بۇگىندە اقمولا وبلىستىق ارداگەرلەر ۇيىمىنىڭ قۇرامىندا 113 مىڭنان استام زەينەتكەردى بىرىكتىرەتىن 763 باستاۋىش ارداگەرلەر ۇيىمى, 3 قالالىق, 17 اۋداندىق ارداگەرلەر كەڭەسى, 5 مايدانگەر, 1697 تىل ەڭبەككەرى, 800-دەي اۋعان سوعىسىنا قاتىسۋشى, بۇدان باسقا چەرنوبىل اتوم ەلەكتر ستانساسىنداعى اپاتتى جويۋعا قاتىسۋشىلار بار.
ارداگەرلەر ۇيىمدارىنىڭ جۇمىسى جۇيەلى, جوسپارلى تۇردە جۇرگىزىلەتىنىن, ولار جەرگىلىكتى اتقارۋشى ورگانداردىڭ ۇدايى نازارىندا تۇراتىنىن اتاپ ءوتۋ كەرەك. جىل سايىنعى قارتتار ايلىعى كەزىندە ءار كوزدەن ماتەريالدىق كومەك كورسەتۋگە قارجى بولىنەدى. جالپى, وبلىستا وتكەن جىلعى ايلىقتا 89950 ادامعا 349 ميلليون تەڭگە الەۋمەتتىك قولداۋ كورسەتىلگەن. بۇدان باسقا, ءارتۇرلى ارنادان دا قاراجات تارتۋ قاراستىرىلعان. اتاپ ايتساق, 13427 ادامعا تەگىن نەمەسە جەڭىلدىكپەن دارىلىك پرەپاراتتار, 20622 ادامعا ازىق-ت ۇلىك جيىنتىقتارى, 324 ادامعا قىسقى وتىن ساتىپ الىندى. جەكە تۇرعىن ۇيلەرىن جوندەۋ, جەڭىلدىكپەن كوممۋنالدىق قىزمەت اقىلارىن تولەۋ, تاعى باسقالارىنا دا قوماقتى قارجى بولىنگەن.
ارداگەرلەر ۇيىمدارىنىڭ بەلسەندىلەرى جىل باسىنان بەرگى التى ايدا ەكى مىڭنان اسا اعا ۇرپاق وكىلدەرىنىڭ تۇرمىس جاعدايىن زەردەلەدى, 76 زەينەتكەر ساناتوريلەر مەن دەمالىس ۇيلەرىندە ەم-دوم قابىلدادى. كوكشەتاۋ قالاسىنىڭ, بىرقاتار اۋدانداردىڭ ساۋدا نۇكتەلەرىندە حالىقتىڭ تۇرمىسى تومەن توپتارىنا ارنالعان الەۋمەتتىك سورەلەر اشىلعان, تۇراقتى جۇمىس ىستەيدى. وبلىستىڭ اۋداندارى مەن قالالارىندا تۇرمىس دەڭگەيى تومەن وتباسىلار ارزان باعاداعى وتىنمەن قامتىلعان.
رۋحاني-مادەني ءىس-شارالارعا دا ەرەكشە كوڭىل بولىنەدى. بيىلعى العاشقى توقساندا عانا وبلىستاعى ارداگەرلەر ۇيىمدارىنىڭ قاتىسۋىمەن 400-دەن اسا ءارتۇرلى ماقساتتاعى ءىس-شارا ءوتتى. 247 زەينەتكەرگە گازەت-جۋرنالدار جازدىرىلدى.
اۋداندىق ارداگەرلەر كەڭەستەرى جەرگىلىكتى اتقارۋ ورگاندارىنا سۇيەنە وتىرىپ, قارتتار مەن مۇگەدەكتەردىڭ مۇقتاجدىقتارىن قاناعاتتاندىرۋمەن ايلىق كەزىندە عانا ەمەس, جىل بويى اينالىسادى. اقكول, تسەلينوگراد, ەسىل, ساندىقتاۋ اۋداندارىندا كاسىپورىندار ەسەبىنەن ۇيىمداستىرىلعان قارتتارعا ارنالعان الەۋمەتتىك ينتەرناتتار جۇيەلى جۇمىس ىستەپ كەلەدى. قازىر وبلىس كولەمىندە ءبىرىنشى, ەكىنشى توپتاعى قارتتارعا ارنالعان 5 ارداگەرلەر ءۇيى بار. ولارعا دا ۇدايى كوڭىل ءبولىنىپ, ونداعى قارتتاردىڭ تۇرمىستىق-الەۋمەتتىك, رۋحاني ماسەلەلەرى شەشىلىپ وتىرادى.
