– 7 قازانداعى تاڭعى ساعات 08.00-دەگى جاعداي بويىنشا ەلىمىزدىڭ بارلىق وڭىرىندەگى جانە شەتەلدەگى 10 323 رەفەرەندۋم ۋچاسكەسىندە داۋىستاردى ساناۋ اياقتالدى. وبلىستىق, استانا, الماتى جانە شىمكەنت قالالارىنىڭ كوميسسيالارىنان الىنعان جەدەل دەرەكتەردىڭ نەگىزىندە ورتالىق رەفەرەندۋم كوميسسياسى داۋىس بەرۋدىڭ الدىن الا قورىتىندىسىن شىعاردى, – دەدى ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ ورك-دا وتكەن بريفينگتە.
الىنعان مالىمەتتەرگە سايكەس, رەفەرەندۋمعا قاتىسۋعا قۇقىعى بار ازاماتتاردىڭ جالپى سانى 12 ميلليون 284 مىڭ 487 ادامدى قۇراعان. داۋىس بەرۋگە 7 ميلليون 820 مىڭ 204 ادام (63,66%) قاتىسقان.
– قازاقستاندا اەس سالۋ تۋرالى رەفەرەندۋمعا قويىلعان ماسەلەنىڭ وڭ شەشىمىن جاقتاپ داۋىس بەرگەن ازاماتتاردىڭ سانى ەلىمىزدىڭ بارلىق وڭىرىندە داۋىس بەرۋگە قاتىسقانداردىڭ 71,12 پايىزىن نەمەسە 5 ملن 561 مىڭ 937 ادامدى قۇرادى. قازاقستاندا اەس سالۋ تۋرالى رەفەرەندۋمعا قويىلعان ماسەلەگە قارسى داۋىس بەرگەن ادامداردىڭ سانى داۋىس بەرۋگە قاتىسقانداردىڭ ىشىنەن 2 ملن 45 مىڭ 271 بولدى, – دەدى ن.ءابدىروۆ.
ورك توراعاسىنىڭ مالىمەتىنشە, ء«يا» جانە «جوق» دەگەن جاۋاپتاردىڭ ەكى نۇسقاسى دا تاڭدالعان, ولار – جارامدى بيۋللەتەندەر. داۋىستاردى ساناۋ كەزىندە ەسەپكە الىنبايتىن بيۋللەتەندەر سانى 82 729-دى قۇراعان. 130 267 بيۋللەتەن جارامسىز دەپ تانىلعان.
