سۋرەتتى تۇسىرگەن – اۆتور
كەرىلگەن كەنەپتەگى كومپوزيتسيالىق سۋرەتتە ارقار بەينەلەنگەن. ءيىر ءمۇيىزدى تۇياقتى جانۋار ارى قاراپ تۇر. كارتينا بەتىنە جارتاستاعى پەتروگليفتەردى ءتۇسىرىپتى. قازاقى قوڭىر رەڭدى پولوتنو استارىندا نەندەي وي بار دەپ قاراپ وتىرعانىمىزدا, سۋرەتشى سىرىن ءوزى اقتارعان.
– تارباعاتاي تاۋلارىندا بۇرىنعىداي مىڭعىرعان ارقار جوق. ازايىپ كەتتى. ول نەنىڭ اسەرىنەن جوعالعانىن بىلمەيمىز. دەسە دە, ءبىزدىڭ اۋداننىڭ بەلگىسى رەتىندە ارقار جانۋارى قالا بەرمەك. سوندىقتان دا مىناۋ ارقاردى كەنەپكە ءتۇسىردىم. نەگە ارى قاراپ تۇر دەگەن وي كەلەتىن شىعار. ايتىپ وتكەندەي, ازايىپ كەتكەن جانۋار مۇمكىن ادامزاتقا ما, مۇمكىن تابيعاتقا ما وكپەلى بولۋى مۇمكىن. بۇرىنعىداي تاۋ-تاستا ويناقتاپ جۇرگەن ولار جوق. ال بەتىندەگى پەتروگليفتەر ءبىزدىڭ وڭىردە كوپ كەزدەسەدى, – دەيدى قىلقالام شەبەرى.
بەلگىلى سۋرەتشى ەركەبۇلان جاكىشەۆتىڭ شىعىس قازاقستان كولەمىندە قاتىسپاعان كورمەسى, پلەنەرى كەمدە-كەم شىعار. جەكە قورىنداعى كارتينا قانشاما. جەتكەن جەتىستىكتەرى دە از ەمەس. شاكىرتتەرى دە كوپتەگەن بايقاۋدا توپ جارىپ, اۋداننىڭ نامىسىن قورعاپ ءجۇر. جالپى, تارباعاتاي ءوڭىرى – ونەردىڭ وشاعى.
ەر ازامات ءۇي سالىپ, اعاش وتىرعىزۋ, ۇرپاق ءوسىرۋ كەرەك بولسا, ەركەبۇلان ۇشەۋىن دە ورىندادى. الدىڭعى جىلى ەكى قاباتتى ءۇي تۇرعىزىپ, ىشكى جيھازىنا دەيىن ءوز قولىمەن جاساعان. كەڭ اۋلاسى گۇلمەن كومكەرىلىپ, باۋ-باقشاسى جايقالىپ تۇر. ونەر ادامى سۇلۋلىققا, تابيعاتقا جاقىن عوي. قىلقالام شەبەرى تاۋىقتىڭ ءتۇر-ءتۇرىن ءوسىرۋدى دە ەرمەك قىلعان. سابالاق ءجۇندىسى «براما», قوڭىر ءتۇستىسى ورىستىڭ «حوحلاتىيى» سەكىلدى تاۋىقتار اۋلاسىندا ءورىپ ءجۇر. ءتىپتى تۇركيادان اسىل تۇقىمدى جۇمىرتقاعا تاپسىرىس بەرىپ قويىپتى. جۇمىرتقاسىن العىزسا بولدى, ۇيىندەگى ينكۋباتورمەن ساناۋلى كۇندە بالاپان شىعارىپ الادى.
– باياعىدا كەپتەر دە اسىراعان ەدىم. قازىر ءتۇرلى تاۋىق اسىراپ ءجۇرمىن. شىنىمدى ايتسام, جۇمىرتقاسى ءۇشىن ەمەس. ەت ءوندىرۋدى دە كوزدەگەن ەمەسپىن. اۋلادا قىزىلدى-جاسىلدى بولىپ جايىلىپ جۇرگەندەرىنە قاراپ سۇيسىنەمىن. تاۋىق بولعانىمەن, ەرەكشە جاراتىلىس يەلەرى. قولعا دا ۇيرەنىپ العان, – دەپ قوڭىر بالاپاندى بىلەگىنە قوندىرا قويدى.
