«بۇل كۇنى وبلىستا 283 رەفەرەندۋم كوميسسياسى جۇمىس ىستەدى. كوميسسيانىڭ 9-ى – اۋماقتىق, 274-ءى – ۋچاسكەلىك. اتىراۋ قالاسى مەن اۋدانداردا مۇمكىندىگى شەكتەۋلى جاندارعا 100-گە جۋىق ينۆاتاكسي قىزمەتى ۇيىمداستىرىلدى. ۋچاسكەلەردە 15-كە جۋىق سۋردواۋدارماشى تارتىلدى. ۋچاسكەلەرگە تاكتيلدى بەلگىلەر ورناتىلدى. كوزى ناشار كورەتىن داۋىس بەرۋشىلەر اۋديونۇسقانى تىڭداعاننان كەيىن ترافارەتتەرمەن قامتاماسىز ەتىلدى», دەدى ا.ايماناكۋموۆ.
ونىڭ دەرەگىنە سۇيەنسەك, تىركەۋى بولماعاندىقتان, تىزىمگە ەنبەگەن ازاماتتاردىڭ داۋىس بەرۋىنە مۇمكىندىك جاسالدى. اتىراۋ قالاسىنداعى 5 ۋچاسكەدە سونداي ازاماتتارعا قىزمەت كورسەتىلدى.
مۇنايلى وڭىردە ۆاحتالىق اۋىسىممەن جۇمىس ىستەپ جۇرگەن مۇنايشىلار بار. ماسەلەن, جىلىوي اۋدانىنداعى «تەڭىز» كەن ورنىندا 10 مىڭ ادام تىركەلگەن. ال كاسپي تەڭىزىنىڭ وتاندىق سەكتورىنداعى «قاشاعان» كەن ورنىندا 880-گە جۋىق مۇنايشى جۇمىس ىستەيدى.
«مۇناي-گاز سالاسىنداعى كاسىپورىنداردا ۆاحتالىق اۋىسىممەن جۇمىس ىستەيتىن جۇمىسشىلار بار. سول سەبەپتەن 38 ۋچاسكەلىك كوميسسيا ۆاحتالىق قالاشىقتاردا داۋىس بەرۋدى ۇيىمداستىردى. بارلىق ۋچاسكە ماتەريالدىق-تەحنيكالىق جابدىقتارمەن قامتاماسىز ەتىلدى. ماسەلەن, «تەڭىز» كەن ورنىندا 6 ادامنان داۋىس بەرۋگە ءوتىنىش ءتۇستى. اتىراۋ وبلىسىنىڭ اۋداندارى مەن ەلىمىزدىڭ ءار وڭىرىنەن كەلگەن ولاردىڭ جۇمىس ورنىندا داۋىس بەرۋىن ۇيىمداستىرۋ ءۇشىن 7 رەفەرەندۋم پۋنكتى اشىلدى. ال كاسپي تەڭىزىندەگى «قاشاعان» كەن ورنىنداعى مۇنايشىلاردىڭ رەفەرەندۋمنان تىس قالماي, داۋىس بەرۋىنە مۇمكىندىك جاسالدى. رەفەرەندۋم كوميسسياسى كاسپي تەڭىزىندەگى كەن ورنىنا تىكۇشاقپەن بيۋللەتەن مەن جاشىكتى الىپ باردى. مۇنايشىلار جۇمىس ورنىندا داۋىس بەرەدى», دەدى ا.ايماناكۋموۆ.
سونداي-اق «ەمبىمۇنايگاز» اق مۇنايشىلارى دا جۇمىس ورنىندا داۋىس بەردى. قىزمەتكەرلەردى باسقارۋ دەپارتامەنتىنىڭ ديرەكتورى بەكەت عۇبايدۋلليننىڭ ايتۋىنشا, بۇل كاسىپورىننىڭ مۇنايشىلارى جىلىوي, يساتاي, ماقات جانە قىزىلقوعا اۋدانىنداعى كەن ورىندارىندا ۆاحتالىق اۋىسىممەن جۇمىس ىستەيدى.
«رەفەرەندۋمعا قاتىسۋ – ءار ازاماتتىڭ بورىشى. ۇرپاعىمىزدىڭ بولاشاعى ءۇشىن تاڭداۋ جاسادىق. ءبىزدىڭ كومپانيادا 5 مىڭ ادام جۇمىس ىستەيدى. قازىر اۋىسىمدىق ادىسپەن 1 664 ادام ءوندىرىس باسىندا جۇمىستا. ولاردىڭ داۋىس بەرۋى ءۇشىن بارلىق جاعداي جاسالدى. مۇنايشىلارمەن بىرگە مەردىگەر مەكەمەلەردىڭ 1 700-گە جۋىق جۇمىسشىسى دا داۋىس بەرۋگە مۇمكىندىك الدى», دەدى ب.عۇبايدۋللين.
اتىراۋ وبلىسى