وسى تۇرعىدا تاياۋدا عانا قۇرىلعان قوسشى قالالىق ارداگەرلەر كەڭەسىنىڭ جۇمىسىن ەرەكشە اتاپ وتكەن ابزال. مۇندا بارلىق مەنشىك تۇرىندەگى ەڭبەك ۇجىمدارىندا, مەكەمەلەر مەن ۇيىمداردا زەينەتكە شىققان ەگدە ادامدارمەن كەزدەسۋلەر وتكىزۋ يگى داستۇرگە اينالعان. سول كۇندەرى ولارعا كوڭىلدى كەش ۇيىمداستىرىلىپ, ارداگەرلەر مەن مۇگەدەكتەرگە قۇرمەت كورسەتۋ كونتسەرتتىك باعدارلامالارمەن, ءتۇرلى قايىرىمدىلىق اكتسيالارىمەن قاتار جۇرگىزىلەدى. شارۋاشىلىقتار مەرەكەلىك داستارقاندارىن جايىپ, ازىق-ت ۇلىك جيىنتىقتارىن ۇلەستىرەدى. ەگدە ادامدارعا وتىن, كومىر, ءدارى-دارمەك الۋعا, پاتەرلەرىن جوندەۋگە اقشالاي كومەك كورسەتىلىپ, تۇرمىسقا قاجەت زاتتار مەن كيىم-كەشەك تابىس ەتىلەدى. تاۋار وندىرۋشىلەردىڭ بەلسەندى قاتىسۋىمەن اۋىل شارۋاشىلىعى ونىمدەرىنىڭ ارزانداتىلعان جارمەڭكەلەرى وتكىزىلەدى. زەينەتاقىسى تومەندەرگە, مۇگەدەكتەرگە ءبىر رەتتىك اقشالاي جاردەم كورسەتىلەدى.
قارتتار مەن مۇگەدەكتىگى بار ادامداردى الەۋمەتتىك قولداۋ جونىندەگى ايلىقتى وتكىزۋدىڭ ءىس-شارالار جوسپارىنا سايكەس بارلىق مەنشىك نىسانىنداعى ەڭبەك ۇجىمدارىندا قارتتارمەن كەزدەسۋلەر وتكىزىلدى, ءىس جۇزىندە بارلىق قالا مەن اۋداندا مەرەكەلىك قۇتتىقتاۋلار ۇيىمداستىرىلدى, سىيلىقتار, اقشالاي جاردەماقىلار تابىستالدى. زەينەتكەرلىك جاستاعى ەرلەر مەن ايەلدەر اراسىندا شاحمات, دويبى ءتۋرنيرى, «توعىزقۇمالاق» ۇلتتىق ويىنى وتكىزىلدى. جارىستىڭ جۇلدەگەرلەرى مەن جەڭىمپازدارى گراموتالارمەن, مەدالدارمەن, باعالى سىيلىقتارمەن ماراپاتتالدى. كورۋ, ەستۋ, ەرەكشە قاجەتتىلىكتەرى بار ادامدارعا ارنالعان مەرەكەلىك ءىس-شارا ۇيىمداستىرىلدى.
ايلىق كەزىندە ءتيىستى مەملەكەتتىك ورگاندار مەن مەكەمەلەردىڭ, اۋداندىق, قالالىق ارداگەرلەر كەڭەستەرىنىڭ, باستاۋىش ارداگەرلەر ۇيىمدارىنىڭ بەلسەندىلىگى ەرەكشە ارتاتىنى بەلگىلى. ويتكەنى باستى ماقسات – اعا ۇرپاق وكىلدەرىن الەۋمەتتىك-تۇرمىستىق تۇرعىدان قورعاۋ, ولاردىڭ ومىرلىك بەلسەندىلىگىن ارتتىرۋ.
وبلىستىق ارداگەرلەر كەڭەسىنىڭ ماقساتى – اعا بۋىن وكىلدەرىن الەۋمەتتىك قورعاۋ, تۇراقتى مورالدىق, ماتەريالدىق قولداۋمەن قاتار, ەلدە ءجۇرىپ جاتقان قوعامدىق-ساياسي وقيعالاردان, ماسەلەلەردەن دە تىس قالماۋ.
