«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ءباسپاسوز قىزمەتى حابارلاعانداي, بۇل كۇنى 10 مىڭنان استام سايلاۋ ۋچاسكەسىنىڭ 196-سىندا حالىققا قىزمەت كورسەتۋ ورتالىعىنىڭ قىزمەتكەرلەرى جۇمىس ىستەيدى.
ولار تۇرعىلىقتى جەرى جوق ازاماتتاردى سايلاۋ ۋچاسكەسىنىڭ ورنالاسقان مەكەنى بويىنشا تىركەيدى. بۇل شەشىم بارلىق قازاقستاندىقتاردىڭ كونستيتۋتسيالىق سايلاۋ قۇقىعىن جۇزەگە اسىرۋى ءۇشىن قابىلداندى.
رەفەرەندۋم وتەتىن كۇنى حقو قىزمەتكەرلەرى ساعات 7.00-دەن 20.00-گە دەيىن سايلاۋ ۋچاسكەلەرىندە وتىرىپ, ازاماتتاردى ءبىر تاۋلىككە تىركەۋدى قامتاماسىز ەتەدى. تىركەلمەگەن ازامات مەكتەپكە, كوللەدجگە نەمەسە اۋرۋحاناعا داۋىس بەرۋ ءۇشىن بارسا, ول تىكەلەي وسى مەكەمەگە تىركەلەدى. 7 قازاندا تىركەۋ اۆتوماتتى تۇردە جويىلادى جانە ءوتىنىش بەرۋشى تۇرعىلىقتى جەرى بويىنشا قايتا تىركەلۋى كەرەك.
تۇرعىلىقتى جەرى بويىنشا تىركەلگەن قازاقستاندىقتار رەفەرەندۋم كۇنى حالىققا قىزمەت كورسەتۋ ورتالىعى ارقىلى تىركەلە المايدى, ويتكەنى ولار تۇرعىلىقتى مەكەنى بويىنشا داۋىس بەرۋى كەرەك.
