«جاماندىق ايتىپ كەلمەيدى» دەگەن. سوڭعى جىلدارى ەلىمىزدىڭ ءار وڭىرىندە بولعان ءورت پەن تاسقىن سۋ اپاتى كەزىندەگى ءتۇرلى قيىندىق حالقىمىزدى سىنادى. بىرلىگىمىزدى ارتتىردى. ءومىر مەن ءولىم ارپالىسىنداعى قاسيەتىمىزدى شىڭدادى.
«سەمەي ورمانى» رەزەرۆاتىنا قاراستى بورودۋليحا اۋدانى كامىشەنكا ورمان شارۋاشىلىعىنىڭ جانىندا قىزمەتتىك بورىشىن ورىنداۋ كەزىندە عۇمىرى ۇزىلگەن ورمانشىلارعا ارنالعان ەسكەرتكىشتىڭ اۆتورى – تالانتتى ءمۇسىنشى, وسىعان دەيىن ەلىمىزگە تانىمال تۇلعالاردىڭ بەينەسىن سومداعان نۇربول قاليەۆ. ورمانشىلاردىڭ ەرلىگىن اسپەتتەگەن ءمۇسىننىڭ بيىكتىگى – گرانيت تۇعىرىمەن قوسا ەسەپتەگەندە 8 مەتر. بۇعان قوسا قولادان جاسالعان ەسكەرتكىش قازا تاپقانداردىڭ باتىلدىعى مەن ءوز ىستەرىنە ادالدىعىن بەينەلەيتىن رەلەفتەرمەن بەزەندىرىلگەن.
ء«بىر ەسكەرتكىشپەن ءبىراز نارسە ايتۋعا بولاتىنىن ەسكەرسەك, وسى جۇمىس ارقىلى ورمان ءورتى كەزىندە قازا تاپقانداردىڭ ەسىمىن ەل جادىندا جاڭعىرتىپ, كەلەشەك ۇرپاققا كەڭ كولەمدە ناسيحاتتاي الامىز. بيىلعى جىلى ءساۋىر ايىندا باستالعان شىعارماشىلىق جۇمىستىڭ ناتيجەسىندە ەل ءۇشىن باسىن بايگەگە تىككەن بۇگىنگىنىڭ باتىرلارىن ۇلىقتاۋ پارىز بولدى», دەيدى ءمۇسىنشى ن.قاليەۆ.
ەسكەرتكىشتىڭ سالتاناتتى اشىلۋ راسىمىندە وپات بولعان ورمانشىلاردى ءبىر مينۋت ۇنسىزدىكپەن ەسكە الدى. وبلىس اكىمى نۇرلان ۇرانحاەۆ جەرلەستەرىمىزدىڭ ەرلىگى تەك وسى ءوڭىردىڭ عانا ەمەس, بارشا وتانداسىمىز ماقتاناتىن قۇبىلىس ەكەنىن جەتكىزدى.
«قارا ورماندى قادىرلەپ, ەرلىك پەن ورلىكتىڭ جارقىن ۇلگىسىن كورسەتكەندەر ۇرپاق جادىندا ماڭگى ساقتالادى. بۇل تۇعىرتاس تابيعاتتىڭ توسىن مىنەزىنە توتەپ بەرگەن ازاماتتاردىڭ اتىن ايگىلەۋ ءۇشىن ارنايى قويىلىپ وتىر. ەسىمدەرى تاريح تاقتاسىنا التىن ارىپپەن جازىلىپ, ۇرپاعى ماقتان ەتەر جەرلەستەرىمىزگە, ءبىز, قاشاندا باسىمىزدى يەمىز», دەدى ءوڭىر باسشىسى.
قازا بولعان ورمانشىنىڭ تۋىسى اراي ءامىرحانوۆا اشىلعان ەسكەرتكىشتىڭ مارقۇمدارعا كورسەتىلگەن زور قۇرمەت ەكەنىن اتاپ ءوتتى. سونىمەن قاتار سوناۋ قايعىلى كۇندەردەن باستاپ جان جارىنان, ۇلىنان, اعا-باۋىرىنان ايىرىلعان جانداردىڭ مەملەكەت تاراپىنان كورسەتىلگەن قولداۋدى تەرەڭ سەزىنگەنىن ءمالىم ەتتى.
وتكەن جىلى ماۋسىم ايىندا بولعان قايعىلى وقيعا مەزەتىندە مەملەكەت باسشىسى قاسىم-جومارت توقاەۆ اباي وبلىسىنا ارنايى كەلىپ, قىزمەتىن اتقارۋ كەزىندە كوز جۇمعانداردىڭ ەسىمى ەلەۋسىز قالمايتىنىن ايتقان ەدى. بوي كوتەرىپ وتىرعان ەڭسەلى ەسكەرتكىش تە ەلدىكتىڭ نىشانى رەتىندە بەيبىت زامان باتىرلارىنىڭ ەسىمىن جۇرت جادىندا جاڭعىرتتى.
اباي وبلىسى
