«نان ءوندىرىسى تەحنولوگياسىن وسىمدىك كومپونەنتتەرىن قولدانۋ ارقىلى الۋ» جوباسىنا جەڭىسباي قابارجان مەن ەراسىل جۇماباەۆقا اۆتورلىق كۋالىگى بەرىلدى. «بيولوگيا ساباعىندا وتكەن تاعام ونەركاسىبىندە بيوتەحنولوگيانى پايدالانۋعا قاتىستى تاقىرىپ ەراسىلدى قاتتى قىزىقتىردى. وقۋشىنىڭ بۇل سالاعا قىزىققانى سونشالىق, ول دەرەۋ ءوز تاجىريبەسىن باستاپ كەتتى. زەرتتەۋ جۇمىسى قازاق ۇلتتىق اگرارلىق زەرتتەۋ ۋنيۆەرسيتەتىنىڭ اگروحابىندا كاسىبي دەڭگەيدە البينا ەرجانقىزىنىڭ جەتەكشىلىگىمەن جالعاستى. ەراسىل زەرتحاناداعى جۇمىسىن ناننىڭ دارۋمەندىك قۇرامىنا, ساپاسىنا وسىمدىك قوسپالارىنىڭ اسەرىن زەرتتەۋدەن باستادى», دەيدى جەڭىسباي كەنجەتاي ۇلى.
ەراسىل باستاپقىدا كوپتەگەن قيىندىققا تاپ بولعانىن ايتادى. تىپتەن زەرتتەۋدى تاستاپ تا كەتكىسى كەلگەن. بىراق عىلىمي جەتەكشىلەرىنىڭ قولداۋى ءارى ءوزىنىڭ ەڭبەكقورلىعىنىڭ ناتيجەسىندە جوباعا تىڭ يدەيا, جاڭا تىنىسپەن ورالدى.
«ناتيجەگە جەتۋىمە عىلىمي جەتەكشىم البينا ەرجانقىزى مەن ۇستازىم جەڭىسباي كەنجەتاي ۇلىنىڭ كومەگى زور بولدى. ولار مەنى ۇنەمى جاڭا باستامالارعا جىگەرلەندىردى. جاڭا تەحنولوگيالاردى ەنگىزۋ جۇمىسىمنىڭ اجىراماس بولىگىنە اينالدى. باسقارۋدىڭ اۆتوماتتاندىرىلعان جۇيەسىن پايدالانۋ ارقىلى اشىتقى جاساۋعا كىرىستىم. ءوندىرىس ناتيجەسىندە fogeltrauben ءجۇزىم سورتىنان saccharomyces cerevisiae اشىتقىسىن ءبولىپ الدىم. نان ءپىسىرۋ ونەرى تەك تەحنيكالىق ادىسىمەن شەكتەلمەيتىنىنە زەرتتەۋ بارىسىندا كوز جەتكىزدىم. ناتيجەسى ءداستۇرلى ادىستەردى زاماناۋي اسپازدىق اعىمدارمەن ۇيلەستىرە وتىرىپ, بىرەگەي رەتسەپت جاساۋعا اكەلدى. جاڭا قوسپالاردى قوسۋ تاجىريبەسى جانە ارنايى ديەتالىق نۇسقالاردى ازىرلەۋ شىعارماشىلىعىما شابىت بەردى. كۇندەلىكتى داستارقاننىڭ ءارىن دە, ءسانىن دە كەلتىرەتىن ساپالى نان تاعامىن ازىرلەۋگە بىرقاتار تەحنولوگيالىق ءادىستى مەڭگەرۋ قاجەت بولدى. العاشىندا شىعارماشىلىق پەن ناقتى عىلىمدى ۇيلەستىرۋدىڭ تەتىگىنە قاتىستى كوپ ىزدەندىم. اسىرەسە شيكىزات تاڭداۋ كەزەڭى قيىندىق تۋعىزدى. وعان ۇننىڭ تۇرلەرىن زەرتتەپ, قۇرامىن, سوڭعى ونىمگە دەيىنگى وندىرىستىك كەزەڭ تۋرالى اقپارات جيىستىردىم. نان ءپىسىرۋ تەحنولوگياسىندا تەمپەراتۋرا مەن ىلعالدىلىقتى باسقارۋدىڭ قىر-سىرىنا قانىعىپ, قىتىرلاق جانە جۇمساق تسەلليۋلوزانىڭ پايدا بولۋىنىڭ وڭتايلى جاعدايىن قاراستىردىم. ءدال وسى كەزەڭدە ۇننان ءدامدى نان ءپىسىرۋدىڭ قۇپياسىن اشۋعا تۋرا كەلەدى. سوڭعى ناتيجەگە جەتۋ بارىسىندا كوپتەگەن سىناق پەن قاتەلىك كەزدەستى», دەيدى ەراسىل.
دۇكەن سورەلەرىندە نان ونىمدەرىنىڭ سان ءتۇرى سامساپ تۇر. «نان ونىمدەرى تەحنولوگيا مەن جاڭا ۇدەرىس ناتيجەسىندە عانا پايدا بولمايدى ەكەن, ول ءوندىرۋشىنىڭ شەبەرلىگى, ونەرىمەن تىعىز بايلانىستى» دەگەن ەراسىل بۇل سالادا جيناعان تاجىريبەسىن جەتىستىك دەپ قابىلداپ قانا قويماي, الەمدە كاسىبىن زور سۇيىسپەنشىلىكپەن اتقارىپ جاتقان جاندار مەن ساپالى ءبىلىم الۋىنا, جاڭا تاقىرىپتاردى يگەرۋىنە قولداۋ كورسەتەتىن ۇستازدار ەڭبەگىنە زور قۇرمەتپەن قاراۋدىڭ ماڭىزدى ەكەنىن ايتتى.
الماتى
