ءبىز الدىمەن ءوزىمىز داۋىس بەرەتىن №575 رەفەرەندۋم ۋچاسكەسىنە ات باسىن تىرەدىك. ساعات 09.30-دا داۋىس بەرۋگە كەلگەندەر سانى تىم از كورىندى. ۋچاسكەلىك رەفەرەندۋم كوميسسياسىنىڭ توراعاسى سۆەتلانا ششەرباكوۆا دا حالىقتىڭ بەلسەندىلىگى ازىرگە تومەندەۋ ەكەنىن ايتتى. ءبىز بولعان جارتى ساعاتتاي ۋاقىتتا 7-8 ادام عانا كەلىپ, داۋىس بەردى.
ال قالانىڭ ينتەرناتسيونال كوشەسىندە ورنالاسقان سماعۇل سادۋاقاسوۆ اتىنداعى ورتا مەكتەپتەگى №578 رەفەرەندۋم ۋچاسكەسىندە حالىقتىڭ ءجيى كەلىپ جاتقانى بايقالدى. كوميسسيا توراعاسى ءلاززات قۇرمانعاليەۆانىڭ ايتۋىنا قاراعاندا, كۇندىزگى ساعات 11.00 كەزىندە 150-دەي ادام داۋىس بەرگەنىن ايتتى. بۇل ۋچاسكەگە بارلىعى 1 594 سايلاۋ قۇقى بار ازامات تىركەلگەن ەكەن. ازىرگە سونىڭ 10 پايىزدايى عانا داۋىس بەرگەن بولىپ شىقتى.
كۇندىزگى ساعات 12.00-دەگى ورك مالىمەتىنە قاراعاندا, سولتۇستىك قازاقستان وبلىسىندا داۋىس بەرگەندەر ۇلەسى داۋىس بەرۋشىلەردىڭ 40 پايىزىنداي بولىپتى. بۇل – رەسپۋبليكا بويىنشا ورتا دەڭگەيدى كورسەتەدى.
جالپى, ءبىز بولعان 4-5 ۋچاسكەنىڭ بارىندە داۋىس بەرۋگە كەلگەندەرگە بارلىق جاعداي جاسالعان. قابىرعالارعا اقپاراتتىق, انىقتامالىق قاعازدار ىلىنگەن. سازدى اۋەن شالقىپ, حالىقتىڭ كوڭىل كۇيىن كوتەرىپ تۇردى.
سولتۇستىك قازاقستان وبلىسى
