سۋرەت: ru.freepik.com
بۇعان بۇرىن سالىق الىنباعان شاعىن بيزنەستەن تۇسەتىن تۇسىمدەر قوسىلعان ەدى. 2024 جىلعا ءتورتىنشى دەڭگەيدەگى بيۋدجەتكە 3,7 ملرد تەڭگە جيناۋ جوسپارلانعان. اۋىلدىق وكرۋگتىڭ ءوز قاراجاتىنىڭ بولعانى كوپتەگەن ماسەلەنىڭ شەشىلۋىنە ىقپال ەتتى. مەملەكەتتىك ورگاندى ۇستاۋدىڭ شىعىندارىنان باسقا اۋىلدىق وكرۋگكە قارايتىن اۋىلداردى جارىقتاندىرۋ, ەلدى مەكەندەردىڭ سانيتارلىق تازالىعىن قامتاماسىز ەتۋ, اباتتاندىرۋ جانە قىستىگۇنى قار تازالاۋ سياقتى ماسەلەلەر وسى بيۋدجەت ەسەبىنەن شەشىلدى. جىل وتكەن سايىن ءتۇسىمى ارتا تۇسسە, جەرگىلىكتى ەلدى مەكەندەر دە يگىلىگىن كوبىرەك كورمەك. قازىردىڭ وزىندە سولتۇستىك قازاقستاننىڭ اۋىلدىق ەلدى مەكەندەرى تۇنگى مەزگىلدە سامالاداي جارقىراپ تۇرادى. مۇنىڭ ءوزى ۇرلىق, جاستاردىڭ بۇزاقىلىعى سياقتى قىلمىس تۇرلەرىنىڭ ازايۋىنا سەپ بولىپ وتىر.
جۋىردا وبلىس اكىمىنىڭ ەكونوميكالىق سەكتوردى قاداعالايتىن ورىنباسارى قانات دۇزەلباەۆ اۋىلدىق ەلدى مەكەندەردى دامىتۋدىڭ باسقا جولدارى تۋرالى دا ايتىپ بەردى. بيىل اۋىلداعى شاعىن جانە ورتا بيزنەستى قولداۋعا مەملەكەت تاراپىنان 11,9 ملرد تەڭگە ءبولىنىپتى. الەۋمەتتىك كودەكس شەڭبەرىندە اۋىلداعى بيزنەس باستامالارىن قولداۋعا 400 اەك كولەمىندە گرانتتار بەرۋ قاراستىرىلعان.
«بۇگىنگە دەيىن 230 گرانت بەرۋ قاراستىرىلدى. ال 2023 جىلى جاستاردىڭ كاسىپكەرلىگىن دامىتۋعا بارلىعى 650 ملن تەڭگەنىڭ 150 ميكروكرەديتى بەرىلسە, سونىڭ 562 ملن تەڭگەسى اۋىلعا, ياعني 131 جاس كاسىپكەرگە بەرىلدى. 35 مىڭداي كاسىپكەرلىك سۋبەكتىسى وسى گرانتتاردىڭ ارقاسىندا اشىلدى», دەدى ق.دۇزەلباەۆ.
دەگەنمەن اۋدان اكىمدەرىنە وسى تاراپتاعى جۇمىستى بەلسەندى جۇرگىزۋ قاجەت ەكەن. بۇل ىستە كەيبىر اكىمدەر ءتىپتى شاباندىق تانىتىپ وتىر. جاستار بەلسەندىلىگىن ارتتىرۋ باعىتىندا ەشقانداي جۇمىس جۇرگىزىلمەيدى. كەرىسىنشە, باستامامەن كەلگەن جاستاردىڭ قاناتىن قىرقىپ, قولداۋدىڭ ورنىنا سەرگەلدەڭگە سالىپ قوياتىن اكىمدىكتەر بار كورىنەدى.