سونداي-اق سۋرەتشى تاۋىق قانا ەمەس, تازى جۇگىرتۋدى دە جاقسى كورەدى. اۋلاسىندا شىنجىرسىز جۇرەتىن تازىسى تاۋىق كورسە, تۇرا قۋاتىن يتتەردىڭ قاتارىنان ەمەس ەكەن. ال دالالى جەردە كوزىنە قويان يا تۇلكى تۇسسە, الماي قويمايدى دەيدى.
– قانسوناردا ارنايى جولداما الىپ, اڭ قۋىپ قايتامىز. وعان دەيىن تازىلارىمدى باپتايمىن. مىنا تازىم قاسقىرعا دا تۇسكەن. تۇلكى, قويان سەكىلدى اڭداردى وپ-وڭاي الادى, – دەپ, ەسىك پەن توردەي بولىپ سوزىلىپ جاتقان تازىسىن ىسقىرىپ شاقىردى.
قىزىعى, بۇل تازىنى ەركەبۇلان كۇشىك كەزىندە وسكەمەن تۇرعىنىنا ساتىپ جىبەرىپتى. كۇندەردىڭ كۇنى تامىر-تانىستارى قالا كوشەسىندە قاڭعىرىپ جۇرگەن سول تازىنى كورىپ قالىپ, ەركەبۇلانعا ايتقان. يت دەسە, ىشكەن اسىن جەرگە قوياتىن قىلقالام شەبەرى ورتالىق قالاعا ۇشىپ جەتىپ, تازىسىن تاۋىپ الىپ كەلىپ, باققان, باپتاعان.
بەكزات ءداستۇردى دارىپتەپ جۇرگەن ەركەبۇلان جاكىشەۆتىڭ ونەرى دە بەكزات. كەشەگى ءابىلحان قاستەەۆتەردەن قالعان ونەردىڭ ورىسىندە تىنىمسىز ەڭبەكتەنىپ ءجۇر. ونەر باعىتىنداعى ەڭبەگىن ۇيىندەگى قابىرعالارعا قاراپ-اق بايقايسىز. تورىندە مايلى بوياۋمەن جازىلعان شىڭعىستاي اۋىلىنىڭ كورىنىسى تۇرسا, اسۇيىندە ناتيۋرمورت جانرىنداعى كارتينالار كوز جاۋىن الادى. قاراپ وتىرىپ, قانداي جەتىستىكتەرىڭ بار دەيمىز عوي ادەتتەگى سۇراققا باسىپ.
– وقۋشىلاردىڭ ماراپاتتارى مەكتەپتە. ءوزىم ءىىى حالىقارالىق سۋرەت سايىسىندا پەيزاج اتالىمى بويىنشا باس جۇلدە العانمىن. ەڭ ۇلكەن جەتىستىگىم سول شىعار. ودان باسقا دا ماراپاتتار بار. ەسكە ءتۇسىپ تۇرعانى وسى, – دەدى قاراپايىم كەيىپتە.
ە.جاكىشەۆتىڭ ۇلان, تارباعاتاي, كاتونقاراعاي اۋداندارىنا پلەنەرگە شىعىپ, جۇزدەگەن ەتيۋد جازعانى كوپشىلىككە بەلگىلى. كارتينالارى سونىسىمەن دە قۇندى. بوياۋ جاعۋداعى ءستيلىن دە جازباي تانۋعا بولادى. قولتاڭباسى ەرەكشە شەبەردىڭ جۇمىستارى وسكەمەندەگى ونەر مۋزەيىنە دە قويىلعان.
شىعىس قازاقستان وبلىسى,
تارباعاتاي اۋدانى,
اقجار اۋىلى
