وبلىستىق ءبىلىم باسقارماسى ءباسپاسوز قىزمەتىنىڭ اقپاراتىنا سۇيەنسەك, جاس ونەرپاز «Greece Hope» حالىقارالىق فەستيۆالىندە باق سىناعان. بۇل فەستيۆالعا الەمنىڭ 19 ەلىنەن جاس ونەرپازدار قاتىسىپتى.
«ن.تىلەنديەۆ اتىنداعى مامانداندىرىلعان مەكتەپ-گيمنازيا-ينتەرناتىنىڭ وقۋشىسى ديلناز ەجىروۆا حالىقارالىق بايقاۋدا اعىلشىن تىلىندەگى «Love Story» ءانىن ورىندادى. قازىلار القاسى ونەرپازدىڭ ەرەكشە داۋسى مەن ساحنادا ءوزىن ۇستاۋ مادەنيەتىنە ءتانتى بولىپ, باس جۇلدەگە لايىق دەپ تاپتى», دەپ حابارلادى باسقارمانىڭ ءباسپاسوز قىزمەتى.
جاس ونەرپازدى ۇستازى الما نۇراشەۆا شەبەرلىگىن شىڭداۋعا باۋلىپ ءجۇر. ۇستازىنىڭ ايتۋىنشا, 13 جاستاعى ءانشى ديلناز ەجىروۆا بۇعان دەيىن بىرنەشە رەت رەسپۋبليكالىق جانە حالىقارالىق بايقاۋلاردا ونەر كورسەتىپتى. ول – ۆوكال جانرىندا ۇزدىك ناتيجە كورسەتىپ جۇرگەن تالانتتى شاكىرتىنىڭ ءبىرى.
«ديلنازدىڭ بۇل جەڭىسى – شىعارماشىلىعىنداعى جاڭا جەتىستىگى. مۇنى ەلىمىزدىڭ ونەر سالاسىنا قوسىلعان زور ۇلەس دەۋگە بولادى. الەمدىك ونەر سايىسىندا ەلىمىزدىڭ اتىن اسقاقتاتقان جاس ءانشى بولاشاقتا دا جاڭا جەتىستىككە جەتۋگە تالپىنادى. ويتكەنى ول – جاس بولسا دا تالانتى شىڭدالىپ كەلە جاتقان ونەرپاز», دەيدى الما نۇراشەۆا.
اتىراۋ وبلىسى
