– رەسپۋبليكالىق رەفەرەندۋمعا تىڭعىلىقتى دايىندىقپەن كەلدىك. وبلىستا 681 سايلاۋ كوميسسياسى بولسا, رەفەرەندۋمدا سونىڭ 510-ى, ياعني قۇرامىندا 3 220 مۇشەسى بار 14 اۋماقتىق رەفەرەندۋم كوميسسياسى جانە 496 ۋچاسكەلىك رەفەرەندۋم كوميسسياسى جۇمىس ىستەدى. كوميسسيا مۇشەلەرى الدىن الا تولىق وقىتىلدى. ولاردىڭ 74,8 پايىزى بۇرىن دا سايلاۋ وتكىزگەن, تاجىريبەلى ماماندار, – دەيدى باتىس قازاقستان وبلىستىق اۋماقتىق رەفەرەندۋم كوميسسياسىنىڭ توراعاسى ءادىل جولامانوۆ.
وبلىس بويىنشا داۋىس بەرۋ ورال قالاسىندا ورنالاسقان ۇلتتىق ۇلاننىڭ 5517 اسكەري بولىمىندە باستالدى. ۇلان ساربازدارى ەرتەمەن جاۋىنگەرلىك قىزمەتكە اتتاناتىن بولعاندىقتان, №479 داۋىس بەرۋ ۋچاسكەسى تاڭعى ساعات 06.00-دە اشىلدى. داۋىس بەرۋ ورنىنا العاشقىلاردىڭ ءبىرى بولىپ ۇلتتىق ۇلان «باتىس» وڭىرلىك قولباسشى گەنەرال-مايور بەكايدار قازكەەۆ پەن 5517 اسكەري ءبولىم كومانديرى پودپولكوۆنيك ءومىرجان ساحاتوۆ كەلىپ داۋىس بەردى.
ال باتىس قازاقستان وبلىسىنىڭ اكىمى ناريمان تورەعاليەۆ ورالداعى اقپاراتتىق تەحنولوگيالار كوللەدجىندەگى ۋچاسكەدە تاڭداۋىن جاسادى.
«مەن دە داۋىس بەرۋ ۋچاسكەسىنە كەلىپ, ازاماتتىق بورىشىمدى وتەدىم. ەلىمىزدىڭ ءار تۇرعىنى داۋىس بەرۋ ۋچاسكەلەرىنە كەلىپ, تاڭداۋىن جاساي الادى. وبلىس تۇرعىندارى وزدەرىنىڭ ازاماتتىق پوزيتسياسىن بەلسەندى كورسەتەدى دەگەن سەنىمدەمىن», دەدى ن.تورەعاليەۆ.
مالىمەتتەرگە قاراعاندا, وبلىس بويىنشا ادەتتەگىدەي اۋىل تۇرعىندارى بەلسەندىلىك تانىتقان. مىسالى, شىڭعىرلاۋ اۋدانىنا قاراستى اقسۋات اۋىلىندا تۇراتىن كامەلەت جاسىنداعى 90 ادام ءبىر ساعات ىشىندە داۋىس بەرۋدى اياقتاعان. اۋىل بولىپ 100 پايىز داۋىس بەرگەندەر قاتارىندا قازتالوۆ اۋدانىنداعى ورازعالي اۋىلى, جانىبەك اۋدانىنداعى مايتۇبەك اۋىلدارى دا بار.
ءوڭىر بويىنشا ەڭ قاريا سايلاۋشى دا شىڭعىرلاۋدا ەكەن. 104 جاستاعى نۇرسۇلۋ توقجانوۆانىڭ ۇيىنە №424 رەفەرەندۋم كوميسسياسىنىڭ مۇشەلەرى جىلجىمالى جاشىكتى جەتكىزىپ, داۋىس بەرۋىنە مۇمكىندىك جاساعان.
جالپى, وبلىس بويىنشا رەفەرەندۋم وتە ۇيىمشىلدىقپەن ءوتتى. داۋىس بەرەتىن جەرگە ۇلتتىق كيىممەن كەلگەن بايتەرەكتىك كەلىندەر توبى, ميچۋرين اۋىلىنداعى بايكەرلەر, رەفەرەندۋمعا 100 پايىز قاتىسقان تەرەكتىلىك ءبىلىم سالاسى وكىلدەرى كوزگە ءتۇستى.
باتىس قازاقستان وبلىسى
