سەمەي قالالىق مادەنيەت سارايىنداعى №84 ۋچاسكەلىك رەفەرەندۋم كوميسسياسىنىڭ توراعاسى اينۇر مۇراتقاننىڭ ايتۋىنشا, اتالعان اۋماقتا 1 مىڭنان اسا ادام داۋىس بەرگەن.
– ءبىزدىڭ ۋچاسكەدە العاش رەت 50 جاس ازامات داۋىس بەردى. ولارعا رەفەرەندۋم كوميسسياسى مۇشەلەرى ەستەلىك سىيلىق تابىس ەتتى. سونىمەن قاتار ۋچاسكەدە تىركەلگەن داۋىس بەرۋشىلەردىڭ ىشىندە 52 سايلاۋشى وزدەرىنىڭ ءۇي-جايلارىندا تاڭداۋىن جاسادى, – دەيدى ا.مۇراتحانقىزى.
قوعامدىق كولىكتەر تۇرعىندار مەن مەيمانداردى تەگىن تاسىمالدادى. ۋچاسكەلەردە مۇمكىندىگى شەكتەۋلى ادامدارعا ارنايى تاكتيلدى كورسەتكىشتەر, پاندۋستار ورناتىلعان. ۋچاسكەلەردە ونداي ازاماتتارعا ارنالعان كابينالار سانى 110-دى قۇراپ, 6 سۋردواۋدارماشى مەن 16 ينۆوتاكسي كومەك قولىن سوزدى.
وبلىس ورتالىعىنىڭ شەتىندەگى ۆوسحود كەنتىنىڭ تۇرعىندارى №108 ۋچاسكەدە داۋىس بەردى.
«كامەلەتتىك جاسقا تولىپ, العاش رەت رەفەرەندۋمعا قاتىسقاندار – 4 ادام. ال تاڭعى 9.00-دەن باستاپ ۋچاسكەدەگى رەفەرەندۋم كوميسسياسىنىڭ مۇشەلەرى ءۇي-ءۇيدى ارالاپ, اق جاۋلىقتى انالار مەن اقساقالداردىڭ جالپىۇلتتىق ناۋقاننان شەت قالماۋىنا جاعداي جاسادى», دەيدى رەفەرەندۋم كوميسسياسىنىڭ توراعاسى جاننا داۋكەنقىزى.
قىرىق جىلدان اسا اۋىل شارۋاشىلىعى سالاسىندا ايانباي ەڭبەك ەتكەن 80 جاستاعى مەيرامحان شىناروۆ اقساقال كوميسسيا مۇشەلەرىن ىقىلاسپەن قارسى الىپتى. زايىبىمەن بىرگە ءوز شاڭىراعىنان داۋىس بەرۋگە ءوتىنىش بىلدىرگەن ولار ەلدەگى وزگەرىستى, ادىلەتتىلىكتى قولدايتىنىن جەتكىزدى.
اباي وبلىسى