«ءبىزدىڭ رۋحاني باعىتتاعى جۇمىستارىمىز نەگىزىنەن پرەزيدەنت قاسىم-جومارت توقاەۆتىڭ جولداۋلارىن, ۇلتتىق قۇرىلتايدا سويلەگەن سوزدەرىن كەڭىنەن ناسيحاتتاۋعا ارنالادى. اتالعان قۇجاتتار بۇكىل قوعامعا سەرپىلىس بەرىپ, جالپى ەلدىڭ ىلگەرىلەۋ باعدارىن ايقىنداپ بەردى, وندا تەرەڭ, حالىق كوڭىلىنەن شىققان كەلەلى ويلار ايتىلدى. اسىرەسە ەكونوميكالىق وزگەرىستەر, جاڭا, ادىلەتتى قازاقستاندى قالىپتاستىرۋ جايى كوپكە ۇلكەن وي سالدى. وسىعان وراي, ەلدىكتى نىعايتۋعا باعىتتالعان رەفورمالاردى ءتۇسىندىرۋ مەن ناسيحاتتاۋ ماقساتىندا وبلىستىق ءىس-شارالار جوسپارى جاسالدى, – دەيدى وبلىستىق ارداگەرلەر كەڭەسىنىڭ توراعاسى ەرمەك نۇعىمانوۆ. – پرەزيدەنتتىڭ بيىك مىنبەردەن ايتقان سوزدەرىندە ايشىقتالعان يدەيالار مەن قاعيداتتاردى ىسكە اسىرۋ ماسەلەسى قوعامنىڭ بارلىق سالاسىنا, ونىڭ ىشىندە ارداگەرلەر بىرلەستىكتەرىنە دە زور جاۋاپكەرشىلىك جۇكتەيدى, ءبىزدىڭ بەلسەندىلىگىمىزدى, جۇمىسىمىزدىڭ ناتيجەلىلىگىن بارىنشا ارتتىرۋعا مىندەتتەيدى. ياعني بۇل ىسكە ءوز تاراپىمىزدان شاما-شارقىمىزشا ۇلەس قوسۋعا, قوعام سۇرانىستارىنا تەك پايدالى اقىل-كەڭەستەرىمىزبەن, ۇسىنىستارىمىزبەن عانا ەمەس, مۇمكىندىگىنشە ناقتى ىستەرىمىزبەن جاۋاپ بەرۋگە ءتيىسپىز».
وبلىستىق ارداگەرلەر كەڭەسىنىڭ وتىرىستارىندا اتالعان ماسەلەلەر كۇن تارتىبىنە قويىلعان. ايتالىق, ەڭبەك جانە حالىقتى الەۋمەتتىك قورعاۋ مينيسترلىگىنىڭ «بەلسەندى ۇزاق ءومىر» ۇلتتىق جوباسىن جۇزەگە اسىرۋ جونىندەگى شەشىمىنە وراي, ماسەلە تورالقا وتىرىسىندا قارالدى.
جالپى, اقمولا وبلىستىق ارداگەرلەر كەڭەسىنىڭ جەرگىلىكتى جەردەگى جۇمىسىن ۇتىمدى ۇيىمداستىرىپ وتىرعان وڭىرلىك فيليالدار قاتارىندا اقكول, اتباسار, زەرەندى اۋداندارى مەن ستەپنوگور قالاسىن اتاپ وتۋگە بولادى.
ءومىر جولىن ەلىمىزدىڭ گۇلدەنۋى مەن دامۋىنا ارناپ, ماڭداي تەرىن توككەن اتالار مەن اجەلەرگە قۇرمەت كورسەتۋ – بۇگىنگى جاس بۋىننىڭ باستى پارىزى.
جاسى ۇلعايعان ادامدارعا ەڭ كەرەگى – ارداگەرلەر ۇيىمى مەن بيلىك ورگاندارى تاراپىنان ايتىلاتىن جىلى ءسوز, ولاردىڭ ەڭبەكتەرىن قوعامنىڭ مويىنداۋى, سىيلاستىق كوزقاراس, سەنىمدى قارىم-قاتىناس. سوندىقتان الداعى ۋاقىتتا وسى ماسەلەلەرگە باسا نازار اۋدارعان ابزال.