وڭىردەگى بيۋدجەت شىعىنىنىڭ باسىم بولىگى (بارلىق شىعىننىڭ 33 پايىزى) ءبىلىم سالاسىنا كەتەدى. بىلتىرعىدان 13,5 پايىزعا ارتىپ, 157,3 ملرد تەڭگەگە جەتتى. سونىڭ ىشىندە 6,1 ملرد تەڭگەگە ءبىلىم سالاسىنىڭ 53 نىسانى كۇردەلى جوندەۋدەن وتكىزىلگەن. «اۋىل – ەل بەسىگى» باعدارلاماسى شەڭبەرىندە 2,7 ملرد تەڭگەگە 22 اۋىلدىق ەلدى مەكەننىڭ ءبىلىم بەرۋ نىسانى جوندەلگەن. تايىنشا اۋدانىنداعى دراگوميروۆكا اۋىلىندا 120 ورىندىق جاڭا مەكتەپ قۇرىلىسى اياقتالىپ, پايدالانۋعا بەرىلدى. «جايلى مەكتەپ» ۇلتتىق باعدارلاماسى بويىنشا 2 مەكتەپتىڭ قۇرىلىسى اياقتالىپ, تاعى ەكەۋىن سالۋ قولعا الىنعان. «قازىر سولتۇستىك قازاقستاندا اپاتتى مەكتەپ دەگەن اتىمەن جوق, ءبارى دە جاڭا, ەسكىنىڭ ءبارى كۇردەلى جوندەۋدەن ءوتتى», دەيدى قانات دۇزەلباەۆ.
بىلتىر «اۋىلداعى دەنساۋلىق ساقتاۋ جۇمىسىن جاڭعىرتۋ» ۇلتتىق جوباسى شەڭبەرىندە 8 نىسان سالىنىپ, پايدالانۋعا بەرىلگەن. بيىل تاعى 38 نىساننىڭ قۇرىلىسى قولعا الىنعان. سونىڭ ىشىندە ءۋاليحانوۆ اۋدانىنىڭ ورتالىعى كىشكەنەكولدە وسى زامانعى ەمحانا قۇرىلىسى جۇرگىزىلىپ جاتىر. اۋداندىق ەم ورىندارى جاڭادان 9 سانيتارلىق اۆتوكولىككە يە بولدى. سونىمەن قاتار فليۋوروگرافيا, رەنتگەن, ۋدز اپپاراتتارىن الۋعا قوسىمشا 5,2 ملرد تەڭگە بولىنگەن. الايدا وبلىستاعى ەم ورىندارىنىڭ ماسەلەسى تولىق شەشىلدى دەپ ايتۋ قيىن. بۇگىنگە دەيىن بارلىق ەم ورنىنىڭ توزۋى 75 پايىزعا جەتكەن. وبلىس باسشىلارىنىڭ الدىندا وسى كۇردەلى ماسەلەنى شۇعىل قولعا الۋ مىندەتى تۇر.
بيىل وبلىستىڭ مادەنيەت نىساندارىن كۇردەلى جوندەۋدەن وتكىزۋگە بارلىعى 2,7 ملرد تەڭگە ءبولىنىپ, 17 عيمارات قالپىنا كەلتىرىلگەن. سونىڭ ىشىندە «اۋىل – ەل بەسىگى» باعدارلاماسى شەڭبەرىندە اۋىلدىق ەلدى مەكەندەردىڭ 5 مادەنيەت نىسانى 659 ملن تەڭگەگە جوندەلىپتى. ەسىل اۋدانىنداعى نيكولاەۆكا, تيميريازەۆ اۋدانىنداعى دميتريەۆكا, اقسۋات سياقتى ءۇش اۋىلدا مادەني-دەمالىس ورتالىقتارى بوي كوتەرگەن.
ال جول سالۋ مەن جوندەۋ جۇمىستارىنا 84,7 ملرد تەڭگە قاراجات ءبولىندى. ول 878 شاقىرىم جولداردى جوندەۋگە جۇمسالىپ جاتىر. سونىڭ ىشىندە پەتروپاۆل قالاسىنىڭ 57 كوشەسىنىڭ جولى جوندەلىپ جاتىر. وعان 7,4 ملرد تەڭگە بولىنگەن. قالا اكىمى سەرىك مۇحامەديەۆتىڭ ايتۋىنشا, الداعى ءتورت جىلدىڭ ىشىندە باعدارلاماعا سايكەس جىلىنا 5 ملرد تەڭگەدەن ءبولىنىپ وتىرسا, پەتروپاۆلدىڭ بارلىق كوشەسىنە اسفالت توسەلمەك. قازىردىڭ وزىندە ورتالىق كوشەلەردە تۇراتىن پەتروپاۆل تۇرعىندارى ءجونى ءتۇزۋ جولدارعا قول جەتكىزدى.
سولتۇستىك قازاقستان وبلىسى
