«كاسىبىمدى كەڭەيتۋدى كوپتەن ويلاپ جۇرگەنمىن. بىراق قارجى تاپشىلىعى قولبايلاۋ بولدى. «اۋىل اماناتى» باعدارلاماسىنىڭ جۇزەگە اسۋى قولىمدى ۇزارتتى. قولىما تيگەن 8 ملن تەڭگەگە بيزنەس-جوسپارىمدا كورسەتىلگەن ۇلكەن پەش, كونديتەرلىك ارنايى ۇستەلدەر مەن توڭازىتقىش سياقتى ەڭ قاجەتتى قۇرال-جابدىقتاردى شەتەلدەن تاپسىرىسپەن ساتىپ الدىم. مەملەكەت تاراپىنان وسىنداي مۇمكىندىكتىڭ بولىپ جاتقانى قۋانتادى», دەيدى امانكەلدى كوجەباەۆ.
ايتۋىنشا, ونىمىنە تۇراقتى سۇرانىس بار. سونداي-اق كاسىبىن كەڭەيتۋدىڭ ناتيجەسىندە جۇمىسشى قاتارى كوبەيگەن. باستاپقىدا 4 اداممەن جۇمىسىن باستاعان كونديتەرلىك تسەحتا بۇگىندە 10 ادام ەسەلى ەڭبەك ەتەدى.
تسەحقا كەلگەن جۇمىسشىلار الدىمەن سىناق مەرزىمىنەن وتەدى. تولىق ۇيرەنىپ, بەيىمدىلىگىن بايقاتادى. كاسىبى ۇناپ, ءارى قاراي جۇمىسىن جالعاستىرۋعا نيەتتى بولسا, رەسمي تۇردە قۇجاتپەن جۇمىسقا قابىلدايدى.
«اۋىلدا ەڭبەك ەتكىسى كەلەتىن ادام از ەمەس. ەگەر الداعى ۋاقىتتا بۇدان دا جوعارى دەڭگەيدە داميتىن بولساق, ەڭبەك ادامدارىنىڭ تابىسى ارتىپ, تۇرمىسى دا جاقسارادى», دەيدى كاسىپكەر.
اۋىلداستارىنىڭ الەۋمەتتىك-تۇرمىستىق جاعدايىنىڭ جاقسى بولۋىن قالايتىن اردا ازامات كەلەشەكتە جۇمىسشى سانىن 30-40-قا جەتكىزۋدى ويلاستىرىپ وتىر.
اۋىلداعى اعايىننىڭ قام-قارەكەتىن كۇيتتەيتىن «اۋىل اماناتى» باعدارلاماسى جىلدىق 2,5 پايىز سىياقى مولشەرلەمەسىمەن 5 جىلعا دەيىنگى مەرزىمگە شاعىن نەسيە بەرۋدى كوزدەيدى. مال شارۋاشىلىعى سالاسىنداعى جوبالار ءۇشىن شاعىن نەسيە مەرزىمى – 7 جىل. شاعىن نەسيەنىڭ ەڭ جوعارى سوماسى – 2,5 مىڭ ايلىق ەسەپتىك كورسەتكىش (2024 جىلى – 9,2 ملن تەڭگە), اۋىل شارۋاشىلىعى كووپەراتيۆتەرىن دامىتۋ ءۇشىن – 8 مىڭ اەك (2024 جىلى – 29,5 ملن تەڭگە).
ءار وڭىردەگى سەنىم بىلدىرىلگەن وكىل بولىپ سانالاتىن الەۋمەتتىك-كاسىپكەرلىك كورپوراتسيا باعدارلاما قاتىسۋشىلارىنىڭ نەعۇرلىم جەڭىلدەتىلگەن شاعىن نەسيەگە قول جەتكىزۋىنە كومەك بەرەدى.
الماتى وبلىسى
