مىسالى, سايرام اۋدانى قارابۇلاق اۋىلدىق وكرۋگىنىڭ №580 رەفەرەندۋم ۋچاسكەسىندە ەكىنشى دۇنيەجۇزىلىك سوعىسىنىڭ ارداگەرى احمەدجان انارتاەۆ ءوز تاڭداۋىن جاسادى. رەفەرەندۋمعا كەلۋشىلەرگە, ونداعى كوميسسيا مۇشەلەرى مەن بايقاۋشىلارعا اق باتاسىن بەرگەن مايدانگەر اقساقال 1926 جىلى 10 قاراشادا وڭتۇستىك قازاقستان وبلىسىنىڭ سايرام اۋدانىنداعى قارابۇلاق اۋىلىندا دۇنيەگە كەلگەن. 1944 جىلعى 5 مامىردا سايرام اۋداندىق اسكەري كوميسسارياتىنان اسكەرگە شاقىرىلىپ, 64-اتقىشتار پولكىندە قىزمەت ەتتى. قاتارداعى جاۋىنگەر شەنىندە پولشانى ازات ەتۋ جولىنداعى شايقاستارعا, گەرمانياداعى ۇرىستارعا قاتىستى. ءىى دارەجەلى «وتان سوعىسى» وردەنىمەن جانە بىرنەشە مەدالمەن ماراپاتتالعان.
«ەلدىڭ بولاشاعى ءۇشىن ءاربىر قازاقستاندىق رەفەرەندۋمدا ءوز داۋىسىن بەرۋگە مىندەتتى. بۇگىنگىدەي ەل ەڭسەسىن تىكتەگەن شاقتا اۋىزبىرلىگىمىز مىقتى بولۋعا ءتيىس», دەيدى 9 بالاسى, 28 نەمەرەسى, 5 شوبەرەسى بار قارت مايدانگەر.
ال قازىعۇرت اۋدانىندا «اجەلەر القاسى» قوعامدىق ۇيىمىنىڭ مۇشەلەرى العاشقىلاردىڭ ءبىرى بولىپ, ءوز تاڭداۋىن جاسادى. «اجەلەر القاسى» ۇيىمىنىڭ مۇشەسى, قازىعۇرت اۋدانىنىڭ قۇرمەتتى ازاماتى قاتيرا بەكمۇراتوۆا اۋىلداستارىن ەل بولاشاعى ءۇشىن ماڭىزى جوعارى رەفەرەندۋمدا تاڭداۋ جاساۋعا شاقىردى. تۇلكىباس اۋدانىندا دا اق جاۋلىقتى اجەلەر ءوز سايلاۋ ۋچاسكىلەرىنە كەلىپ, تاڭداۋ جاسادى. سونداي-اق ولار بارلىق ۋچاسكەگە بارىپ ءان ايتىپ, شاشۋ شاشىپ, قۇرت-باۋىرساقتارىن سايلاۋشىلارعا ۇسىنىپ, حالىقتىڭ كوڭىل كۇيىن كوتەردى.
ال وبلىس اكىمى دارحان ساتىبالدى تۇركىستان قالاسىنداعى №133 ۋچاسكەسىنە بارىپ, ءوز تاڭداۋىن جاسادى. ق.ا.ياساۋي اتىنداعى حقتۋ-دەگى №133 داۋىس بەرۋ ۋچاسكەسى اۋماعىندا كىتاپ جارمەڭكەسى ۇيىمداستىرىلىپ, ناۋقانعا بەلسەنە قاتىسىپ, ءوز تاڭداۋىن جاساۋعا كەلگەن قالا تۇرعىندارىنا ءتۇرلى جانرداعى كىتاپتاردى ساتىپ الۋعا مۇمكىندىك جاسالدى.
ال كەنتاۋ قالاسىندا كوكپارشىلار جينالىپ, بىرگە داۋىس بەرۋدى ءجون ساناپتى. ساپتاما ەتىك كيىپ, توبىلعى قامشى ۇستاعان ولار ءوز تاڭداۋىن جاسادى.
جالپى, تۇركىستان وبلىسىندا 1 ملن 180 مىڭنان اسا داۋىس بەرۋشى بار. ورتالىق رەفەرەندۋم كوميسسياسىنان 13 رەسپۋبليكالىق قوعامدىق بىرلەستىك, وبلىستىق اۋماقتىق رەفەرەندۋم كوميسسياسىنان 32 قوعامدىق بىرلەستىك اككرەديتاتسيادان وتكەن. بارلىق 945 رەفەرەندۋم ۋچاسكەسىندە 6 433 بايقاۋشى مەن 20 ءموبيلدى كاپيتان, سونداي-اق 167 اۋىلدىق ەلدى مەكەندە تۇرعىنداردى تەكسەرۋ ءۇشىن جىلجىمالى مەديتسينالىق پۋنكتتەر جۇمىس ىستەدى. داۋىس بەرۋگە العاشقى كەلگەندەرگە ارنايى سىيلىقتار تابىس ەتىلدى. وبلىس بويىنشا قوعامدىق كولىكتەر تەگىن قاتىنادى. كولىك دەمەكشى, بارلىق اۋدانداردا «ينۆاتاكسي», الەۋمەتتىك تاكسيلەر قىزمەت كورسەتتى. مىسالى, ماقتاارال اۋدانىندا مۇگەدەكتىگى بار ازاماتتارعا جاعداي جاساۋ ءۇشىن 61 سايلاۋ ۋچاسكەلەرى ارنايى كابينالار, تاكتيلدىك كورسەتكىشتەرمەن, مونيتورلى كومپيۋتەر, ۇلعايتقىشتار, تۇتقالارمەن جانە پاندۋستارمەن تولىق جابدىقتالعان. سونىمەن قاتار 11 سۋردو-تيفلو اۋدارماشى, 3 «ينۆاتاكسي», 4 الەۋمەتتىك تاكسيلەرىمەن قامتاماسىز ەتىلدى.
تۇركىستان وبلىسى
