سول كۇنى تاڭەرتەڭ قوستانايداعى №11 ۋچاسكەگە بارىپ, ءوز تاڭداۋىمىزدى جاسادىق. اتالعان ۋچاسكەگە تىركەلگەن 2 568 ادامنىڭ الدى بولىپ زەينەتكەر ءۇمىت يسمايىلوۆا داۋىس بەردى.
«بۇل – اسا ماڭىزدى ءارى تاريحي كۇن. ءبىز رەفەرەندۋم بولسىن, سايلاۋ بولسىن, ەرتە كەلىپ داۋىس بەرۋگە ادەتتەنگەنبىز. ءبىرىنشى بولىپ كەلىپ, كوتەرىڭكى كوڭىل كۇيمەن ۇيگە قايتىپ بارامىز. بالا-شاعامىزدىڭ ەرتەڭى جارقىن بولسا ەكەن دەپ تىلەيمىز. سول ءۇشىن داۋىس بەرىپ, ءوز تاڭداۋىمىزدى جاسادىق. ەڭ باستىسى, ەلىمىز امان, ىرگەمىز ءبۇتىن بولىپ, كەز كەلگەن ماسەلەنى اقىل-پاراسات بەزبەنىنە سالىپ, بايىپپەن شەشكەن دۇرىس. رەفەرەندۋم دا وسى ماقساتتا ۇيىمداستىرىلىپ وتىر دەپ ويلايمىن», دەيدى ەكى نەمەرەسىن ەرتە كەلگەن ءۇمىت اجەي.
تۇسكە تامان №860 ۋچاسكەگە باس سۇعىپ ەدىك, حالىق قاراسى كوپ ەكەن. مۇندا 2 408 ادام تىركەلگەن. سونىڭ 40 پايىزعا جۋىعى ءوز تاڭداۋىن جاساپ ۇلگەرىپتى.
«حالىق بەلسەندى داۋىس بەرىپ جاتىر. رەفەرەندۋمعا قاتىسۋشىلار ءۇشىن ىستىق شاي, مەدپۋنكت ۇيىمداستىرىپ قويدىق. بىزدەن بولەك, ەكى باقىلاۋشى جۇمىس ىستەپ جاتىر», دەدى ۋچاسكە توراعاسى قانات ايمۇحامەدوۆ.
بۇل ۋچاسكەدە كوپپەن بىرگە ەلۋباي ومىرزاقوۆ اتىنداعى وبلىستىق فيلارمونيا ديرەكتورىنىڭ ورىنباسارى باعدات وسپانوۆ داۋىس بەرىپ جاتىر ەكەن.
«رەفەرەندۋمعا قازاقستاننىڭ ازاماتى, وسى ەلدىڭ پاتريوتى رەتىندە ءوز داۋسىمدى بەرۋ ءۇشىن كەلدىم. ۋچاسكەگە كىرىپ كەلگەندە حالىقتىڭ اعىلىپ جاتقانىن كوزىم شالدى. بۇل حالىقتىڭ ەل بولاشاعىنا بەيجاي قارامايتىنىن بىلدىرەدى. ءوتىپ جاتقان رەفەرەندۋمدى ەلدەگى دەموكراتيالىق ۇدەرىستەردىڭ جاڭا ءبىر كورىنىسى دەپ ەسەپتەيمىن. قازاقستاننىڭ دامۋىنا وڭ سەپتىگىن بەرمەسە, ەشقانداي زيانى بولمايتىنىنا سەنىمىم كامىل», دەدى ب.وسپانوۆ.
قوستاناي وبلىسى
