڭىلدەتىلگەن باعامەن 11,3 مىڭ توننا ديزەل وتىنى بولىنگەن. قازىر 4 مىڭ تراكتور, 2,4 مىڭ كومباين, قوسىمشا 700-دەن استام سۇرانىسقا يە تەحينكاكا ەگىن جيناۋ جۇمىسىنا ارالاسىپ, قامبالاردى قازىناعا تولتىرىپ جاتىر. وبلىستا 206 مىڭ توننا استىق سىيعىزا الاتىن قابىلداۋ كاسىپورىندارى جۇمىس ىستەيدى. ارنايى ليتسەنزياسى بار 4 ەلەۆاتور مەن جالپى ساقتاۋ كولەمى 870,9 مىڭ توننا اۋىل شارۋاشىلىعى تاۋارىن وندىرۋشىلەردىڭ استىق قويمالارى قىزۋ جۇمىسقا كىرىسكەن.
«ساقتاۋ قويمالارىنىڭ قۋاتتىلىعى بولجامدى ەگىندى ساقتاۋعا جەتكىلىكتى. بيىل اۋىل شارۋاشىلىعى داقىلدارىنىڭ ءونىم كولەمىن ارتتىرۋعا 49,0 مىڭ توننا مينەرالدى تىڭايتقىش ەنگىزىلدى. كۇزگى دالا جۇمىستارى كەستەگە ساي ءجۇرىپ جاتىر. باسقارمانىڭ تىكەلەي باقىلاۋىندا تۇرعان تاعى ءبىر ماسەلە – ءتورت ت ۇلىكتى قاجەتتى ازىقپەن تولىق قامتاماسىز ەتۋ. وبلىس كولەمىندە وتپەلى قالدىق ەسكەرىلە وتىرىپ, 1 720,0 مىڭ توننا ءشوپ, 48,8 مىڭ توننا پىشەن, 85,1 مىڭ توننا سابان, 109,8 مىڭ توننا كۇنارلاندىرىلعان جەم دايىندالدى», دەيدى اباي وبلىستىق اۋىل شارۋاشىلىعى باسقارماسىنىڭ باسشىسى ەرتاي مۇباراك ۇلى.
سۋ رەسۋرستارى مينيسترلىگىمەن بىرلەسىپ 2024-2030 جىلدارعا ارنالعان سۋ ۇنەمدەۋ تەحنولوگيالارىن قولدانا وتىرىپ, سۋارمالى جەرلەردى ۇلعايتۋ جوسپارى ازىرلەنگەن.
وبلىس كولەمىندەگى 13 850 گەكتار الاڭدا سۋ ۇنەمدەۋ تەحنولوگياسىن قولدانۋ ويداعىداي جۇزەگە اسىپ, جاڭبىرلاتۋ ادىسىمەن 12 257 گەكتار, تامشىلاتۋ ادىسىمەن 1 573 گەكتار قامتىلدى. الداعى ۋاقىتتا سۋ ۇنەمدەۋ تەحنولوگياسىن پايدالانا وتىرىپ 71 718 مىڭ گەكتار الاڭدا 20-دان استام جوبانى ىسكە اسىرۋ ماقسات ەتىلىپ وتىر.
اباي وبلىسى
