– نەسىپ اعا, الاۋگەر بولىپسىز, قۇتتى بولسىن!
– ايتسىن. الاۋ ەستافەتاسىنا قاتىساتىن 29 ادام الماتى قالاسىنىڭ اكىمى باۋىرجان بايبەكتىڭ قابىلداۋىندا بولدىق. ارامىزدا وليمپيادا چەمپيوندارى جاقسىلىق ۇشكەمپىروۆ, ەرمۇحان ىبرايىموۆ, ولگا شيشيگينا, دميتري بالاندين, رەسپۋبليكالىق سپورت كوللەدجىنىڭ ديرەكتورى امالبەك تشانوۆ, قازۇۋ رەكتورى عالىمقايىر مۇتانوۆ, ونەر ادامدارىنان ساكەن مايعازيەۆ, قايرات نۇرتاس سەكىلدى ەلىمىزگە بەلگىلى تۇلعالار بار. مەنى الاۋگەرلەر قاتارىنا شاقىرۋى سپورت جۋرناليستيكاسىنا دەگەن قۇرمەت دەپ بىلەمىن. مۇنىڭ الدىنداعى قىسقى ازيادادا دا الاۋ الىپ جۇگىرگەن بولاتىنمىن. ەڭبەگىمىزدى باعالاعانى شىعار…
– ءسىز قاي ارالىقتا جۇگىرەسىز؟
– سەيفۋللين كوشەسى بويىمەن تومەن قاراي قازىبەك بي كوشەسىنەن تولە بي كوشەسىنە دەيىن 200 مەتر جۇگىردىم. مەن 200 مەتر جۇگىرگەن كەزدە ءبىر دارىندى بالانىڭ جۇرەگىندە سپورتقا دەگەن ماحاببات وتىن جاعا السام, ءبىر ماقساتقا جەتتىم دەپ ەسەپتەر ەدىم. قازاقستان بويىنشا ءاربىر الاۋگەر ءبىر بالانىڭ سپورتقا دەگەن ىقىلاسىن تۋدىرسا, ياعني 800 بالانىڭ جۇرەگىندە وت جاقسا, تاماشا ەمەس پە؟!
– ۋنيۆەرسيادا تۋرالى ويىڭىز قانداي؟
– وتكەن عاسىردىڭ 70-ءشى جىلدارىنداعى سەيداحمەت بەردىقۇلوۆ, سۇلتانعالي قاراتاەۆ, جاقسىلىق تەمىربەكوۆ اعالارىمىزدىڭ زامانىندا ءبىز مۇندايدى ارمانداعان دا جوقپىز. قازاقستاندا وسىنداي سپورت عيماراتتارى سالىنادى, ازيادا, ۋنيۆەرسيادا وتەدى دەگەن ءۇش ۇيىقتاساق ءتۇسىمىزگە كىرمەگەن. بۇل دەگەن ەلىمىز وركەنيەت كوشىنە ىلەستى دەگەن ءسوز. سوعان قۋانۋ كەرەك. كەيبىر كەراۋىز باق كوپ اقشا كەتەدى, وسىنىڭ نە كەرەگى بار دەپ سارىۋايىمعا سالىنادى. مەن ايتار ەدىم: ءيا كوپ اقشا كەتەدى, بىراق بۇل ءبىزدىڭ سپورتىمىزدىڭ دامۋىنا ءدۇمپۋ, قوزعالىس بولماي ما؟ قانشاما سپورت نىساندارى سالىندى, سولاردىڭ ءبارى كەلەشەكتە ەل يگىلىگى ءۇشىن جۇمىس ىستەيدى عوي. الاتاۋىمىز, «مەدەۋىمىز», «شىمبۇلاعىمىز» بار, سولاردى الەمگە ايگىلەي بەرگەننەن ۇتىلمايمىز. اندا-ساندا, جيىرما جىلدا ءبىر ۇلكەن سپورت جارىسىن ءوتكىزبەگەندە ولاردى نە ىستەيمىز؟
– سىزدىڭشە وسى ۋنيۆەرسيادادا قازاقستان قۇراماسىنىڭ ءمۇمكىندىكتەرى قانداي؟
– ارينە, قازاقستان توپ جارا قويماس, يتاليا, نورۆەگيا, رەسەي جانە باسقا دا قىسقى سپورتى مىقتى ەلدەر بار. ءبىز ۇشتىكتىڭ, بەستىكتىڭ ىشىنە ىلىكسەك تە ۇلكەن ولجا. قازاق ەلىنىڭ نامىسىن قاشانعى سميرنوۆتار مەن كوۆالچۋكتار قورعايدى؟ ەندى كەزەك ءوزىمىزدىڭ قىز-جىگىتتەرگە كەلدى. كەشەگى سوچيدە جۇلدەگە ءبىر تابان جاقىن بولعان, بۇگىندە تالاي دودالاردا توپ جارىپ جۇرگەن شورت-ترەكشىلەر ايدار بەكجانوۆ, نۇربەرگەن جۇماعازيەۆ, ابزال اجعاليەۆ, اسلان داۋموۆ, فريستايلشى, الەم چەمپيوناتى مەن الەم كۋبوگىنىڭ كۇمىس جۇلدەگەرى جانبوتا الدابەرگەنوۆا سياقتى دارىندى سپورتشىلارىمىز بار! سولاردى كورسەتۋىمىز كەرەك, شاشباۋىن كوتەرۋىمىز كەرەك. جۋرناليستەرگە ايتارىم: ۋنيۆەرسيادانىڭ كولەڭكەسىن ەمەس, كۇنگەيىن كورسەتۋ قاجەت. ەگەمەن ەلىمىزدى دارىپتەي ءبىلۋىمىز كەرەك.
– قازىر ءوزىڭىز قايدا قىزمەت ءىستەيسىز؟
– مەن قازىر «قازسپورت» تەلەارناسىندا كەلىسىمشارت بويىنشا ساراپشى-رەداكتورلىق قىزمەتتەمىن, تەلەجۋرناليستەردىڭ ءتىلى مەن ءستيلىنىڭ دۇرىس بولۋىن قاداعالايمىن, مۇمكىندىگىنشە اقىل-كەڭەسىمدى بەرەم. ءتىل دۇرىس بولۋى كەرەك, قازاقتىڭ كوركەم ءتىلى سپورتتا دا ۇستەمدىك قۇرۋى ءۇشىن ەڭبەك ەتىپ جاتقان جايىم بار.
– اڭگىمەڭىزگە راحمەت! قازاق ەلىنىڭ سپورتتاعى ابىرويى ارتا بەرسىن!
قايرات ءابىلدينوۆ,
«ەگەمەن قازاقستان»
استانا
