ولار كوپ تالقىسىنا ءتۇسىپ, تاڭداۋ جاسالاتىن اەس تاقىرىبىن تاعى ءبىر تالقىلاي كەلە, ءوز شەشىمىن بەلگىلەۋگە بەل بۋدى. سولاردىڭ ءبىرى جەكە كاسىپكەر – راحيما قايىربەكوۆا.
«رەفەرەندۋمنىڭ ماڭىزى زور. ويتكەنى بۇل – ەلدىڭ بولاشاعىنا قاتىستى شەشىمدەردى حالىقتىڭ ءوزى قابىلدايتىن ءسات. ءاربىر داۋىس بەرۋشىنىڭ تاڭداۋى ماڭىزدى. ءبىز ءوز تاڭداۋىمىز ارقىلى مەملەكەتىمىزدىڭ دامۋىنا ىقپال ەتەمىز. رەفەرەندۋمعا قاتىسۋعا ءوزىمنىڭ ازاماتتىق بورىشىم تۇرتكى بولدى. حالىقتىڭ تاڭداۋىن ەلەمەۋ دۇرىس ەمەس دەپ ويلايمىن. ءوز بولاشاعىمىزعا نەمقۇرايدى قاراۋعا بولمايدى», دەيدى ول.
زەينەت جاسىنداعى ينجەنەر-مەحانيك, ۇلكەن اۋىلىنىڭ تۇرعىنى سەرگەي ترەتياكوۆ بولسا: «مەن ءۇشىن رەفەرەندۋمعا قاتىسۋ – ەلىمىزدىڭ بولاشاعىنا تىكەلەي اسەر ەتۋ مۇمكىندىگى. بۇل – ارقايسىمىزدىڭ ماڭىزدى شەشىمگە قاتىستى ءوز پىكىرىمىزدى بىلدىرەتىن ءسات جانە ءوز قۇقىعىمدى پايدالانىپ, داۋىس بەرە العانىما قۋانىشتىمىن. وزگەرىستەردى قالاساق, مۇددەلەرىمىز ەسكەرىلسىن دەسەك, وسىنداي شارالارعا قاتىسۋىمىز كەرەك. ماڭىزدى ماسەلەدە شەت قالۋعا بولمايدى», دەگەن ويىن ورتاعا سالدى.
داۋىس بەرۋشىلەر قاتارىنداعى تىگىن جانە توقۋ جابدىقتارى بويىنشا ينجەنەر-مەحانيك, زەينەتكەر تاتيانا ۆەتروۆا رەفەرەندۋمعا قاتىسىپ, ازاماتتىق ۇستانىمىن بىلدىرۋگە مۇمكىندىك بەرگەن مەملەكەت باسشىسى قاسىم-جومارت توقاەۆقا العىسىن ءبىلدىردى.
سونداي-اق بۇل كۇنگى ءىس-شارادا قوناەۆ قالاسىنداعى №949 داۋىس بەرۋ ۋچاسكەسىنە كەلگەن تۇرىسپەك دوسپانبەتوۆ اقساقال جينالعاندارعا اق باتاسىن بەردى. بۇكىل سانالى عۇمىرىن تۋعان جەرگە ارناعان قاريا بورىشىن وتەۋگە كەلگەن ءاربىر جاندارعا اق تىلەۋىن جەتكىزدى.
بۇل ۋچاسكەدە الماتى وبلىسىنىڭ اكىمى مارات سۇلتانعازيەۆ تە داۋىس بەردى. مۇنداي ءىس-شارالار قوعام بىرلىگىن ساقتاپ, ءاربىر ازاماتتى ەلدىڭ ساياسي ءومىرىنىڭ بەلسەندى قاتىسۋشىسىنا اينالدىراتىنىن ايتقان اكىم سايلاۋ ۋچاسكەسىنە كەلگەن داۋىس بەرۋشىلەردىڭ بارلىعىنا العىسىن ءبىلدىردى.
ەل تاريحىندا ەرەكشە ماڭىزعا يە رەفەرندۋمدا كەگەن اۋدانى ۇزىنبۇلاق اۋىلىنداعى №573 رەفەرەندۋم ۋچاسكەسىنە ءبىر اۋلەتتىڭ بەس بۋىنىنىڭ وكىلدەرى كەلىپ داۋىس بەردى. 103 جاستاعى ءاز-انا شورتانوۆا كۇلپارا مەن ونىڭ 80-نەن اسقان ۇلى مارات تاقاباي ۇلى, 50 جاستاعى نەمەرەسى ولجاس, 25 جاستاعى شوبەرەسى بەيبىت جانە 18 جاستاعى شوبەرەسى مارال ءوز تاڭداۋىن جاسادى. ۇرپاقتار ساباقتاستىعى مەن ىنتىماق-بىرلىگىن ايقىنداعان وتباسى مۇشەلەرى ەل ەرتەڭى ءۇشىن ايرىقشا مانگە يە شارادان شەت قالمادى. اراسىنداعى 18 جاسار مارال بۇگىن العاش رەت داۋىس بەردى.
ۇيعىر اۋدانىنىڭ جاستارى داۋىس بەرۋگە شىعارماشىلىق تۇرعىدا قاراپ, ازاماتتىق بەلسەندىلىك تانىتتى. شونجى اۋىلىنداعى الاڭعا بەس ۇل مەن بەس قىز ۇلتتىق كيىممەن كەلىپ, مەرەكەلىك كوڭىل كۇي سىيلادى. جاستاردىڭ باستى ماقساتى – وزگەلەردى ەل ومىرىنە ارالاسۋعا تارتىپ, ءاربىر داۋىستىڭ ماڭىزدى ەكەنىن كورسەتۋ بولدى. جارقىن كيىم مەن جاقسى اسەر داۋىس بەرۋ ءۇشىن كەلگەندەردىڭ بارلىعىنا ۇمىتىلماس ءسات سىيلادى.
ال تالعار قالاسىندا جاس جۇبايلار ءوز ازاماتتىق مىندەتىن ورىنداۋدى كەيىنگە قالدىرماۋعا شەشىم قابىلداپ, نەكە قيۋ كۇنى داۋىس بەرۋ ۋچاسكەسىنە باردى. ولار پانفيلوۆ اۋىلىنداعى №880 ۋچاسكەسىنە توي كيىمدەرىمەن كەلىپ, ءوز تاڭداۋىن جاسادى. ولاردىڭ بۇل شەشىمدەرى اۋىل تۇرعىندارى مەن داۋىس بەرۋ ۋچاسكەسىندەگى كوميسسيا مۇشەلەرىنىڭ جۇزىنە جىلۋ سىيلادى.
الماتى وبلىسى
